الفصل الثالث(الأكثر حباً) شرف لي أن أكون الاكثر حباً

الفصل الثالث(الأكثر حباً)
شرف لي أن أكون الاكثر حباً ..
.....
عبس إبرام وهو ينظر إليه وقال ؛
-يعني أيه مش فاهمك ؟!
هز كتفيه بعصبية وهو يقول ؛
-يعني مبقتش تحبني زي الاول يا إبرام ...كأن حبها الكبير خلص ...الشغف راح ..لمعة عينيها بهتت ...
نهض وهو يدور حول نفسه ....كان إبرام ينظر إليه بهدوء ...يحلله كي يفهم مشكلته ....
نظر چورچ إلى إبرام بعصبية وقال :
-ممكن متفضلش باصصلي كده وخلاص ...أنا عايز حل !
-حل لأيه ؟!
شعر جورج وكأنه عاجز عن الكلام ...للحظات تاهت الكلمات من عقله ...ثم أتجه وجلس على الأريكة وهو ينظر لإبرام بإستياء ويقول :
-أنا بحب ماريانا اكتر ما هي بتحبني بكتير !
ابتسم إبرام وقال :
-وفيها ايه لما تحب شريكة حياتك اكتر ما هي بتحبك ...أنا بحب نانسي اكتر ما هي بتحبني ...وبقولها كده ومش متضايق بالعكس أنا مبسوط اني بديها الحب اللي تستاهله لأن دي الست اللي قلبي

معاها وتستاهل اي حاجة حبي وحياتي حتى ...هي ماريانا متستاهلش انك تحبها اكتر يا جورج ....
هز جورج رأسه وقال:
-حبها ليا قل و ...
-مش قل بس لحد دلوقتي ماريانا مُشتتة متنساش اللي حصلها وكمان انت تتحمل جزء منه ...انت افضل وراها ...اديها حبك وضحلها انك بتحبها من غير مقابل ..انت مش مستني منها حب زي اللي بتحبه لها...انت بتحبها من غير أنانية ...وده الحب يا جورج انك متكونش أناني في حبك ....
-أزاي؟!
قالها دون فهم ليقول إبرام :
-الحب الحقيقي مش أناني يا جورج ...الحب معناه أن شريك حياتك يكون قبلك ...تحبه وتحميه ولو شايف ان سعادته مع حد تاني تساعده ...بس ماريانا بتحبك وانت بتحبها ...بتحبها اكتر مش مشكلة هي مراتك وحبيبتك حبها اكتر ودلعها...عرفها انك بتحبها جداً وان كل لحظة اذيتها فيها أنت اذيت نفسك ...رجع شغفها ليك ...أنت الوحيد اللي تقدر تعمل كده لما تشوف كم الحب اللي بتدهولها هتديك الآمان تاني ...فهمها انك معندكش مشكلة لو حبها ليك أقل من حبك ليها ...حسسها أنها ملكة وهي هتحبك اكتر واكتر ...ماريانا القديمة هترجع بمجهود منك لا مني أنا ولا من غيري ...هترجع لما تشوف انك بتعوضها عن اللي عاشته معاك ...فهمتني يا جورج ؟ 
ابتسم جورج وهز رأسه وهو ينهض مُقترباً من إبرام وقال :
-فهمت يا إبرام ...
ثم أمسكه من ذراعيه وجعله ينهض ثم عانقه بقوة وقال:
-حبيبي يا إبرام والله ...
حاول إبرام أبعاده وقال:
-جورج ..جورج ابعد أنا مش ماريانا...جورج لو حد دخل يقول علينا ايه ...ابعد كده يا اخي ده أنت لازقة .. 
.....
في المساء...
فتحت باب المنزل لتشهق بقوة وهي تجد المنزل مضئ للغاية والورود الرائعة تفترش الأرضية. ...بينما يقف جورج في المنتصف وهو يبتسم بسعادة ويحمل باقة كبيرة من الأزهار المفضلة لها ...اقترب منها  وهو يقبل رأسها ....ثم ابتعد وهو يخرج زهرة ويقول ؛
-دي بتقول انك حياتي ...
ابتسمت دامعة ثم أخرج زهرة آخرى :
-ودي انك الأغلى على قلبي....
أعطاها آخرى وقال :
-ودي أن وجودك مهم لوجودي ....
ضحكت والدموع تنساب من عينيها فمسح دموعها  وأخرج آخرى وقال :
-ودي اني بحبك اكتر ما أنتِ بتحبيني بكتير ....
ثم أعطاها الباقي وأكمل وهو يمسك كفها ويقبله:
-ودوول دليل حبي ليكي ...حتى لو حبي ليكي اقوى مش هزعل ....أنتِ تستاهلي حياتي يا ماريانا مش حبي بس ....ولو حاسة انك لسه مش  واثقة فيا فأنا واجبي ارجع الثقة دي واوضحلك اني دايما هبقى الطرف الأكتر حب واهتمام في العلاقة دي ...هتفضلي الجزء الحلو في حياتي ...عمري ما هزعلك ولا هجرحك مرة تاني ....
شهقت بكاءاً فضمها بقوة ويقول :
-بحبك يا ماريانا ...مش مهم لو محبتنيش بنفس الحب ده....المهم انك معايا وانا هعوضك عن اي حاجة وهحاول قد ما اقدر ارجع حبك ليا تاني...أنا اسف لو ضغطت عليكي .
يتبع
تملكه
سولييه_نصار