اسكريبت اناوانتَ_والحُب_تالتنا الفصل الثالث بقلم حبيبه_الديب حصريه وجديده
اسكريبت
اناوانتَ_والحُب_تالتنا الفصل الثالث بقلم حبيبه_الديب حصريه وجديده
قربت منه و أنا بضحك على شكلنا و احنا بنفتكر الهبل بتاع زمان:
_ها يا سيدي.. الضحكة دي رجعتك لورا كام سنة؟
سيف مد إيده و مسح دمعة ضحك من على خدي، وبص لي بعيون هادية:
_رجعتني لأول مرة شفتك فيها.. في الكافيه لما طلبتنا اتبدلت بالغلط و انتِ مع ذلك كلتي الاكل عادي و اتخنقنا عشان كنت متأخر بعدها اكتشف انك جارتي الجديده و نتخانق تاني برضوا
فاكره؟!
ضحكت و خبطته في كتفه:
_ده أنت فاكر بقى!
_فاكر كل حاجة تخصك يا توتا.!
_سيف انتَ لسه مضايق مني!؟
سكت شوية و هو بيقلب في الكيك بالشوكة، بعدين اتنهد:
_بصي.. أنا مش هكدب عليكِ، اتضايقت بس مش منك
اتضايقت عشان حسيت إن في حد كان قريب منك قبلي.!
مديت إيدي و شبكتها في إيده:
_بس أنا معاك انتَ دلوقتي يا سيف ،
أنا معاك
عمار ده كان درس، و أنت النجاح و ليان دليل إننا نجحنا أوي.
سمعنا صوت ليان بتعيط من الأوضة قمنا احنا الاتنين في نفس اللحظة، بس هو سبقني:
_خليكي.. أنا هجيبها كملي أنتِ الكيك قبل ما يبرد.
رجع بعد دقيقة و هو شايلها و هي لسه مبرطمة بالنوم حطها على رجلي و قعد جنبنا
بوست راس ليان و بصيت له:
_انا متوتره عشان الامتحانات قربت اوي!
_هتعدي و هتجيبي امتياز كمان عشان انتِ شاطره و قدها
و كمان وراكي دكتور خصوصي 24 ساعة، و مش هيخلي سؤال يقف قدامك.
𓌔𓌔𓌔ׄ ֶָࠝ 𓇼 ֶָࠝ𓌔ׄ𓌔ׅ
عدت الأيام و الامتحانات جت سيف فعلاً كان بيذاكر لي كل ليلة، و أنا نجحت بتقدير كويس
و سلمى بعد الموقف ده لمت نفسها و بقت بتتعامل رسمي و خصوصاً بعد ما سيف بقا يديها وش جامد و تلميح انه بقا فاهمها.
عمار قدم رسالته و سافر يكمل الدكتوراه برا، و من يومها لا شوفته ولا سمعت عنه.
عدى كذا سنه و انا اتخرجت و بقيت معيده في الجامعه
و لسه بجهز للماجستير
وسيف بقا رئيس قسم المحاسبة، و أنا بقيت معيدة معاه في نفس القسم
أما ليان كبرت و بدأت تروح حضانه كمان.!
سيف كان في شغله في الجامعه و انا كنت واخده أذن انهارده عشان ناويه اعملها مفاجأه لسيف
زينت البيت و عطرته و ابست فستان بيتي رقيق
و كنت عامله حفلة ذكرى جوازنا على الضيق كده انا و هو و بس
اما ليان ف سيبتها عند حماتي
سمعت صوت المفتاح بيلف في الباب، وقلبي كان بيدق زي أول مرة شوفته فيها.
وقفت في الضلمة ماسكة التورتة الصغيرة اللي عليها "كل سنة وأنت حبيبي" وبشمعة واحدة بس، عشان سنيننا سوا بتتحسب بالعمر مش بالأرقام.
