انزلي يا آنسة.. انزلي عندك هنا آية عيسى
انزلي يا آنسة.. انزلي عندك هنا!
في إيه يا فندم؟ هو أنا كنت ماشية عكسي ولا قتلت حد وأنا مش واخدة بالي؟
الله الله.. ده الأستاذة بتستظرف كمان؟ إنتي كنتِ ماشية على ١٤٠ يا آنسة، يعني فاضلك تكة وتخبطي في القمر الصناعي، إيه كنتِ بتجري ورا أحلامك اللي بتضيع ولا إيه؟
أحلامي موجودة والحمد لله يا باشا ، بس الطريق كان فاضي والعربية هي اللي بتجري لوحدها، وبعدين ١٤٠ دي سرعة عادية جدا في بلاد تانية، حضرتك اللي مكبّر الموضوع بزيادة.
بلاد تانية؟ لا يا ظريفة، إحنا هنا على المحور مش في أوتوبان ألمانيا، وبعدين العربية بتجري لوحدها دي تقوليها في برنامج عالم الحيوان مش قدام رائد في المرور.. هاتي بطاقتك ورخصك كدا وورينا المواهب.
اتفضل، بس يا ريت بسرعة عشان ورايا شغل وحالات مستنية.
حياة.. دكتورة؟ والله ما باين عليكي خالص، أنا قولت شكلك مشردة وهاربة من تنفيذ أحكام، أو يمكن شغالة دُب في السيرك وبتخوفي الناس، يا أم لسان عايز قصه.
نعم؟! مشردة وشغالة دُب في سيرك؟!!؟! حضرتك ده لبس سكراب طبى لو متعرفش، وبعدين المظاهر خداعة، زي ما حضرتك كدا لابس بدلة ميري بس لسانك محتاج أشعة مقطعية عشان نعرف العيب فين بالظبط.
لسانك طويل يا حياة، وباين إن الطب مأثر على أعصابك.. قوليلي بقا، الدكاترة اللي زيك بيعالجوا الناس ولا بيجلطوهم ببرود الدم ده؟
بنعالج اللي يستاهل، واللي مبيفهمش بنكتبله على مهدئات عشان يبطل يرخم على خلق الله في الشوارع.
طب لسانك الطويل ده ميعرفش إن الرد ده ممكن يبيتك في التخشيبة النهاردة بتهمة إهانة موظف عام؟
وإهانة ذكاء دكتورة قمر محترمة ماشية في حالها دي مفيش عليها عقوبة في القانون؟
ذكاء دكتورة قمر؟ استغفر الله العظيم، اللهم طولك يا روح، لا في قانوني أنا العقوبة بتبقى فورية وعملية جدا، وإنتِ شكلك محتاجة تأديب..
تميم حط إيده على المسدس اللي في جنبه بضيق
مالك في إيه؟ حضرتك هتضربني بالنار عشان قولت الحقيقة ولا ده استعراض قوة؟
لا أبدا، ده المسدس تقيل بس على جنبي فكنت بعدله، إنتي خيالك واسع أوي وشكلك متأثرة بأفلام الأكشن.
خيالي واسع عشان شايفة واحد واقف بيتهم دكتورة بالسرعة عشان مستعجلة على شغلها؟
شغل إيه ده اللي يخليكي تعرضي حياة الناس للخطر؟ هو إنتي بتخترعي علاج للبرد وإحنا مش عارفين؟
أنا دكتورة جراحة، يعني الثانية الواحدة عندي بتفرق في حياة إنسان، وحضرتك واقف هنا بتضيع وقتي في
الجراحة دي محتاجة ثبات انفعالي، وإنتي أعصابك سلك عريان ومحتاجة اللي يربطها بشوية قوانين مرور.
يعني حضرتك شايف إن سحبي للمشرط في العمليات محتاج ثبات أقل من سواقة العربية في طريق فاضي؟
المشرط لو فلت منك هيموت واحد، لكن عربيتك لو فلتت هتموت شارع كامل، فبلاش فلسفة جراحين على الصبح.
الفلسفة دي هي اللي بتخلينا نتحمل الشخصيات المستبدة اللي بنقابلها كل يوم برا المستشفى.
مستبدة؟ ده أنا مفيش أطيب مني، بس حظك الفقر إنك وقعتِ في كمين الطيب وهو موده مش تمام.
والسر في المود المش تمام ده إيه؟ السهر في الشغل أثر على نفوخك؟
نفوخي سليم وزي الفل الحمد لله ، بس لسانك ده هو اللي عايز بتر جراحي عشان الناس تمشي في أمان.
القوانين أنا عارفاها كويس، بس الروح اللي ورا القانون بتقول إنك تقدر تعدي الموقف لو مفيش خطر حقيقي حصل.
الروح دي تطلعيها لما تيجي تموتي ، هنا فيه أسفلت وفيه مخالفة وفيه رائد مش بيحب حد يعدل عليه.
حضرتك مش رائد فضاء يعني عشان مفيش حد يعدل عليك، إنت في الآخر بشر وبياخد ويدي في الكلام عادي.
أنا فعلا باخد وبدي، بس اللي بياخد معايا بزيادة بيخسر في الآخر، وإنتي بدأتِ
والصبر ده له ليميت معين يعني؟ ولا حضرتك مركب له عداد زي الردار اللي لقطني؟
عداد صبري أسرع من الردار، ف ياريت تهدي كدا عشان المحضر ميبقاش محضرين.
اللهم طولك يا روح ، حاضر يا فندم !!!
بيلين تميم صوته فجأة وبيهدي نبرته
طيب بصي يا آنسة حياة، أنا عايز أقولك على حاجة مهمة بصراحة..
خير يا سيادة الرائد؟ في مصيبة تانية ولا العربية فيها قنبلة؟
لا مفيش قنابل، بس بعد كدا لما تحبي تطيري، ابقي ركبي جوانح للعربية عشان متبوظيش الأسفلت، وبعد كدا كمان حاولي تفتكري إنك دكتورة مش سواقة ميكروباص.
تمام يا سيادة الرائد، نصيحة غالية هحطها في عينيا، ممكن أمشي بقا ولا لسه في محاضرات تانية؟
يا عسكري! يا عسكري تعال هنا.
عسكري ليه؟ مش حضرتك قولت خلاص.
أبدا، أصله واحشني وعايز أديله حاجة كدا ملهاش لازمة وواقفة سادة الطريق علينا.
آه تمام، كلك ذوق والله.
تمام يا فندم! تؤمر بحاجة؟
خد شوال البطاطس ده ارميه في الحجز، مش ناقصين قرف على الصبح وضغط دم يعلى!
نعم!!!!!! شوال بطاطس؟! حضرتك بتكلم مين؟ أنا الدكتورة حياة يا سيادة الرائد!
مسمعتش.. العسكري هيسمعك كويس في الحجز، اتفضلي قدامي
آية_عيسى
روايات_واسكريبتات_مميزة
