الرسم على القلب بقلم زينب محروس الفصل الأول حصريه وجديده
كانت شقتهم في حي شعبي لكنها كانت شقة مرتبة و أثاثها حديث نوعًا ما، نام على السرير و هو ساند دماغه بإيده، و شرد بتفكيره و هو بيدور على حل يقنع بيه بنت أخوه اللي مصممة تدخل مدرسة لغات زي صاحبتها اللي في الشارع اللي وراهم، و بالرغم من رفض جدتها إلا إن البنت مصممة إنها لو مدخلتش المدرسة اللي عايزاها مش هتذاكر و لا حتي هتروح المدرسة.
بالنسبة له لو الفلوس متاحة هو معندوش مشكلة، لكن المشكلة إن دخله على القد، و في نفس الوقت مش قادر يرفض طلب بنت أخوه عشان ميجيش يوم و يتهموه ولاد اخوه إنه قصر في حقهم و أهمل مستقبلهم عشان هما مش ولاده.
و بعد تفكير طويل قرر أنه يقدم لبنت اخوه في المدرسة طالما كدا كدا دفع المصاريف متقسم على الترمين.
خبطت نيچار على الباب قبل ما تدخل للمكتب، ابتسم لها الرجل
_أنا خارج شوية يا نيچار، عايزك تقعدي بدالي في طلب تقديم لطالبة جديدة النهاردة.
ردت نيچار بتذمر:
_ يا بابا حضرتك عارف اني بكره شغل الاوراق و الاستمارات ده.
ربت على كتفها وقال بطلف:
_ معلش يا حبيبة بابا بقى، عندي مشوار ضروري.
اتنهدت باستسلام و راحت قعدت بعد ما طلب منها والدها تدخل بعض الملفات على اللاب توب، قاطع شغلها على اللاب دخول شريف اللي دخل من غير ما يدق الباب، فسألته نيچار باستغراب:
_ انت بتعمل ايه هنا؟؟
قعد شريف و قال بمرح:
_ وحشتيني، فجيت عشان اشوفك.
_ عرفت مكاني منين؟
_ من ابن عمي اللي هو العريس بتاع امبارح، و قالي كمان إن اسمك نيچار، و حضرتي الخطوبة بدل صاحبتك.
_ ايوه حضرتك عايز ايه يعني؟
_ نتعرف على بعض كدا مش يمكن
رفضت نيچار إنها تتكلم معاه و زعقت له و طلبت منه يخرج برا، و بالرغم من إلحاحه الشديد إلا إنها رفضت رفض قاطع فكان مضطر يخرج بعد ما سابها متعصبة، في الوقت ده دق كريم على الباب المفتوح و قال بجدية:
_ ممكن أخد من وقت حضرتك خمس دقايق؟
كانت بتكتب على اللاب لما قالت بعصبية:
_ مش حابة اتكلم قولتلك، مبتفهمش!!
رفعت دماغها في الكلمة الأخيرة، فاتصدمت إنه كريم، اللي فهم من كلامها إنها أكيد متخانقة مع شريف لأنهم اتقابلوا على بوابة المدرسة، فابتسم و قال بهدوء:
_ معتقدش إني استحق النبرة دي!!!
وقفت نيچار مكانها و شاورت لكريم و قالت بإحراج:
_ انا آسفة جدًا و الله مقصدش حضرتك، كنت بحسب الدبانة رجعت تاني.
دخل كريم و هو بيبتسم بخفة، فشاورت له على الكرسي:
_
قعد كريم و بدأ كلامه بجدية و هو بيعرفها بسبب تواجده، و لما كان المفروض يملي استمارات التقديم، تفاجئ كريم إنها كلها بالإنجليزي، فقال بإحراج:
_ بصراحة أنا واقع في الإنجليزي.
ابتسمت نيچار برقة و قالت بهزار:
_ دا أنا واقعة أكتر منك، استني هطلب من حد يساعدنا..
في الحقيقة هي محترفة في الإنجليزي و كأنه لغتها الأم، لكنها محبتش تظهر دا ل كريم، و بالفعل طلبت من مدرسة زميلتها تساعدهم في الاستمارات
كان ساند على سور المدرسة و منتظر خالد اللي طلب يقابله، كان بيقرأ قرآن بصوت هو بس اللي سامعه، لكنه سكت مرة واحدة لما شاف نيچار خارجة من المدرسة و فجأة وقفت عربية و حاول شاب إنه يركبها في العربية بالرغم من صراخها و معافرتها، و بالفعل قبل ما كريم يتحرك من مكانه كانت
يتبع..............
