مدرس العربي الفصل الثالث
مدرس العربي الفصل الثالث
فتحي قال له طب وهتعمل ايه دلوقتي، ريان قال له معرفش، بس ده ابني ولازم اعوضهم عن كل اللي فات، وانت لازم تساعدني ارجع لنور تاني.
تاني يوم في المدرسة ريان بقى مهتم بفاروق زيادة عن اللزوم، بيجيب له كتب وبيسأله عن مذاكرته وبيهزر معاه، فاروق اتعلق بيه جدا وبقى يقول لمامته انا بحب مستر ريان اوي يا ماما زي ما بحبك، نور كانت بتسمع الكلام ده وقلبها بيتقطع، هي عاوزة تبعد فاروق عنه عشان متتعلقش تاني وتتوجع تاني بس مش قادرة تحرم ابنها من ابوه.
شهد اختها قالت لها اديله فرصة يا نور، اسمعي منه، يمكن فعلا كان مظلوم، دارين امها كمان قالت لها نفس الكلام، قالت لها يا بنتي انا عارفة انك شفتي الويل لوحدك بس الراجل شكله شارب المر زيك ويمكن اكتر، وربنا بيسامح يا بنتي.
نور قررت تسمعه، قابلته في كافيه على البحر نفس الكافيه اللي كانوا بيقعدوا فيه زمان، ريان حكى لها كل حاجة بالتفصيل من اول يوم جم هددوا ابوه لحد ما رجع، وطلع لها ورق يثبت كلامه ومحاضر البوليس اللي كانت معمولة، نور فضلت تعيط وهي بتسمعه وقالت له طب ليه مقولتليش، ليه سيبتني اتعذب كل ده، قال لها كنت صغير وخوفت، ابويا قال لي لو بتحبها بجد ابعد عنها عشان تعيش، وانا سمعت كلامه عشان كنت فاكر اني بحميكي.
نور قالت له انت حميتني من الناس بس موتني من جوايا، انا كنت بموت كل يوم وانا شايلة ابنك في بطني لوحدي والناس بتبص لي بصة وحشة، ريان باس ايدها وقال لها حقك عليا، اديني فرصة اعوضك انتي وفاروق، انا لسه بحبك زي اول يوم شفتك فيه ويمكن اكتر، وعمري ما حبيت غيرك.
نور سكتت شوية وبعدين قالت له انا مش عارفة، انا محتاجة وقت، ريان قال لها خدي كل الوقت اللي انتي عاوزاه بس متبعديش فاروق عني، انا محروم منه بقالي تسع سنين.
ومن ساعتها ريان بقى بيجي ياخد فاروق من المدرسة ويذاكر له ويخرجه، وفاروق بقى طاير من الفرحة ان عنده اب تاني غير مامته، وفي يوم فاروق تعب جامد وجاله سخونية عالية ونور اتصلت بريان وهو جه جري خده على المستشفى وفضل سهران جنبه طول الليل، نور وهي شايفاه شايل ابنها وخايف عليه كده قلبها رق، حست انها لسه بتحبه وان عمرها ما بطلت تحبه.
دارين في الفترة دي كانت تعبانة وبتتابع مع دكتور وكل يوم حالتها بتسوء شوية، وكانت كل ما تشوف ريان مع فاروق تدعيله وتقول لنور يا بنتي الولد ده اصيل وبيحبكم، اوعي تضيعيه من ايدك تاني، وشهد كانت بتاخد فاروق وتخرجه مع فتحي عشان تدي فرصة لنور وريان يقعدوا لوحدهم ويصفوا اللي بينهم، وفتحي كان بيقول لريان انت لازم تثبت لها انك اتغيرت وبقيت راجل يعتمد عليه، مش بس بالكلام بالفعل.
