أنت بجد قادر تاكل أنت معندكش دم ولا إحساس خالص آية عيسى
أنت بجد قادر تاكل أنت معندكش دم ولا إحساس خالص؟ إحنا حياتنا بتتدمر والنهاردة اتكتب كتابنا غصب عننا وأنت قاعد بتستطعم الساندوتش وبتاكل ببرود يا مستفز!
جرى إيه يا ليان؟ العصبية بتهد الحيل وبتحرق سعرات حرارية كتير، وأنا يا بنتي محتاج طاقة عشان أقدر أستحمل لسانك اللي أطول من برج القاهرة ده، وبعدين إيه حياتنا بتتدمر دي؟ ليه متجوزة دراكولا؟ ده أنا يحيى، الباشمهندس اللي البنات بيقفوا طوابير عشان نظرة منه، أحمدي ربنا إن النصيب رماكي في حجري، غيرك كان يتمنى!
غيري يتمنى إيه؟ يتمنى واحد مغرور وشايف نفسه؟ وبعدين نصيب إيه ده؟ ده نصيب أسود ومنيل ب ستين نيلة!
أسود ولا نمور؟ هقهقهقهق!
.......
جرى إيه يا ليان؟ ما تضحكي يا بنتي، دي نكتة فريش لسه قايلها في الموقع الهندسي النهاردة، وبعدين السكوت ده مش لايق عليكي، أنتِ المفروض تردي وتغلطي وتطلعي جعفر اللي جواكي، إيه الهدوء المفاجئ ده؟
.......
خلاص يا ستي، سيبت الساندوتش أهو، مش هاكل عشان ترتاحي.. قوليلي بقا، هو أنا بجد وحش للدرجة دي؟ يعني يحيى ابن عمك اللي كان بيلعب معاكي وإحنا صغيرين بقا بعبع دلوقتي؟ للدرجة دي مش طايقة القعدة معايا؟
ابعد إيدك دي يا يحيى، ومطبطبش عليا، أنا بجد مش طايقاك ولا طايقة اليوم ده، ولا طايقة الطريقة اللي اتجوزنا بيها، أنت عارف إني كان نفسي أختار حياتي بنفسي، مش بابا وباباك يقعدوا
يا بنتي اهدى بس، عرايس لعبة إيه ؟ ، الحكاية وما فيها إنهم شايفين إننا لبعض، وبعدين تعالي هنا.. خدي قطمة من الساندوتش ده، بجد طعمه ينسيكي الهم، هيخليكي تشوفي الحياة بينك بدل ما أنتِ شايفاها سودة كدة!
تضربه في كتفه أنت بني آدم تافه! بقولك بنهار وتقولي خدي قطمة؟ خد أنت القطمة دي في دماغك عشان تفوق!
آه! ايدك يا بنتي.. اتلمي بقا إحنا في مكان عام والناس بدأت تبص علينا ويفتكروني متجوز ريا وسكينة!
مكان عام؟ هو انت خليت فيها مكان عام!!!
عام ولا أزهر؟ هقهقهقهق!
.......
مالك بتبصيلي كدا ليه؟ بصتك دي مرعبة، في إيه يا ليان؟ ما أنا قولت أردلك طولة لسانك ، اشمعنى أنتِ يعني؟
أنا بجد مش مستوعبة كمية البرود اللي عندك، إحنا في كارثة يا يحيى، وأنت ولا همك، عمال تهزر وتنكش فيا، أنت بجد مش فارق معاك إننا اتجوزنا غصب؟
ومين قالك إنه غصب؟ يمكن أنا وافقت بمزاجي؟ يمكن أنا شايف إن ليان بلسانها الطويل ده هي الوحيدة اللي تقدر تروّض يحيى ؟ وبعدين وطي صوتك شوية، صوتك جايب لآخر الكافيتريا!
صوتي عاجبني، والي مش عاجبه يسد ودنه، أنا حرة، و بعدين انت بتتكلم على الصوت ليه، احنا في إيه و لا في إيه !
