اتفضلي يا آنسة نور.. اقعدي شكرا يا فندم
-اتفضلي يا آنسة نور.. اقعدي.
- شكرا يا فندم.
- السي في بتاعك قدامي، خريجة بتقدير امتياز، لغات، كورسات برمجة، خبرة سنتين في شركة مالتي ناشيونال.. الكلام ده حقيقي؟
- طبعاً يا أستاذ رحيم، وتقدر حضرتك تتواصل مع الأماكن دي وتتأكد بنفسك.
- الـ "طبعا" دي ثقة ولا غرور؟
- دي دقة في البيانات اللي أنا مقدماها.
- تمام.. اشتغلتي قبل كدا تحت ضغط؟
- الشغل كله ضغط، وأنا بعرف أدير وقتي كويس جدا.
- إحنا هنا مابنديرش وقت، إحنا بنحرق وقت.. يعني ممكن تلاقي نفسك مطلوبة في أي وقت عشان تخلصي تقرير، عندك مانع؟
- لو ده في مصلحة الشغل وفي حدود الاتفاق، مفيش مشكلة.
- إجابة دبلوماسية.. قوليلي، إيه اللي يخليني أقبل نور وأرفض العشرة اللي برا؟
- لأني مش بس هعمل المطلوب مني، أنا هطور في السيستم اللي حضرتك شغال بيه، وعندي رؤية مختلفة للسوق.
- رؤية؟ إنتي عارفة حجم الشركة دي قد إيه؟ إحنا بقالنا ٢٠ سنة في السوق، جاية إنتي في يوم وليلة تعدلي علينا؟
- السوق بيتغير كل يوم، واللي مبيطورش بيموت، وحضرتك أكيد عارف ده كويس.
- طيب.. لو قولتلك إن المرتب اللي إنتي كاتباه ده مبالغ فيه جدا بالنسبة لسنك؟
- المرتب ده مقابل المجهود والقيمة
- لسانك طويل شوية يا نور.
- دي صراحة ومواجهة، مش طولة لسان.
- مش ملاحظة إنك واثقة أوي في نفسك يا نور؟
- الثقة دي هي اللي وصلتني إني أبقى واقفة قدام حضرتك النهاردة في المكان البيئة ده.
- مش ملاحظة إنك مش متربية يا نور؟
- التربية هي اللي مخلياني صريحة ومحترمة لنفسي ولقدراتي، مش مجرد "موظفة" بتهز دماغها وخلاص.
- مش ملاحظة إنك عايزة قلم يا نور؟
- القلم اللي حضرتك تقصده ده أكيد هيكون قلم توقيع على عقد تعييني، عشان خسارة الشركة تضّيع واحدة زيي.
- كفاية كدا يا نور ونرجع لموضوعنا بدل ما أخلي في وشك عاهة مستديمة.
-تمام يا فندم.
- بقولك هو إنتي لابسة النضارة دي عشان شايفة إننا مش قد المقام ولا دي برستيج الموظفة العبقرية؟
- النضارة عشان أشوف الأخطاء الهندسية اللي في ديكور المكتب ده كويس، وحضرتك لو ركزت هتلاقي إن الإضاءة هنا محتاجة مهندس بيفهم مش مجرد عفش غالي وخلاص.
- مهندس بيفهم؟ ده أنا اللي مصمم المكتب ده بنفسي ياللي لسانك عايز قصه، يعني بتقولي عليا مابفهمش في مكتبي؟
- أنا بقول إن العبرة بالنتيجة، والنتيجة إن عيني وجعتني من أول خمس دقايق، فما بالك لو اشتغلت هنا ٨ ساعات؟
-
- ومين وليد ده كمان؟ حضرتك الذاكرة عندك فيها تداخل في الأسماء ولا ده تأثير ضغط الشغل اللي حضرتك قولت عليه؟
وليد ده ابن خالتي المتربي زيادة عن اللزوم اللي دايما يصدعني بالبروتوكول والنظام، وإنتي طالعة نسخة منه بس على "دبش" شوية، المهم سيبك منه، قوليلي بقا، إنتي بتعرفي تعملي قهوة ولا آخرك تقطعي ورق وتعدلي على أسيادك؟
- أنا جاية اشتغل مهندسة برمجة ومطورة سيستم، مش جاية أفتح كافتيريا، القهوة دي وظيفة البوفيه يا فندم.
- بوفيه؟ لا ده إنتي عايزة تتنفخي بجد، يعني كمان بتتعالي على القهوة ؟ ده أنا مابشغلش عندي حد مابيعرفش يظبط الوش، والوش بتاعك ده عايز صنفرة بصراحة !
- أنا مش جاية أخدمك هنا يا فندم، و بعدين وشي عاجبني، والبرمجة اللي هعملها للشركة هي اللي هتظبط وش الأرباح بتاع حضرتك اللي نازل الأرض ده.
- نازل الأرض؟ إنتي شكلك جاية تهزري، قوليلي إيه رأيك في لون الحيطة ده؟
- كئيب، ومحتاج يتغير للون يفتح النفس، عشان الموظفين مايجيلهومش اكتئاب وهما بيبرمجوا، وحضرتك واضح إن ذوقك كلاسيك زيادة
- كلاسيك؟ ده أنا مودرن أكتر من الموبايل اللي في إيدك ده، بس إنتي اللي دقة قديمة في لسانك ده، و عموما أنا صبري بدأ يخلص وقربت أتهور وأرميكي من الشباك ده وأشوفك وإنتي بتطبقي نظريات الجاذبية عملي!
- الشباك مأمن بحديد، وحضرتك مش هتقدر، وبعدين الشركة هتخسر كتير أوى لو جرالي حاجة، فإهدى كدة وخلينا في المهم.
- ااااه يا واد يا رحيم، بقولك السي في بتاعك فيه ثغرة غريبة جدًا.
- ثغرة إيه؟ أنا مراجعة كل كلمة فيه يا فندم.
- أنا بقولك ناقص حاجة جوهرية، ومن غيرها السي في ده يترمي في الزبالة أصلا.
- هو حضرتك بتغمز ليه؟
- لا ابدا عيني دخل فيها تراب.
- المهم، إيه هى الحاجة دي؟
- رقم موبايلك.
-حضرتك بتقول إيه؟ أنا ست محترمة وجاية أقدم على وظيفة مش عشان حضرتك تطلب رقمي الشخصي بالطريقة دي!
- جرى إيه يا آنسة؟ هو أنا قولتلك هاتي رقمك عشان اقولك وحشتيني ؟ ده أنا باشمهندس ورئيس مجلس إدارة الشركة، يعني لما أطلب رقمك يبقى عشان مصلحة الشغل والبيانات الجوهرية اللي ناقصة عندي دي، وبعدين إنتي فاكرة إني فاضي؟ ده أنا جدولي مليان اجتماعات لوش الصبح، بس رقمك ده لازم يكون معايا عشان هكلمك بكرة الصبح بنفسي.
- ليه؟
- عشان
- إيييييه!!!!
تمت
