ومالك بقى قاعدة بوزك شبرين كدا ليه؟ فكيها شوية يا بنتي
ومالك بقى قاعدة بوزك شبرين كدا ليه؟ فكيها شوية يا بنتي، ده أنا حتى مهندس ومستقبلي زي الفل، والناس بتتحايل عليا بس أبصلهم، اضحكي كدا وريني سنانك يمكن ربنا يفتحها في وشك بدل التكشيرة اللي تقطع الخميرة من البيت دي!
- نعم؟ والناس تتحايل عليك ليه إن شاء الله؟ ماسك ليهم مفاتيح الجنة؟ وبعدين أنت مالك بوزي شبرين ولا مترين، أنا قاعدة كدا بمزاجي، ومحدش طلب منك تقيم ملامح وشي خالص، خليك في حالك وفي رسوماتك وهندستك اللي واكلة عقلك دي!
- يا ستار يا رب! ده أنتِ لسانك عايز مقص شجر، لا ده عايز لودر يشيله من مكانه.. أنا قولت أهزر معاكي عشان نكسر التلج اللي بينا ده، بس الظاهر إن دمك أنتِ اللي تقيل ومحتاج يتلين بشوية زيت من بتاع العربيات عشان يفك الصدأ اللي فيه!
- أنا اللي دمي تقيل يا أستاذ زين؟ ده أنت من ساعة ما دخلت وأنت مش وراك سيرة غير مشاريعك وشركاتك ومقاولاتك، وكأنك بنيت الهرم الأكبر ومحدش غيرك بناه.. دمك سم ومبقبلوش بصراحة، يا ريت تلم الدور وتوفر مجهودك ده لواحدة تانية تضحك على نكتك البايخة!
- سم؟ ولا متر؟ هقهقهقهق!
- ..............
- جرى إيه يا ليلى؟ ما تضحكي يا بنتي، النكتة دي بيضحكوا عليها في أرقى المواقع الهندسية اللي بشتغل فيها، دي نكتة "في آي بي".. بقى أنا دمي سم؟ أنا؟ ده أنا البنات بتموت في خفة دمي وبيمشوا ورايا في الشارع عشان بس
- خلصت؟ خلصت فقرة السيرك القومي بتاعتك دي؟ والله العظيم أنا ما شفت في برودك ولا في تناحتك، وبعدين "سم ولا متر"؟ ده إيفيه ده؟ هرجع والله إيه القرف ده ، دا أنت بني آدم بارد ومستفز!
- ما علينا وبعدين إيه "أستاذ" اللي بتقوليها كل شوية دي؟ أنا باشمهندس يا جاهلة! باشمهندس زين! الكلمة دي تسبق اسمي قبل ما تنطقي حرف واحد، أنتِ عارفة أنا تعبت قد إيه في الكلية دي؟ عارفة يعني إيه "رسم هندسي" و"خرسانة" و"تخطيط"؟ ، وبعدين تعالي هنا، أنتِ إيه اللي لابساه ده؟ ده ذوق ده؟
- جاهلة في عينك يا متكبر يا مغرور! باشمهندس على نفسك مش عليا، الهندسة دي في مكتبك هناك، إنما هنا أنت مجرد واحد رخم جيت في وقت غلط وقعدت قدامي غصب عني، وملكش دعوة بلبسي، ده أنضف من تفكيرك بكتير، ويا ريت بقا تلم الليلة وتمشي وتخلصني من الساعتين اللي شبه وشك دول، غور !
- أمشي؟ بالبساطة دي؟ ده أنا حتى مهندس! أنتِ فاهمة يعني إيه مهندس؟ يعني أى واحدة في الدنيا دي تتمنى بس
تبقي "مدام المهندس زين"، يعني واجهة وبرستيج وعز ومستقبل، وأنتِ بتقوليلي غور؟ هو أنتِ تطولي تمشي في ضلي حتى، ده أنا البدلة اللي لابسها دي تمنها يجيب نص عفش بيتكم!
