الرسم على القلب بقلم زينب محروس الفصل الأول حصريه وجديده

الرسم_على_القلب بقلم زينب_محروس
الفصل_الأول حصريه وجديده

قصه قصيره.. من كتر إعجابه بها، مصبرش لحد ما حفلة الخطوبة تخلص، و إنما اتحرك بسرعة تجاه ابن عمه و اللي يفترض إنه العريس، و سأله باهتمام شديد::
_  مين البنت اللي بترسم هناك دي يا خالد؟؟
بص خالد تجاه البنت اللي كانت لابسة بدلة سواريه سمرا، و جايبة شعرها على جنب و قاعدة مندمجة في رسم العروسة، و قال بتوضيح:
_ دي ندى، رسامة بورتريه زي ما أنت شايف كدا!
_ طيب أنا عايز اتعرف عليها، لازم يكون معايا رقمها النهاردة قبل ما خطوبتك تخلص.
بصله خالد بسخرية و قال:
_ كويس انك فاكر إن النهاردة حفلة خطوبتي، نبقى نشوف موضوعك دا بعدين.
كان هيرجع لعروسته، لكن منعه شريف لما اعترض طريقه:
_ و حياة أمك عايز اتعرف عليها.
كان خالد عارف إن ابن عمه زنان، و عشان كدا حاول يقنعه بإن خطيبته هي اللي هتحل الموضوع

ده، و بذلك قدر يهرب من شريف.
لما قامت ندى عشان تسلم البورتريه للعروسة اعترض شريف طريقها و حاول يتكلم معاها:
_ على فكرة رسمك تحفة يا آنسة ندى.
ابتسمت ندى بمجاملة و شكرته، و اتحركت عشان تروح للعروسة، لكنها تفاجأت بشريف اللي شدها من ايدها، فخل تحكمها في البورتريه، اللي كان هيقع  لكن انضم ليهم كريم اللي مسكه بإحكام، و قال بخفوت:
_ خلي بالك يا آنسة.
شدت ندى إيدها من شريف و اتحركت من قدامهم، فطبطب كريم على كتف شريف و قال بيأس:
_ خف شوية يا شريف مش كدا!!
تغاضي شريف عن كلام كريم و سأله باستغراب:
_ انت هتمشي و لا ايه؟ مش هتستني لما الخطوبة تخلص!
_ لاء كفاية عليا كدا يلا سلام.
لما خرجت من القاعة و ركبت العربية الملاكي، ظهرت بنت تانية مجبسة دراعها اليمين، و هنا بقى اتضح إن اللي كانت بترسم في الخطوبة تبقى نيچار اللي حضرت الخطوبة بدل ندى صاحبتها لأن دراعها اتكسر قبل الخطوبة بيوم و عشان كدا طلبت من نيچار تحضر بدالها. و بالرغم من موهبة نيچار إلا إنها مكتفية بشغلها كمعلمة رسم في مدرسة لغات.....
قررت ندى إنها تتبع طريق مختصر لأنها مش هتقدر تستخدم إيدها الشمال في السواقة لمدة طويلة، بالإضافة لأن نيچار مبتعرفش تسوق، لكن اللي مكنش معمول حسابه إن العربية تعطل فجأة قبل ما يوصلوا.
في الوقت ده كانت العربية على وشك الدخول لشارع جانبي، فنزلوا البنات يتفقدوا العربية لكنهم مكنوش فاهمين حاجة و لا عارفين سبب العطل، و في الوقت ده انتبهت نيچار لمرور شاب من جنبهم.
قررت تطلب منه المساعدة لكنها تفاجأت إنه نفس الشاب اللي كان في الخطوبة، ايوه بالظبط كدا هو كريم اللي كان بيتمشي  و هو بيرتل القرآن بصوت منخفض.
لما سألته نيچار لو يعرف ورشة تصليح قريبة منهم، طلب منهم كريم إنه يبص على العربية، و قدر يعرف سبب العطل لكنه طلب منهم يستنوه دقيقة، و اتحرك هو جري داخل الشارع و رجع بعد دقايق معدودة و هو شايل أدوات تصليح و بالفعل رجعت العربية تشتغل تاني بفضل مساعدته.
شكرته ندى و ركبت العربية، في حين قربت نيچار و قالت بامتنان:
_ ملحقتش اشكرك من شوية في الخطوبة عشان كدا  شكرًا لحضرتك يا كابتن على المساعدة.
ابتسم لها بخفة و تخطاها، لكنه ضحك بشدة لما هتفت نيچار:
_ و شكرًا عشان خلصتني من الشاب اللي كان شبه الدبانة ده!
و هما معدين من الشارع بالعربية، انتبهوا ل كريم اللي كان بيقفل ورشة تصليح، و اتضح إن كريم شغال ميكانيكي، دي المعلومة الوحيدة اللي استنتجوها، لكنهم ميعرفوش إنه شاب متوسط التعليم، و عايش مع والدته و أطفال أخوه التلاتة اللي بسببهم هو مش عارف يعمل حاجة لنفسه و لا لمستقبله، كل اللي بيعمله إنه بيشتغل في الورشة اكتر وقت ممكن عشان يجيب فلوس تغطي مصاريفهم.