كارثة في المعسكر الفصل الأول بقلم الكاتبه صباح عبد الله حصريه وجديده
زياد بغضب
اقف مكانك يا عسكري.
زينه تبص له بخوف وتمثل العياط
زينه
وحياة أبوك يا شيخ، العصعوص بتاعي لسه ماخفش! أبوس إيدك سبني في حالي.
زياد بصوت عالي
بقول اقف مكانك يا عسكري!
زينه تقوم بسرعة وخوف، وفجأة تتقعبل وقبل ما تقع زياد يمسكها. زياد يسرح في عيونها وهي تبص له بخوف وهي بتقول
زينه
متشكرين يا ريس، بس ممكن تسبني بدل ما أنا عاملة زي النملة في إيدك كده؟
الكل يضحك بصوت عالي. زياد يانتبه يسبها تقع ويقول بصوت عالي
زياد
استقيم منك له..
زينه بوجع
هو أنت عندك عداوة مع ضهري يا جدع أنت وأنا ما عرفش.
الكل عاوز يضحك بس خايفين من زياد. زياد بغضب يرفع زينه من كفتها ويوقفها وهو بيقول بغضب.
زياد
اقف مستقيم يا عسكري. احنا في جيش مش في حضانة. صوت، مش عاوز أسمع غير صوتي، وشغل التهريج ده عند أمك مش هنا، انت فاهم؟
زينه تبلع ريقها بخوف وترفع يديها لتحية العسكري وهي بتقول بصوت واطي
زينه
فاهمه مش... فاهم يافندم. عسكريّة مش عسكري
زياد بزهق
ماعرفش غير كده لو مش عجبك خدي بعضك وغوري في داهيه وقضي الحكم سجن احسن لك.
زينه تبلع ريقه بخوف وتسكت.. زياد يسبها ويرجع يقف مكانه. زينه تحاول ترفع البندقية مش قادرة.
زياد بصوت عالي
ارفع السلاح صح يا عسكري، ده مش عصاية!
زينه تخاف وتحاول ترفعه. زياد يتحرك رايح جاي وهو بيقول
زياد
مفيش نوم قبل ما التدريب يخلص! مواعيد التدريب من الساعة سبعة الصبح لساعة سبعة بالليل. اللي هايتأخر ثانية هايتحاسب. سلاحك في إيدك، لبسك يتنظم، راحتك حلوة، سناك، تتغسل دقنك يتحلّك.
في نفس الوقت زينه تحط إيديها على دقنه وهي بتقول بحيره
زينه
طيب يا ريس، اللي مش عنده دقن زي حالتي يعمل إيه؟
الكل ينفجر في الضحك. زياد يقول بغضب وبصوت عالي
زياد
استقيم يا عسكري، منك له.
زياد يروح يقف قدام زينه ويقول بغضب لكن بصوت هادئ
زياد
لو سمعت صوتك تاني من غير إذن أنا هجيب موس وأقطعلك لسانك، انت فاهم يا عسكري؟
زينه تبص له بخوف وتحط إيديها الاتنين على بوقها. زياد يرجع مكانه ويقول
زياد بصوت عالي
انتباه!
الكل يقف مستقيم حتى زينه.
عنبر الكتيبة
زينه تدخل وهي منحنية ضهرها وبين عليها التعب، ويديها على ظهرها.
زينه
آه ياني ياما، آه ياني يابا. آه ياني يا ظهري، منك لله يابا، إنت واللي اسمه زياد... مش عارفة التور ده أنا عملت له إيه ولا ظهري الغلبان زعله في إيه؟
تقف فجأة وتبرق بصدمة لما تشوف العنبر كله شباب. تقول بتعب
زينه
بقولك إيه يا عسكرية، منكِ له هو فين عنبر العسكريات اللي هنا؟
العساكر يضحكوا، واحد يقول
العسكري
معلش يا عسكريات، كل اللي هنا للعساكر ما فيش عسكريات أصلاً، شكلهم ماكانوش عاملين حسبهم لعسكرية اسمها زين.
