ابن حميدو الفصل الاول بقلم محمد منصور حصريه وجديده

انت تافه يلا
محمد 
ما بقاش الا انت كمان يا ابن حفيدو
عبده
اطلع برة ياة بدل ما اديك بالشبشب علي دماغك واعمل لك معاملة البرص
محمد 
لا بقي انا كدة اتهزقت اوي وانا ما حدش يهزقني الا استاذي محمود حميدة
عبده ادي له طهرة وكمل وقال
الخطة هتمشي كدة
هنا وسيم قال
انا شايف انكم هتحتاجو عربية في خطتكم وبما اني انا الوحيد اللي معايا فيات فسدقي ف هحب اكون معاكم
عبده بص له وقال
اصيل يلا تعالي معانا يا ابو الفيأت الفستقي 
انضم لهم وسيم فقال عبده
ما جربتش تخليها فيأت بندقي
وسيم 
فكرت فيها لكني لقيت نفسي هدفع كتير انت عارف كيلو البندق بكام دلوقتي و البستاشيو بقي ترند
عبده 
والبستاشيو ماله بالبندق
وسيم 
مش البستاشيو بيتعمل من البندق
هنا حجاج ضحك بهطل وقال
يا حمار البستاشيو بيتعمل من قشر اللب الابيض
وسيم 
ازاي يا كلب المعيز و البستاشيو لونه اخضر
حجاج 
ما انت لو مصيت جلده اللب الابيض بتتحول اخضر برسيمي وبعد كدة يعصرو الجلد ويبقي بستاشيو برسيمي
عبده احول من العبقرية وقال
الله اكبر عليك مش مصر فيها الدحيح غذي مخنا بالمعلومات اللي عليها قيمة انت بقي الفشيخ اللي معلوماتك هدخل الرطوبه دماغنا ونعفن
حجاج بص ل وسيم وقال
شوفت يا بقرة حمزة ازاي قدرت ابهره وبقيت الفشيخ
عبده كان هيضربه لكنه مسك نفسه وقال
بقول اية نخلينا في الخطة احسن
شيماء 
واية هي الخطة
عبده بص لها وبص ل سعيد
زفه كبيرة وعروسة وعريس
الكل استغرب وقال سعيد
ومين العروسة والعريس
عبده 
انتم
سعيد 
تاني
عبده
زعلان
سعيد اللي كان هيعيط من الفرحة
خالص لكن ابننا هيكون فين وقتها
بص عبده ل وسيم وابتسم صرخ وسيم وقال
لا انا ما قعدش مع عيل عايز يروح
عبده 
دة مش هيقعد معاك وبس دة كمان هيبات عندك اول ليلة دي
وسيم 
حرام دي عيل زنان زن ،،،،،،،،
وبعدها بكام يوم وبالتحديد ليلة الخميس ومن قدام العمارة اللي فيها الشقة كانت في زفة كبيرة العريس سعيد والعروسة شيماء وكانت فيحاء لابسة نفس فستان شيماء وماشية جنبها بصت لها شيماء وقالت
انا مش قولت لك غيري الفستان دة
فيحاء 
ما اقدرش البس حاجة غير اللي انتي لابساها
شيماء 
يا بنتي الناس في المنطقة يقولو اية العريس بيتجوز اتنين في نفس الوقت
فيحاء
وهو انا في حلاوتك ولا في جمالك علشان اتجوز جوزك
وفي وقت الزفة والفرحة والزغاريط يظهر عبده راكب علي موتوسيكل بتاع دليفري اجره من صاحبه وكان واقف مع بواب العمارة وبيقول له
فرح دة ولا اية
البواب اللي كان مركز زيه زي بقيت اهل المنطقة اللي واقفين في الشبابيك
ايوة فرح
وبعدها بص البواب ل عبده من فوق ل تحت وقال
هي القطة كلت بيضها ولا اية ازاي تتكلم معايا وانت قريب مني اوي كدة
عبده وهو بيفتح صندوق الدليفري وطلع علبه بيتزا
هو انا يعني بتكلم مع سفير النوايا الخشنة دة انت بواب
البواب 
اني حارس عقار وبحكم شغلي احب اعرف انت رايح فين بالخريب دة
عبده 
خريب
البواب 
ايوة خريب اللي بيتحشي جبن وساعات لحوم
عبده 
يخرب بيتك انت كل دة بتتكلم عن الكريب
البواب 
ايوة هو الخريب دة رايح بي فين
عبده 
دي بيتزا و داخل بيها ل سلاحف النينجا
ولسة عبده هيدخل العمارة مسكة البواب من ذراعه وقال
انت هتهزر معايا سلاحف النينجا عايشين في البلاعة
عبده بص ل ايد البواب وقال
نزل ايدك انت ما تعرفش انا مين
البواب اتهز ونزل ايدة وهو بيقول
هتكون مين يعني
عبده 
انا العراف واحب اعرفك ان دلوقتي في خناقة جامدة اوي هتحصل بين العروسة والعريس
البواب 
انت بتقول اية
يدوبك خلص البواب الجملة سمع صوت العريس بيقول
انا كلب يا بنت ستين كلب
وراح ضارب فيحاء بالقلم فقالت فيحاء
انت بتضربني انا لية
سعيد 
ما انتي لابسة نفس الفستان ونفس قصة الشعر اتلغبط ما بينكم
شيماء
فيحاء اعتبري نفسك الدوبليره بتاعتي عادي يعني،،،،،،،
ونرجع فلاش باك ل عبده وهو بيقولهم علي الخطة ولما عرفوا بالخناقة دي قال سعيد
ولية طيب هنتخانق
عبده 
علشان كل اللي في الشارع يتلهو معاكم واكسب انا وقت واشغل الماكيته واغير كالون الشقة
شيماء بصت ل سعيد
عايزاك لو هتضرب تضرب بالراحة
عبده 
اوعي تضرب بالراحة انا عايز علقة تحلف بيها المنطقة كلها
وميل عبده علي ودان سعيد وقال
افتكر كل جنية صرفته علي الجبنه الرومي اللي الهانم بتاكلها حاف ولو فكرت تقرب منها بتهزقك
اتعصب سعيد اوي والدم غلي في عروقة وعبده قال
ولا ابوها اللي غاوي يقعدك علي الارض قاصد منه وهو بيتفرج علي المسلسل ويتف قشر اللب في قفاك ،،،،،،،
ونرجع للزفة وسعيد بيصرخ صرخة بتوع الكارتيه وبينزل بالكف علي قفاة شيماء جاب لها صداع وشيماء بتجري قصاد منه وهو قالع الجذمة وبيجري ورها في الشارع ،،،،،،،، 
وفي نفس الوقت عبده يوصل للشقة ويقف قصاد منها و يفتح علبه البيتزا ويطلع ماكيتة خاصة بالنجارين وبص حوالين منه قبل ما يشغل الماكيته وراح بيها ناحية اول مسمار وفكه وراح ناحية تاني مسمار وفكه وقدر يفك الكالون القديم بعد ما ضرب الباب ضربه صنيعي ما عبده اشتغل ل فترة نجار وخلع الكالون القديم ولسة هيركب الجديد لقي حد بيحط ايدة علي كتفه اتصدم وبص يشوف مين دة ،،،،،،
اية عبده اتمسك ولا الحكاية فيها اية هقولكم باذن الله في حلقة بكره