حين اختارني القدر له الفصل الاول والثاني والثالث والرابع والخامس حصريه وجديده

زبيدة صوتها قاصح وفيه السلطة وصلتي للبيرو أ يوسف لقيتي داكشي لي وصاك عليه باك قبل ما يموت؟
يوسف عينيه لاصقين فالورقة لقيتو... ولقيتها حتى هي.
الحاجة زبيدة مزيان. دير داكشي لي خاصو يدار، وماتخليش العاطفة تغلبك. سمية العمراني فوق كلشي.
يوسف زير على فكو كوني هانية، كلشي غيمشي كيف بغينا.
قطع يوسف الخط ولاح التليفون فوق البيرو. عينيه الكحلين بقاو مركزين على ديك الورقة الصفرا. مكتوبة بخط اليد، وفيها طابع قديم. دوز صبعو الكبير على واحد السمية مكتوبة تما... ريم. ملامح وجهو كانت جامدة، بحال شي تمثال ديال الحجر، ولكن لداخل ديالو كانت عاصفة كدور. هز كاس القهوة، شرب جغمة قاصحة بلا سكر، وورك على واحد البوطونة حمرا فالتليفون الداخلي ديال الشركة.
نرجعو للأرشيف. الصمت كان سيد الموقف، حتى قفزات ريم وليلى على الصوت المزعج ديال التليفون الداخلي الپوسط لي بدا كيصوني. ريم شافت فليلى بخوف، بحال إلى حاسة بلي هاد المكالمة ماشي عادية. هزات السماعة ويديها كترعد.
ريم بصوت متردد ألو، الأرشيف.
سهام الكاتبة ديال المدير، بصوت مزروب ريم طلعي دابا للبيرو ديال سي يوسف فالطابق العاشر.
ريم وقفت من بلاصتها مخلوعة أنا علاش شنو درت؟
سهام ماعندي مانقوليك، السيد معصب وبغاك دابا قدامو... سربي راسك.
ريم حطات السماعة بشوية بحال إلى هازة جمرة. الدم هرب ليها من وجهها. ليلى وقفات مخلوعة كتشوف فيها. صوت الشتا برا زاد مجهد، وكيضرب فداك الشرجم الصغير ديال الأرشيف. ريم هزات عينيها فليلى، وحسات بلي ديك الهضرة ديال عمي إدريس بدات كتحقق، وبلي الباب ديال الطابق العاشر غيكون هو الباب لي غيدخلها لجهنم.
_________________يتبع____________
حين اختارني القدر له
الجزء 3
ريم هزات عينيها فليلى، وحسات بلي ديك الهضرة ديال عمي إدريس بدات كتحقق، وبلي الباب ديال الطابق العاشر غيكون هو الباب لي غيدخلها لجهنم.
قدام لانسور ديال الخدامة، ريم واقفة كتسنى. ليلى شادة ليها فيديها لي كانت باردة بحال التلج. الضو الأحمر ديال لانسور كينزل بالزربة
ليلى كتزير على يد ريم شوفي فيا... طلعي راسك الفوق، وماتبينيش ليه بلي راكي مخلوعة نتي مادرتي والو.
ريم بصوت كيرجف، كتقاد زيفها قلبي غيخرج أ ليلى... حاسة بلي هاد الطلعة مافيها خير.
ليلى قراي المعوذتين، وكوني قادة براسك كيف ديما. يالاه، سيري.
تفتح باب لانسور بواحد الصوت معدني بارد. ريم دخلات بوحدها، وتشد الباب الزاجي. بدات كطلع، ومع كل طابق كدوزو، كتحس بمعدتها كتهبط لتحت. شافت راسها فالمراية ديال لانسور؛ وجهها صفر، عينيها فيهم الخلعة، والمونطو ديالها البسيط كيبان بحال شي حاجة برانية على هاد الشركة الفخمة. ريحة الغبرة ديال الأرشيف باقة لاصقة فكفوفها، وهي كتمسحهم فجنب المونطو باش تنشف العرق.
