بحبك ياولا الحلقة الخامسة بقلم محمد منصور حصريه وجديده
البت دي غريبة أوي.. مع إنها بتديني على دماغي وورتني الويل، لكن دمها خفيف.. وأنا بصراحة بحب القطط اللي بتخربش!
هنا يتخيل إن في تامر تاني قاعد قصاده وده جانب الشر اللي جواه. وكان تامر التاني بيبصله بقرف وبيقول
إيه؟ هتحن لها يا خرع؟! دي البت اللي خلت أبوك يقلب عليك ويشك في قدراتك!
تامر مش بحن.. بس البت فيها حاجة غريبة، دي بتقرأ أفكاري وبتعرف أنا بفكر في إيه!
تامر التاني وده معناه إنك تحبها؟! البت دي لازم تتعلم الأدب، إزاي تقولك لا وتطلعك سفنجة مطبخ؟
تامر أيوه صح! إزاي تقول لي لا ?!
تامر التاني يبقى خلاص! تروح دلوقتي وتوريها العين الحمرا وتكسرلها دماغها.. وما تنساش إكسر للبت ضلع، يطلع لها أربعة وعشرين ضلع غيره!
تامر جدع ياض! أنا هروح أضربها وأعلمها الأدب.. اشرب أي حاجة على حسابي عقبال ما أروح وأرجعلك.
يقف تامر ويستعد يمشى، فيقول تامر التاني بقلشة
استنى يا حمار! أنا الشيطان اللي جواك .. أطلب إيه وأشرب إيه؟! خادني معاك يا غبي!
ومن جوة أوضة النوم.. قاعدة سوسو قدام سفرة كبيرة عليها كذا صنف من أصناف الأكل اللي بيحبه تامر، وشموع مولعة في نص السفرة بشكل رومانسي رهيب. وكانت سوسو لابسة الساري الهندي كالعادة ومستنية تامر يرجع.
ينفتح باب الأوضة ويدخل تامر وهو في حالة هياج وعصبية شديده.. فتقابله سوسو بابتسامة جميلة زادت من سحرها، وقالت بدلع
حبيب قلبي..
يقف تامر وهو زي المسحور، مش قادر يستحمل جمالها، فقال وهو بيمثل الشدة
بت! أنتِ ناوية على إيه بالظبط؟
سوسو بدلع قاتل بحبك يا ولا..
يقرب منها تامر وهو قلبه بيدق دقات سريعة وكأن الكلمة صابت قلبه في المقتل
واللي يحب حد يفضحه كده قدام أهله ويقول إنه مابيعرفش؟! أنا مابعرفش يا سوسو?!
تضحك سوسو وتقول
ما يبقاش قلبك أسود بقى!
تامر يقول لنفسه صوت داخلي
جت لغاية عندك أهو.. خُد منها اللي أنت عايزه وارميها في الشارع، بياعة الفراخ دي!
طبعاً سوسو كعادتها لقطت أفكاره من نظرة عينيه، فانصدمت وقالت لنفسها وهي بتبص في عيونه
شوف! أنا كنت ناوية أكون طيبة معاك الليلة دي، لكن أنت اللي جيبته لنفسك يا ابن بياع اللحمة!
وقالت بدلع ومكر
ما تيجي جنبي يا ولا..
يقرب منها تامر ويقعد جنبها، وتبصله سوسو في عينيه وتطلع برشام هلاوس وتحدفه في طبق الشوربة اللي قدام تامر من غير ما يحس بأي حاجة، وقالت
بتحبني يا ولا؟
تامر وهو بيحاول يحضنها وهي بتمنعه بدلع
بحبك أوي أوي..
تضحك سوسو وتقول
طب كُل الأول وبعد كده أنا معاك في اللي أنت عايزه كله!
تحط طبق الشوربة اللي فيه البرشام قدامه، فيبص تامر للطبق ويقول
آكل؟.. ماكلش ليه!
ويشرب تامر الشوربة كلها على شفطة واحدة! وياكل وياكل وياكل وهو عمال يبص لسوسو .. وبعد ما شبع قال
أخش آخد دش، وعايز أطلع من الحمام ونبدأ المعركة الحربية!
تضحك سوسو بمكر وتقول
بس اطلع أنت الأول..
تامر باستغراب وهو مبهور إيه؟
سوسو مستنياك على نار يا بطل..
ومن جوة الحمام.. يقف تامر قدام الدش. بعد ما قلع هدومه ووقف تحت المية، ضحك وبص للمية وقال بعبط
يا مطرة رخي رخي.. على قرعة بنت اختي!
وبعد كده راح ناحية هدومه وهو بيلبسها تاني وبيقول لنفسه بذكاء شديد
أما ألبس هدومي عشان جسمي ما يتبلش من المية!
لبس هدومه وهو مسطول على الآخر لأن برشام الهلاوس اشتغل، ورجع وقف تحت الدش وهو بيضحك وبيقول
أهو كده المطرة ما تبلش هدومي! أنا أذكى من الدش!
وبص للدش تاني وقال باستغراب
هي إزاي بتنطر كده وإحنا في شهر أربعة؟! الدنيا اتجننت!
ويقعد في البانيو وهو عمال يهزي
ولا إحنا في شهر خمسة؟ لا غلط.. إحنا في شهر كيهك! هو كيهك اللي المطرة فيه بترخ رخ!
قعد يضحك، وبعدين تخيل إن في صرصار ماشي على الحيطة.. فمسك شبشب الحمام وضرب الحيطة! وبعدين شاف صرصار تاني ماشي على هدومه، فضرَب نفسه بالشبشب! وشاف صرصار تاني على وشه، ففضل يضرب وشه بالشبشب وهو بيصوت!
كل ده بيحصل وسوسو فاتحة الباب حتة صغيرة تسمحلها تشوف بيعمل إيه، ومعاها عطوة أبوها.. فتقول
جاهز يا روح بابا للمستوى الثاني؟
يبص عطوة لسوسو ويقول بقلق
ناوية على إيه تاني؟ الواد اتبهدل وبيعلم نفسه بالشبشب جوة!
سوسو ناوية أخليه يطلقني.. وبعد كده يرجع يدور عليا ويتمنى رضايا!
عطوة مش فاهم حاجة خالص من خططك دي..
سوسو هتفهم قريب يا أبا.
عطوة ما تبقيش قاسية عليه يا بت..
سوسو أنا عمري ما كنت قاسية على حد، ده أنا بنتك وأنت عارفني كويس.. بس لما أحب واحد والواحد ده يتجوزني بس عشان يهينني، لازم رد فعلي يبقى كده! يا إما يحبني بجد، يا إما أروح وأنساه وأسيبه.. بس بعد ما أكون علمته درس يخليه راجل يعرف إزاي يحترم ست بتحبه!
عطوة شكلك ناوية على مصيبة سودة..
سوسو هقرصه قرصة تطلع بالدم!
وتبص سوسو لتامر مرة تانية، اللي كان عمال يصطاد صراصير مش موجودة بالشبشب جوة البانيو!،،،،
خلصت حلقة النهاردة وباذن الله بكرة ميعادنا والحلقة الاخيرة