زينه ببرود
دي أمك اللي اسمها زين.
العسكري بغضب
بِت احترمي نفسك أصلًا، أقسم بالله أخرشمك.
زينه تحط إيديها على جنبها وهي بتقول
زينه
لا والله خوفت، خاف يا عيد ياما ياما.
العسكري بغضب
لا ده إنتي عاوزة تتربي بقى.
يقرب عاوز يضربها. فجأة يدخل زياد وهو بيقول بصوت عالي
زياد
مكانك يا عسكري، منكِ له!
زينه تجري وتستخبئ وراها وهي بتقول
زينه
أنا في حمايتك يا حكومة! واحد مفتري يابيه، عاوز يتهجم عليّ وليه، غلبانة زي ولا علشان أنا بنت يعني مافيش غيري في الكتيبة؟
زياد يسحبها من وراها وهو بيقول بغضب
زياد
يا خرّب بيتك، إنتي بله إذاعة، افصلي، صدعتينا!
زينه تخاف وتحط ايديها الاتنين على بوقها. زياد يبص للعسكري ويقول
زياد
حصل إيه يا عسكري؟
العساكر بهدوء
لسانها طويل يا باشا وغلط فينا.
زينه بغيظ
لا حوش، أنت اللي نازل عليك الوحي؟ ما بتغلطش؟
زياد يقرب منها بغضب وهي ترجع بخوف لحد ما تلصق في الحيط.
زياد بغضب بس بصوت هادي
فاكرة أنا قلتلك إيه الصبح؟
زينه تحط ايديها على بوقها بخوف وتهز رأسها جامد بمعنى لا. زياد يقول بغضب
زياد
أقسم بالله العظيم ده آخر تحذير ليكي. وعلشان تحترمي نفسك وتعرفي لله حق، إنتِ هتاخدي ثلاث ساعات زيادة تدريب.
زينه تفتح عيونها على الآخر وهي بتقول
زينه
ده أنا محتاجة آخد ثلاث سنين نوم، وحياة أبوك!
زياد يبص لها بغضب. زينه تخاف وتحط ايديها الاتنين على بوقها بسرعة. زياد يهز رأسه بآسف ويتحرك علشان يطلع وهو بيقول بهدوء
زياد
هاتها وتعالي وراي يا شويش.
الشويش يقرب منها علشان يمسكها، زينه تجري وتستخبى تحت السرير وهي بتقول بصوت عالي
زينه
لا مش هتتحرك من هنا، أنا عاوزة أنام!
زياد بغضب
اطلع من عندك يا عسكري!
زينه بغضب وصوت واطي
يا عم بطل حزق، لا روحك تطلع ونخلص.
زياد بغضب
إنت بتقولي إيه يا عسكري؟
زينه بخوف
بقول طلعها... الله ياخدك أنت والعسكري في يوم واحد ونخلص.
زينه تطلع من تحت السرير، زياد بغضب يرفعها بيد واحدة وهو بيقول
زياد
ده إنتي مش هتخدي ثلاث ساعات بس، هتقضي الليل كله في التدريب وانا هشرف عليكي بنفسي.
زياد ياخدها ويطلع وهي بتعيط وتصرخ وهي بتقول بصوت عالي
زينه
حراااام عليكم، أنتم بتعملوا في كده ليه؟ هو أنا وأكلي ورث المرحوم ولا إيه؟
كارثة_في_العسكر
الكاتبة_صباح_عبدالله_فتحي
قصص_قصيرة_كوميدي_رومانسي_كاملة
اللي عاوز القصة تنزل بسرعة يعمل لايك ويكتب تم. ويضغط متابعة الصفحة علشان يوصل له أشعار بكل جديد.. وشكرًا من قلبي لناس الجميلة اللي بتتفاعل وبتشجعني علي الاستمرار