وصل لانسور للطابق العاشر. تفتح الباب، وريم خرجات لواحد العالم آخر. الزربية غليظة بزاف لدرجة خطواتها ماسمعاتهمش. الضو خافت وصفر، كيعطي واحد الهيبة للمكان. ريحة معطر الجو غالية بزاف عاطية فالكولوار. مشات بخطوات تقال جيهة البيرو ديال سهام، الكاتبة الخاصة. سهام كانت لابسة شوميز بيضا مقادة، وكتطابي فواحد الكلاڤيي بلا ماتشوف فيها.
ريم بصوت خافت، حشمانة صباح الخير... عيطتي ليا؟ أنا ريم ديال الأرشيف.
سهام هزات عينيها فيها من فوق النظاير، شوفة فيها شوية ديال الاستصغار آه، نتي سي يوسف كيتسناك لداخل.
ريم بلعات ريقها واش... واش معصب؟
سهام رجعات كطابي فالحاسوب دخلي وتعرفي. ماسديش الباب موراك بالجهد.
ريم وقفات قدام الباب ديال البيرو. باب كبير وعريض من الخشب الكحل المحفور. البواني ديالو من النحاس كيبري. حطات يدها عليه، حسات بالبرودة ديالو تسربات لعروقها. خدات نفس عميق، بحال شي غطاس غينزل لغرق البحر، دورات البواني بشوية، ودفعات الباب.
البيرو كان شاسع. الشتا برا كتضرب فالزاج الكبير لي كيطل على كازا كاملة. يوسف ماكانش جالس فبلاصتو. كان واقف عاطيها بالظهر، كيشوف فالشتا، ويديه فجياب الكوستيم ديالو. فوق البيرو، كانت محطوطة ديك الورقة الصفرا القديمة، مضاوية بواحد اللامپاصغير. ريم بقات واقفة حدا الباب، ماتحركاتش.
يوسف بصوت قاصح وبارد، بلا مايدور عندها سدي الباب.
ريم سدات الباب بشوية، صوتها كيرعد ن.. نعم أ سيدي. طلبتيني؟
يوسف دار عندها بشوية، عينيه الكحلين كيخترقوها شحال هادي وانتي خدامة فهاد الشركة؟
ريم هبطات عينيها للأرض عامين أ سيدي... فقسم الأرشيف.
يوسف تمشى بخطوات تقال جيهة البيرو، وهز ديك الورقة الصفرا عامين... وانتي مخبية لتحت مع الغبرة.
يوسف وقف قدامها، الطول ديالو والهيبة ديالو خلوها تحس براسها صغيرة بزاف. ريحة العود القاصحة لي شمتها الصباح رجعات ضربات فنيفها، ولكن هاد المرة كانت خانقة. الصمت طاح فالبيرو، تسمع غير صوت قطرات الشتا على الزاج. يوسف بقا كيشوف فملامحها، بحال إلى كيقلب على شي حاجة فوجهها. مد يدو بشوية، وحط ديك الورقة الصفرا قدام عينيها.
ريم هبطات عينيها للورقة، وقرات السمية لي مكتوبة تما بالخط العريض... شنو قرات ريم فديك الورقة لي خلات عينيها يوساعو بالصدمة والدموع يتجمعو فيهم فثانية وحدة
____________يتبع___________
حين اختارني القدر له
الجزء 4
عينيها بقاو مسمرين فديك الورقة الصفرا. الحروف الكوحل لي بداو كيبهاتو مع الوقت، كانو كيشكلو سمية كتعرفها كثر من راسها عبد الرحمان بناني. وتحتها نيشان، طابع أزرق فيه سمية عمر العمراني، الأب ديال يوسف ومؤسس الشركة. ريم حسات بالدم نشف فعروقها. باها، داك