مريم يا مريم يا بنتي ردي عليا، الشاحن فين
مريم يا مريم يا بنتي ردي عليا، الشاحن فين؟ يا مريم هانم!
- .......
لا دي شكلها انطرشت رسمي، أو لَبست سماعات وناوية تجلطني.. يا مريم إنتِ فين؟
* أحمد دخل الصالة وهو بيبرطم، وفجأة مخدة فايبر حجم عائلي نزلت ركنت على وشه بكل قوة :
- آآآه! يخرب بيتك إيه ده؟ إنتِ بتنشني على قفايا يا مريم؟ ده أنا كنت لسه بنادي عليكِ !
- إنت ليك عين تكلمني؟ ولا ليك عين تنادي عليا أصلاً؟ إنت المفروض تدخل البيت ده زاحف و موطي راسك يا أستاذ أحمد!
- ليه عليا تا.ر ؟ مالك بس يا بنتي في إيه؟ إيه اللي حصل لكل ده؟ أنا لسه داخل من الباب ملحقتش أقول يا هادي !
*مريم قعدت على الكنبة وفجأة انفجرت في العياط، أحمد اتخض ورمى المفاتيح من إيده وجري عليها :
- مالك يا حبيبتي؟ اهدي بس كدا وقوليلي في إيه؟ حد كلمك؟ حد ضايقك؟ اهدي يا مريم متوقعيش قلبي !
- إنت كداب.. وغشاش.. وبتاع كلام.. وأنا اللي كنت فاكرة إني متجوزة راجل حنين وبيشيلني في عينيه، طلعت متجوزة واحد معندوش ريحة الدم ولا بيفتكرلي حاجة، وبيهتم بالقهوة وصحابه والماتشات أكتر ما بيهتم بيا وبالبيت وباللي فيه، إنت بجد خيبت ظني فيك يا أحمد، أنا مش قادرة أصدق إنك بالبرود ده!
- إيه! إيييييييه! بس يا حاجة، اهدى كدا وصلي على النبي، ده فاضل شوية وتطلبيلي البوليس وتلبسيني قضية ! خير يا حاجة مالك يا هبلة؟
- إنت كمان بتقول لي يا هبلة؟ فوق
- خيانة إيه ونسيان إيه؟ وبعدين كل اللي همك في كلامي كلمة "هبلة"؟ أمال القطر اللي نزل على وشي من شوية ده يطلع إيه؟ ده أنا عيني لسه بتزغلل من المخدة! المهم انطقي بقا واخلصي.. مالك يا فقر؟
- عايز تخلص مني للدرجة دي؟ أنا تقيلة عليك ووجودي في البيت مضايقك؟ ماشي.. طلقني يا عمر!
- نعم يا ختي؟ طلقني يا مين؟ مين عمر ده يا مريم؟ أنا أحمد يا حبيبتي، أحمد جوزك اللي لسه واخد مخدة في وشه من دقيقتين!
- متاخدش في بالك ده إيفيه ، وبعدين إنت بتركز في الأسماء وسايب أصل المصيبة؟
- آه تمام، إيفيه.. ماشي يا ست إيفيه، مالك بقا يا بت اخلصي قولي في إيه عشان خلاص فاضل شوية و اولع في نفسي !
- مش قايلة.. وطلقني بجد بقا يا أحمد عشان أنا كرهت العيشة دي!
- يا ريت!
- إييييييه؟ بتقول يا ريت يا أحمد؟ إنت كنت مستني الكلمة دي؟
- ولا حاجة، كملي عياطك يا مريم كملي، أنا اللي جنيت على نفسي وفتحت معاكي حوار.