الصوت؟ الصوت عيونه.. هقهقهقهق! لا جامدة دي، بجد جامدة، دي عايزة مهندس ديكور يبروزها!
............
بصي يا ليان، اسمعيني بجد المرة دي وسيبك
صفحة جديدة إزاي؟ وأنا كل ما أبص في وشك بفتكر إنهم أجبروني عليك؟
لا، بصيلي ك يحيى، مش ك ابن عمك المفروض عليكي، بصيلي كواحد معجب بيكي بجد بس كان مستني الفرصة الصح، ولما الفرصة جات دبش كدا، قولت مش مهم الطريقة، المهم النتيجة.. أنا عارف إنك خايفة، بس أوعدك إني هخليكي تحبي الأمر الواقع ده أكتر من أحلامك بكتير!
أنت بجد بتتكلم جد يا يحيى؟ ولا ده جزء من مناكشتك ورزالتك عشان تخليني أسكت؟
والله جد، والمهندسين مبيعرفوش يكدبوا ، وأنتِ حياتي اللي جاية.. ها؟ لسه مش طايقاني؟
هفكر.. بس بشرط، تبطل النكت اللي بتهبط الضغط دي!
دي بالذات مقدرش أوعدك بيها، بس أوعدك إني هخليكي تضحكي من قلبك .. وافقي بقا يا بت، ده أنا يحيى حبيبك!
بس أنا اتغصبت واتأذيت أوي
أوي يا يحيى.. مش قادرة أنسى إنكم قررتوا مكاني، كأني ماليش رأي في حياتي، الوجع ده مش سهل يروح بكلمتين!
حقك عليا يا قلب يحيى.. والله حقك عليا، أنا عارف إن الطريقة كانت دبش، وعارف إن ضغط الأهل كان رخم، بس وحياة دموعك الغالية دي لهعوضك عن كل لحظة زعل، أنا مقدرش أشوفك مكسورة كدا أبداً،
اللي جاي إيه؟ أنا حاسة إني فقيرة في اختياراتي عارف يعنى إيه الواحد يبقى فقير في الحتة دي ، حاسة إني ماليش حق في أي حاجة، حتى اليوم اللي المفروض أفرح فيه بقيت بعيط فيه كدا!
فقير؟ فقير مشلتت؟ هقهقهقهق!
..........
ما خلاص بقى فكك يا بنتي! ، وبعدين يعني إيه فقيرة؟ ده أنتِ متجوزة باشمهندس، يعني
برستيج وعز، وبعدين الفقر فقر الأدب وأنتِ ما شاء الله لسانك يوزع أدب على مدينة كاملة!
أنت بجد فظيع، أنا بكلمك في مشاعري وأنت بتهزر ؟ أنت عايز تجنني يا يحيى؟
يا ستي جنان بجنان بقا، ما هو الجواز ده أصلاً حالة جنان لوحدها ، وبعدين أنا بحاول أطلعك من المود الكئيب ده، اضحكي بقا، ده الضحكة منك بتنور المشروع اللي شغال فيه بقاله سنتين، عايزة يحيى تعبه يتهد عشان تكشيرة؟
اضحك على إيه؟ على نكتك و لا على شكلك ولا على ودانك ؟
أيوة كدا! بدأت الألسنة تشتغل وبدأت المايه ترجع لمجاريها.. طب قوليلي، لو قولتلك إننا هنخرج من هنا ونروح ناكل أحلى أكلة بجد، هتسامحيني؟ ولا لسه الفقر مسيطر عليكي؟
هسامحك بس عشان جعانة، مش عشان نكتك خالص.. بس بجد يا يحيى، بطل تهزر في المواقف الصعبة دي!
أوعدك إني ههزر في المواقف الصعبة والسهلة والمتوسطة كمان، عشان دي الطريقة الوحيدة اللي هعرف أثبتلك بيها إني بحبك، يالا بينا يا قمر، وخلينا نسيب النكد ده لأصحابه!
آية_عيسى
روايات_واسكريبتات_مميزة
