الفصل الاول انتِ بتنامي على الأرض ليه يا رحمه
الفصل الاول
انتِ بتنامي على الأرض ليه يا رحمه ؟ أنتِ قرفانه مني؟
اتكلمت بتردد - لأ أنا بتعب .
ردّ وهو مَصدوم - منّي !.
في الحقيقه إني أنا ووَليد اتجوزنا تاني يوم العيد ومَعداش على جوازنا يومين فبدأ يلاحظ تَصرفاتي الغريبه .
نزّل من على السرير وقَعد جنبي هو وبيبص للفرش اللي على الأرض والمخدات والكوفرته - طيب فهميني أنا مش فاهم.
- وَليد أنتَ اتجوزتني ليه؟
لسه هيردّ قاطعته .
- بالله عليك قول الحقيقه وبَس وفكّر قبل ما تتكلم.
اتنهد وسكت شوية كان بيفكّر وبعدين اتكلم - لأنك الوَحيدة اللي هتصونني وتصون شرفي وعَرضي في غيبتي قبل حضوري.
ابتسمت - ليه ؟ مَهو فيه بنات كتير بنات أصول و...
قاطعني وهو بيمسك أيدي - بس لما تجتمع الطيبة وجمال الأصل في واحدة ست فَده شئ من النوادر وأنتِ نادرة يا رَحمة.
ابتسمت وقلبي رقص من جمال كلامه ورَاضاني بكلمتين سي الأفندي ، راضى قلب ست متعرفش حاجه في الدنيا غير إنها تحب .. تحب الغيم والمطر ، تحب الشجر والخُضرة ، تحب الهدوء والكتب و.. الأهم إنها تحبه هو .. ورَحمة بتحب وَليد .
- أنا مش بحبك يا وَليد .
مَحستوش انصدم ولا كَرامته نَقحت عليه زيّ ما ممكن أي راجل مكانه كان يعمل ويقوم يضربني قلمين .
- أممم سهله أنا هخليكي تحبيني .
ضحكت وأنا بظبط المخدات علشان أجهز نومتي - واثق أوي أنتَ.
سَحبني من دراعي فخبطت في صدره وأنا دراعي ورا ضهري .
- واثق أوي أوي ، عارفه ليه ؟
دَقات قلبي كانت عنيفة لدرجة حَسيته هيدق يدق ويقف مره واحده ، حاولت أطلّع صوتي واتكلمت بصوت خافت - ليه ؟
ابتسم وهو مستلذّ وبيراقب انفعالاتي وتوتري في قُربه وتلعثمي في الكلام .
- لأن قلبك قلب بِكري وشرف ليا أنا إني أدخله فهعمل المُستحيل علشان أتربع على عرشه ، أنا وبَس ، بَس يا رَحمه .
قال آخر جُملة هو وبيهمس جنب وِدني وهنا حَسيت إن حصوني انهارت وهقع بين أحضانه والبنت العنيدة القوية هتنهزم أسر كَلماته.
ابتسمت وأنا ببعد وبحاول أرجع لشوية ثبات كانوا هما سبب قوة شخصيتي - يعني أي قلب بِكري؟
- يعني مَسبقش وداق حلاوة الحُب ولا سبق ودخل علاقة وفشل فيتلوث القلب بالفُراق ، قَلبك قلب طفل صغير بيتعلم ويشوف أول خطواته تجاه الحُب ونفسه في يوم يعيشها .
- تفتكر ليه لحد الآن أنا فعلاً مَحبيتش؟
- يمكن مَلقيتيش الشخص المُناسب!
ضحكت بس كانت ضحكتي استهزاء ، مَكنتش عاوزه أرضيّ غروره كراجل في اللحظه دي وإنه الشخص الواو اللي رَفضت الكل علشانه حتى لو هو بالفعل كان كده !
- وتفتكر كل اللي جربوا الحُب كان الشخص اللي معاهم مُناسب ؟ لو كان زيّ ما بتقول مكانش هيبقى فيه فُراق وانفصال عن اللي بيحبوهم ، كل الحكاية حكاية وَقت وبيكتشفوا فيها إنهم ضيعوا وَقتهم واستنذفوا مَشاعرهم مع شخص غير مناسب والأهم إنهم عرفوا إن لا طاعة لمخلوق في مَعصية الخالق.
عيونه لَمعوا ونظرة الانبهار كانت ظاهرة في عينيه - حَبيت إجابتك ، طيب برضو مَقولتيش ليه مرتبطتيش؟
- لأني مَملكش في الدنيا إلا قلبي وقلبي عزيز لا يأخذُه إلا عزيز يا وَليد .
مَقدرش يخفي نظرة إعجابه ولا إني عِليت إزاي في نظره بعد إجابتي وفهمه لتفكيري ، ولأني دارسه ال Body Language قَريته والأهم فهمت بيدور أي في دماغه وسابقاه بخَطّوة.
- تسمحيلي أكون العزيز اللي نال شرف الحصول على قَلبك ؟
ابتسمت وأنا بجاوبه - فُرصتك أقوى من غيرك ، هما حاولوا ياخدوا قلبي بس مَكنتش بفتحلهم بابه لأنه كان حرام.
- طيب وأنا ؟
غمزتله وأنا بجاوبه - وهل حُب الزوجه لزوجها حرام يا وَليد ؟
ضحك زيّ العيل الصغير مش في سذاجته على قد ما فرحته طَبطَبت على قلبي ورَاضته وإني أميرة وقلبي مياخدوش إلا مَلك عَفي وحُر والأهم إن قَلبه يكون عَفيف عن حُب كل النساء إلايّا.