- شوفت؟ حتى مكسل تراضيني، حتى مش عايز تعرف أنا زعلانة من إيه، الاهتمام مش بيطلب يا أستاذ، بس تقدر تقولي يا فهلوي، انهاردة إيه؟
*أحمد سكت وبدأ يفكر بعمق والتوتر ظهر على وشه :
- انهاردة؟ النهاردة الأربع.. باينة خالص يعني، الاتنين فات و التلات برضو و انهاردة الأربع، فيها إيه دي؟
* بصوت عالي زلزل البيت:
- ما شاء الله على ذكائك
*بدأ العرق يظهر على جبهته وبدأ يفرك في إيده :
- احمم.. يكونش عيد تحرير سيناء؟
- إنت أهبل يا أحمد؟ هو أنا هفكر في عيد تحرير سينا ليه؟ وبعدين التحرير كان الشهر اللي فات، إنت عايش في "لالا لاند"؟ بلاش هبل وفكر بجد!
- طيب.. ذكرى أول ساندوتش حواوشي أكلناه سوا في السيدة؟ لا بلاش دي.. يكونش عيد ميلاد خالتك "إنصاف"؟
- طبعاً.. ما الاهتمام مش بيطلب، وعمرك ما هتعرف لوحدك، لازم أذل نفسي عشان تفتكر أهم ذكرى في البيت ده!
*أحمد فقد أعصابه تماماً وقام كتم بقها بإيده عشان تبطل كلام :
- اخلصي يا بت وقولي، انهاردة إيه وإلا هرمي نفسي من البلكونة وأخلص من الفوازير دي!
*شالت إيده ، و قالت :
- و كمان عايز تمو.تنى !!!!! ، الحقيني يا خالتي شوفي ابنك المجر.م !
بص لها بصدمة و قال :
-هو انتِ يا بت جايبة طاقة النكد دي كلها منين ، انتِ فيكِ صحة للكلام ده ؟
- الله أكبر في عينك يا حسود !
-هحسدك على إيه يا حسرة ! اخلصي يا مريم هتقولى و لا اروح اتخمد يمكن اموت احسن و ارتاح منك !
وبصت له بكل فخر واعتزاز :
- النهاردة عيد ميلاد "أم صبري" القطة بتاعتي! بقالها سنة منورة حياتنا وإنت ولا هنا، ولا فكرت تجيب لها تونة مستوردة، ولا حتى كلفت خاطرك تقول لها "كل سنة
* أحمد بصلها بهدوء غريب جدا ً، هدوء "ما قبل العاصفة"، وبدأ يجز على سنانه لدرجة إن صوت سنانه كان مسموع :
- والله؟ عيد ميلاد القطة؟
- اه والله.. شوفت فعلاً أنا مش مهمة عندك، ولا أم صبري مهمة عندك، ولا أي كائن حي في البيت ده مهم عندك، صحابك والقهوة هما المهمين، و أم صبري المسكينة قاعدة حزينة ومستنية تورتة السلمون ، وإنت داخل تسأل على الشاحن!!!!
*أحمد فجأة مسك المخدة اللي وقعت على الأرض وهبدها على الكنبة بكل غله :
- وعزة وجلالة الله.. أنا داخل أنام، لو سمعت حسك في البيت، أو سمعت "مياو" واحدة من أم صبري، هعمل منك ومنها.. مستاردة! سمعتي يا بت؟ مستاردة!
- إيه مستاردة دي؟ تقصد "مستردة" اللي هي الصلصة الصفراء؟
- أيوة هي دي يا زفتة، ههرسكم هرس عشان تطلعوا "صوص"، سمعتي؟ أنا مش ناقص شلل على المسا، غوري من وشي يا مريم إنتي والقطة بتاعتك!
--و بعدين تعالي هنا انا بقالي سنة مش مستوعب ! ، فيه قطة اسمها ام صبري ؟ ، ليه مطلقة و معاها ١٥ عيل بتصرف عليهم ؟!؟!؟!
-- ملكش دعوة روح اتخم... اقصد روح نام ! مش انت عايز كدا ؟ و لا هو نكد و خلاص ؟
* أحمد سابها ودخل الأوضة ورزع الباب وراه، ومريم فضلت واقفة بتبص للقطة بانتصار :
- شوفتي يا أم صبري؟ قولتلك إنه نسي، بس أديكي شوفتي شخصيتي القوية وهيبتي في البيت!
* أم صبري بصت لها ببرود وكملت
آية_عيسى
روايات_واسكريبتات_مميزة
