النصاب البارت الثاني بقلم جمانه السعيدي

النصاب البارت الثاني بقلم جمانه السعيدي
بان.....جدي الله يرحمه جان يعرف امي فقيره 
ومااتكدر تشتغل ولا تكدر أدبر فلوس وخاصه بعد ما اطلكت وكعدت كل هاي السنيين ومحد اتقدملها
وفوكاها عدها بنيه شلون راح تعيش 
وهو اكثر واحد يعرف خالي عماد ماعنده محته على امي وزوجته تكرها 
قرر يكتب نص املاكه الامي حتى نكدر تعيش 
هيه وبتها وما تحتاج الاي احد
بس جدي مجان متوقع خالي عماد راح يقاطعنا بسبب الطمع 
بعد ماانتقل خالي عماد البيته الجديد 
صار قليل يزورنا بيتنا وواكثر شي اله بيبي تتصل علي
وتطلب منه يجي حتى تشوفه
اما احنا ومسؤليتنا شال ايده من عدنا فد مره 
ابد ما يدخل عينا بعلاكه 
كل هذا حقد وكره لان امي أخذت نص الاملاك 
بس احنا ما محتاجين رب العالمين ساتره ويانا 
عايشين احلى عيشه 
اما اني السمره السمينه الموحلوه الي جانت تعاني 
من نظرات الولد والبنات 
حتى بلجامعه جنت أتعرض للتنمر 
بس مو بشكل صريح مثل قبل بس جنت احس 
الولد وبعض البنات بتهامسون عليه وعلى شكلي
رغم اني البس ملابس حلوه ومرتبه 
بس شسوي للانفس الضعيفه 
المهم خلصنا جامعه اني وساره تخرجنا ولله الحمد
بعد التخرج بست اشهر تقريبا ام ساره تخربطت 
ونقولها للمستشفى طبعا اني وامي رحنا وياها 
جارتنا وعشرة عمر
اهل ساره ناس محترمين وعدهم غيره ومحنه علينا 
تقريبا احنا وياهم عبالك بيت واحد
ساره عدها اخوان ثنيين مزوجين وطالعين 
وأخ ازغر منها بعده طالب مدرسه
ام ساره تعاني من زمان من مشاكل بلكلى 
بس مشيه نفسها بلمسكنات
بس هلمره بعد ماتفيد المسكنات اابد
يومين واحنا نفتر ويا ام ساره فحوصات وتحاليل 
بين المستشفى والعياده 
تقريبا اني وامي دفعنا نص مبلغ التحاليل والعلاج
الدكتور أأكد لازم عمليه ضروري 
الكلى اليمنى منتهيه لازم تنشال بأسرع وقت ممكن 
وتبقى ام ساره عايشه على كلى وحده
العمليه بحد ذاتها مشكله بلنسبه الاهل ساره 
لان ماعدهم امكانيه العمليه
ناس عايشه على قوت يومها 
وماعدهم فلوس للعمليه 
بان...ماما احنا ندفع فلوس العمليه 
امي....ترا مو عبااج مبلغ بسيط مثل كل مره فلوس جنطه 
لو بدي لو حذاء 
هاي عمليه 
بان...ولو مستحيل اشوف ساره مقهوره على امها واسكت 
خل نسحب فلوس من المصرف 
لازم ام ساره تسوي العمليه حتلو نسحب كل فلوسنا
امي....يمه اعرف ساره صديقتج بس مو الهلدرجه 
احنا بس نسوان وامي مريضه 
جاي اشتريلها علاج غالي 
من غير مسؤلية البيت 
بان..... حتلو لازم نساعد ساره مااكدر اشوفها مقهوره
هيج واسكت 
الله يخليج ولله الي يساعد الناس الله يساعده
ومايعوفه ابد 
امي....خل نشوف بس مو المبلغ كامل 
بان...هاج اخذي تراجي ذني والمحبس والكلاده 
مالاتي بيعيهن وخل نساعدهم 
الله يخليج ماما الخاطري
بان ...بقيت اللح على امي واتوسل بيها لمن وافقت 
وسحبنا المبلغ من المصرف 
جمانه السعيدي
اخذت الفلوس ورحت عليهم 
لكيت ساره كاعده يم راس امها وحزبنه حيل
واخوانها وواحد جاب العلاج 
وواحد راح يسئل اذا يكدر يسوي العمليه بلمستشفى 
الحكومي على حساب الدوله حتى تكلفهم ااقل
رائد....يكولون العمليات بلحكومي حجز 
واذا نحجز بعد شهر يوصلنا السره 
ساره...هواي شهر ما تتحمل 
علاء....شلون ماكو واحد. يقرضنا 
رائد....شكد يقرضنا مثلا وحتلو شلون نسدد
بان...اني عندي الحل 
ساره...شنو الحل 
بان...طلعت الفلوس هاي فلوس العمليه ومن باجر تججزون بمستشفى خاص 
وخالتي تسوي العمليه
ساره....لا ماناخذ منج هيج مبلغ 
بان....هاي خالتي واني احبها ولها حق عليه 
بعدين اذا ما نوكف واحد ويا الثاني بهيج مواقف 
عليمن بعد نكول جيران وأهل 
اخذو المبلغ حتى تحجزون بأسرع وقت ممكن 
وإنشاء الله تنجح العمليه 
وترجع خالتي علينا سالمه
بان...ساره وكامت تبجي 
ساره...ولله انتي ماكو منج انشاء الله رب العالمين 
يسعدج ويهنيج طول العمر 
هذا الموقف بعمري مراح انسى ابد
بان...راح اكون حاضره وياج بعلميه احنا مو خوات
ساره........لو عندي اخت متوكفلي هاي الوكفه ابد 
روحي انشاء الله يسعدج ويفرج عنج بكد ما جاي تساعدينا
فعلا راح رائد حجز بمستشفى اهلي 
وكمل كل التحاليل واخذناها بعد يومين سوينالها عمليه 
بقيت واكفه وياهم من الصبح لليل 
لمن اتاكدت حالة ام ساره تمام 
بعد ما طلعت من العمليه
رجعني اخو ساره الزغير للبيت
من بعد ما طلعت للبيت كل يوم اني عدهم 
ماارجع للبيت اله بليل 
اساعد ساره على امها وعلى شغل البيت 
المثل يكول الصديق وقت الضيق 
وهاي اني وفيت حق ساره عليه كل عمرها واكفه وياي دافع عني 
ساره عزيزه عليه حيل 
من بعد تخرجي بسنه وحده حصلت تعيين 
بدائرة حكوميه بقسم الحسابات 
اما ساره تعينت مدرسه بمدرسه قريبه علينا
صح كل وحده انشغلت بعملها بس نلتقي بليل كل يوم ونحجي وحده للثانيه تفاصيل يومنا من بدايته النهايته