رواية عشقت جني الحلقة الرابعة والخامسة حصريه وجديده

رواية عشقت جني الحلقة الرابعة والخامسة حصريه وجديده 
باسم قال لي البجامه الحمرا دي تاني ماتلبسيها اتلفت شفت انو انا فعلا لابسه بجامه حمراء 
قلت ليهو بسم الله كيف عرفت قال لي وقفتي قدام المرايا ؟؟
قلت ليهو وانت واقف فيها
مشيت الموضوع ونهينا المكالمه ومشيت المرايه لقيت انو البجامه مفصلاني حته حته مشيت لبست لي جلباب ونمت واحلامي طبعا كلها باااسم ومره يطير ومره يتشقلب صحيت الصباح اضحك على احلامي ..
بعد كم يوم قال لي انو مسافر السعوديه وشغال في شركة تنظيم في جده وقال لي فكري في موضوع انك تسافري تحضري بره ..
وطوالي جا في بالي مالو لو سافرت السعوديه واشتغل هناك
واكون بحضر ..
طرحت الفكره لناس بيتنا ووافقو فورا بدون اترددو زاتو لمن استغربت رجعت ليهو وانا طايره بالفرح قال لي خلاص رسلي لي السيفي بتاعك وانا بقدم ليك على بال ما تجهزي نفسك للسفر بكون جهزت ليك شغل ..
وانا شغل شنووووو ياخ الاهم اني اكون قريبه منو وبنات خالاتي واخواتي اتبسطو لي شدييييييد وفعلا بديت في الاجراءات والشغل طلع في مستشفى الملك فهد في الدمام ومافرقت قريبه لي جده المهم اطلع بس وعندي خالتي في الدمام زوجها متوفي وعندها ٣ بنات وولد بتربي فيهم وبتبيع عطور وبخور وبتشتغل تياب وحاجات سودانيه كتيييره اها استغبلتني في المطار يوم وصلت وقالت لي تقعدي مع اخواتك طوالي وفعلا قعدت معاها وباشرت الشغل وشغلي ماشي رهييييب وبلاقي باسم كل يوم سبت وعرفتو ع بنات خالتي وخالتي زاتا ..
واتخيلو لسه ماقال لي بحبك لكن بنطلع وننزل ونتكلم مع بعض وفي خلال سنه بس انا اشتريت لي ارض وبديت بنيان تحت عياده وفوق بيتي البحلم بيهو والقروش بقت جاريه في يدي زي التراب واي شغل اهبشو يتسهل لي الحمدلله وبقرا قران وبصلي صلاتي في وقتا وهو نفس الشي ..
بنيت بيتي وجهزت عيادتي وبقيت جايه السودان زياره وانا كل يوم عشقي ليهو زايد زياده
وكل مره اقول احسم الموضوع واصارحو اتكلم معاهو انسى الموضوع واتكلم عادي ..
يوم قبل اسافر بيومين اتصل وقلت ليهو باسم انا بحبك وكنت ببكي خااايفه يرفضني وانا جنيت بيهو عديييل
قال لي وبتبكي ليه طيب ..
قلت ليهو ماعارفه بس ..
قال لي انا ما ح اكون زي بقية البشر دي واكذب عليك انا بحبك والله اكتر من حبك لي لكن للأسف ماعندنا مستقبل
كلامو نزل علي زي الصاقعه وحسيت قلبي داير اطلع من الوجع 
قلت ليهو لييييه ؟
ماقدر المقام قصدك
رواية عشقت جني الحلقة 5
بقلم
قال لي العفو ده ماقصدي لكن زواجنا مستحيل عديل وح ندخل في متاهات انتي في غنى عنها وانا لو علي اتزوجك الليله قبل بكره لكن مابيدي وخايف عليكي
قلت ليهو اذا انت بالجد عايزني مابتخليني ولا بتخاف علي منك انا لو علي موافقه على اي شي صعب ومابشيل هم لي حاجه المهم ابقى معاك بس ..
قال لي طيب برجع ليكي برواق
باسم قال لي بتصل ليك برواق
انا لنهاية اليوم مافاهمه حاجه وابكي وادعي انو مايقول كلامو داك تاني
مابتحمل فراقو نهائي
المساء ده لمن جا لانو اليوم كان جمعه ماخليت غسيل ولا مكوه ولا ترتيب وشنطي فكفكتهم ورتبتهم من جديد وبس الزمن ده واقف لي قبلووو
المغرب أذن صليت وبقيت من مصلايتي ماقادره اقوم شايلاه بكى بس ..
اتصل لي وصوتو كان تعبااان قلت ليهو مالك وليه صوتك تعبان ؟؟
قال لي انا كويس واسف عارف بتكوني مقلقه ومابيدي اتأخرت عليكي
قلت ليه مامشكله اها عملت شنو ؟؟
قال لي زي ماقلت ليكي قبيل انا بحبك وميت فيكي لكن انا مسلم وماعايز اضرك بالزواج مني ..
قلت ليهو فسر لي عليك الله لانو بقيت مافاهمه حاجه وكلامك كيف كيف ..
قال لي رايك شنو نتلاقى ونتفاهم ؟؟
قلت ليه جدا اطلع تعال لي هسي
فصلت منو ولبست اقرب عبايه وطلعت لاقيتو دخلنا كافي كان شبه هادي قلت ليهو احكي قال لي اطلب ليك شنو
قلت ليهو باسم الله يرضى عليك انا مابتحمل تأخير في الموضوع ده
قال لي شوفي ياستي انا بشرح ليك وانتي حره وده لأنك أصريتي اولا انا مجنس وتاني حاجه زواجنا شبه مستحيل
وماممكن اعلقك معاي انا ماعندي مشكله ح اتحمل مع اني عامل حسابي شدييد من الاحتكاك بالبشر
قلت ليهو دقيييقه
شنو يعني مجنس دي
وبشر شنو
انت مابشر ؟
وطوالي مديت يدي مسكت يدو رفعتها وقلبتها وختيتا وهو جسمو كان سااخن ختيت يدي مسافه قلت ليهو انت عيان ؟
ابتسم وقال لي مجنس يعني جن وبشر وايوه بتقدري تلمسيني وتشوفيني وتتكلمي معاي لكن الزواج غير ..
بدون اشعر لقيت نفسي ببكي
قلت ليه انت داير تتخلص مني بس وخلاص يازول قوم امشي مسكني مااقوم قال لي والله انا مابكذب عليكي وعايني في عيوني دي رفعت راسي اعاين ليهو للحظه لقيت عيونو شبه الكدايس يخوانا بتتحول وبتلمع مع الضو وبيضاء شدييييد من بره ومن جوه تشبه البليه واتزكرت انو فعلا ده وصف الجن قلت ليه بسم الله الرحمن الرحيم 
نزل عيونو وفك يدي قال لي انا مسلم والله مسلم
انتظرونا في الحلقة الجاية