- يا دي النيلة السودا! يا أخي غور بالشهادة بتاعتك وببدلتك
- أخرج؟ ده أنا هقعد وأربع هنا كمان.. ومستعد أجيب طقم الشاي كله وأقعد أسلي نفسي بيكي وبطول لسانك ده.. أنتِ لسه مشفتيش الوش التاني، ده أنا بشرف على عمارات وقصور وليا هيبتي في الموقع، هتيجي واحدة زيك بطول السنافر تطردني؟ أنتِ عارفة أنا مين؟ أنا لو شاورت بإيدي كدة ألف واحدة تجري ورايا وتقولي "شبيك لبيك يا باشمهندس"!
- هتكون مين يعني؟ وزير الإسكان؟ ده أنت بني آدم مستفز ومريض بالهندسة بتاعتك، ومستعدة أرميك من الشباك دلوقتي وأخليك تطبق نظريات الجاذبية عملي من الدور الرابع، بطل برودك ده بقا واطلع برا، أنا بدأت أفقد أعصابي وهتهور عليك بجد!
- جربي كدة تقربي، ده أنا مهندس يعني فاهم في الزوايا والأبعاد والسرعة والرد الفعلي، وهعرف أصدك كويس أوي قبل ما تفكري تهجمي.. وبعدين أنتِ قصيرة أصلا وأنا طولي طول نخلة، هتعملي إيه يعني يا شاطرة؟ هتشدي في بنطلوني؟ بلاش تتعبي نفسك وتطلعي طاقتك في الفاضي يا كتكوتة!
- شاطرة في عينك وكتكوتة في عينك يا رخم يا تنح ، بطل تعيش في وهم بقا دا انت وشك يقطع الخميرة
!
- وهم يا جمل.. هاااااام! هقهقهقهق!
- ..........
- جرى إيه يا ليلى؟ السكوت علامة الرضا ولا الصدمة من كتر خفة دمي؟ اعترفي إنك بدأتي تعجبي بالباشمهندس وذكاؤه الفطري.. قولي بقا إنك واقعة في حبي و وسامتى ، وشدي الكرسي واقعدي بدل ما أنتِ واقفة شبه عسكري المرور كدا !
- أنا ساكتة عشان مطلعش عليك غلي دلوقتي، بس بما إنك مصمم تستظرف وتفكر نفسك كوميديان وأنت أخرك تقف في طابور العيش، فاستحمل بقا اللي هيجرالك.. خد بقا المخدة دي في وشك ، يمكن تفوق من الوهم اللي أنت عايش فيه وتعرف إن الله حق!
- آه! يخرب بيت كدا! إيه ده؟ أنتِ بتحدفيني بمخدة الصالون في وشي؟ دي مخدة تقيلة جدا وكأن فيها حجر، ده أنتِ قليلة الذوق بجد ومعندكيش ريحة الإتيكيت، حد يرمي مخدة في وش باشمهندس جاي يخطب؟ ده أنتِ غشيمة بشكل!
- وأكتر من كدا كمان لو ممشيتش! اطلع برة يَالَا، مش عايزة أشوف وشك ده خالص، روح دورلك على واحدة تانية تترسم عليها بشهادتك وتبني معاها أحلامك دي ، يالا برا مش عايزة أسمع صوتك ولا أشوف طولك اللي فرحان بيه ده!
- طالع يا ستي، طالع ومن غير مطرود.. بس وحياة الهندسة اللي درستها والسهر اللي سهرته ما هسيبك، وهتشوفي المهندس زين هيعمل فيكي إيه عشان المخدة دي، مبروك عليكي النكد اللي هيجيلك بسببي عشان أنا مبنساش حقي، وسلام يا "جاهلة" يا أم لسان طويل!
- و اه نسيت
آية_عيسى
روايات_واسكريبتات_مميزة