الباب اتفتح وسيف دخل وهو بيبرطم:
_يا بنتي حرام عليكي، النور قاطع ولا إيه؟ توتا؟
مردتش بس ولعت الشمعة
النور الخافت نور على وشه، وشوفته وهو متنح ثانية... وبعدين ابتسامته دي طلعت. الابتسامة اللي بتطمني إن الدنيا كلها أمان.
قرب بخطوة وهو بيقلع الجاكيت ويرميه على الكنبة :
_إيه المفاجأة العسل دي؟
ضحكت وأنا بمد له التورتة:
_كل سنة وأنت جوزي، وأبو بنتي، ورئيس القسم بتاعي اللي مطلع عيني.
خد التورتة مني حطها على الترابيزة، ومسك إيدي الاتنين:
_وأنتِ كل سنة وأنتِ حبيبتي اللي خطفت قلبي من أول مره شوفتها فيها.!
قرب وطفى الشمعة بنفس واحد وقال:
_مش هتمنى حاجة كل اللي عايزه معايا أهو.
شدني لحضنه جامد، وأنا دفنت وشي في قميصه :
_سيف أنا بجد بحبك أوي أوي أوي!
باس راسي وهمس:
_بس انا بحبك اكتر
بعدنا عن بعض شوية وبص في عيني:
_فين ليان؟
_عند ماما قلت النهاردة لينا إحنا وبس.
غمزلي:
_ذكية طول عمرك يا توتا
شغلت أغنيتنا اللي كنا بنحب نسمعها سوا ، وشدني نرقص في الصالة على النور الخافت.
سكتنا واحنا بنرقص، جبينه على جبيني.
_توتا...
_همم؟
_شكراً إنك استحملتيني، واستحملتي غيرتي، وخناقاتي.!
_وشكراً إنك كنت موجود في حياتي يا سيف..!
قعدنا نقطع التورتة سوا، وهو يأكلني بإيده زي العيال.
_على فكرة، عميد الكلية كلمني النهاردة.
_خير؟
_بيقولوا اسمك اترشح لبعثة الماجستير برا... لو حابة.
سكتت والمعلقة في إيدي.
_وأنت رأيك إيه؟
قرب ومسح كريمة من على شفايفي بصباعه:
_رأيي إنك تحققي كل أحلامك، وأنا وليان هنستناكي بس لو سافرتي، هاجي أختطفك من هناك. مبحبش البُعد.!
دمعت وأنا بضحك:
_خلاص مش مسافرة. بعثة إيه، وأنا بعثتي كلها هنا.
_متأكدة؟
_عمري ما كنت متأكدة من حاجة قد ما أنا متأكدة إن بيتي هو أنت.
سيف شالني فجأة ولف بيا:
_ على فكره انا ماكنتش ناسي ذكرى جوازنا.!
بصيت له بفرحه وانا كنت مفكراه نسي اصلا
لقيته طلع علبه مستطيله و طلع منها سلسله رقيقه بتتوسطها حرفي و حرفه و ف النص قلب صغير..!
ابتسمت له و انا عيوني مدمعه:
_سيف؟!
ابتسم و لف و لبسهالي و ضمني و هو واقف ورايا:
_كل سنه واحنا سوا!
لفيت له :
_على فكره انا عندي ليك هديه احلى.!
مسكت ايده و حططها على بطني و حطيت فوقها ايدي
بص لي بتفاجئ و صدمه
_انتِ.... انتِ.... حامل يا توانا!؟ انتِ حامل؟!
ابتسمت :
_اه
شوفت الفرحه في عيونه و مره واحده شالني و قعد يلف بيا
_انا عايز ولد او بنت مش فارقه المهم ان ربنا هيهاديني هديه تاني منك يا توانا..!
أوقات الحب مش محتاج يكون الأول، المهم يكون الأخير
و الأهم إنه يكون البيت اللي بترجع له و أنت متطمن إنك مش هتخسره.
و احنا.. أنا و أنتَ كنا بنكمل بعض
و الحب كان تالتنا..!
•تمت..!
