إسكريبت عشوائي رقصة واحدة رَوَانْ سَالِمْ مُحَمَّدْ
إسكريبت_عشوائي
رقصة_واحدة
رَوَانْ_سَالِمْ_مُحَمَّدْ
ـ أنا قررت أشتغل رقاصة.
ـ تمام.
ـ تمام؟؟
ـ أيوا.
ـ هو إيه اللي أيوا؟ أنت موافق عادي؟
ـ مش أنتِ عايزة كدا؟
ـ أيوا ولعلمك مش هسمحلك تمنعني.
ـ أمنعك ليه؟ براحتك عادي.
ـ اه براحتي طبعًا.
ـ...
ـ على فكرة هلبس بدلة رقص.
ـ ما أكيد رقاصة بتكون ببدلة الرقص.
ـ وهرقص قدام رجالة تانين.
ـ أنا واثق فيكِ.
ـ وهرقص معاهم كمان.
ـ تمام.
ـ وهنكون قريبين من بعض.
ـ ما دام ده جزء من الشغل.
ـ وممكن واحد منهم يعجب بيا.
ـ وارد.
ـ وممكن أنا كمان يعجبني واحد منهم.
ـ جايز بردو.
ـ يعني لو حد حاول يقرب مني مش هتعمله حاجة؟
ـ هعمل طبعًا.
ـ إيه؟
ـ هطلب منك تبعدي عنه.
ـ بس؟
ـ أيوا.
ـ مش هتتخانق معاه؟
ـ أنتِ عيزاني أتخانق؟
ـ لا طبعًا، أنت كدا هتبوظلي شغلي.
ـ تمام مش هتخانق.
ـ أنت مش بتغير عليا؟؟
ـ لا بغير.
ـ أمال إيه الهدوء ده كله؟
ـ مش أنتِ عايزة كدا؟
ـ أيوا.
ـ خلاص براحتك.
ـ يعني أنت مش غيران؟
ـ قلتلك غيران.
ـ مش باين.
ـ أعمل إيه طيب عشان يبان؟
ـ أنت مستفز جدًا على فكرة.
ـ عارف.
ـ أنا كنت مستنية منك تقول مستحيل تشتغلي كده.
ـ وأنا كنت مستني تكملي الخناقة عشان تقوليلي إن الأكل اتحرق كالعادة ونطلب أكل من برا.
ـ أنت عرفت منين؟
ـ مش عارفك أول امبارح أنا... بعدين رقاصة إيه بالنقاب؟
ـ راحت مني دي.
ـ ما علينا... بيتزا ولا كريب؟
ـ هاتلنا واحدة بيتزا وواحد كريب ونقسم سوا.
ـ عيوني.
ـ ومتنساش حاجة ساقعة دايت وتكون مش مقاطعة.
"ومتنساش تصلّي على النبي ﷺ وتذكر ربنا، لعلّها تكون حسنةً تظلّ في ميزان حسناتنا" ♥
وبس... كدا تكون الحكاية خلصت ♡
لو الإسكريبت عجبك، سيبلي رأيك في التعليقات؛ بحب أقرأ آراءكم وانطباعاتكم عن كل حكاية.
ولو دي أول حكاية تقرأها ليا، متنساش تتابع الصفحة عشان متفوتكش الحكايات الجديدة 🤎
وتاخد لفة صغيرة في الإسكريبتات القديمة، يمكن تلاقي بينها حكاية تعجبك. 🤎
تمت
إسكريبت_عشوائي
رقصة_واحدة
رَوَانْ_سَالِمْ_مُحَمَّدْ
