فرشه ومسكرا الجزء الاول بقلم آيه السمحاوي حصريه وجديده

فرشه ومسكرا الجزء الاول بقلم آيه السمحاوي حصريه وجديده 

" عايـزة أقابل حضرة الظابط ضروري.. حالة استغاثـة "

سمعت صوتها و أنا أصلًا كنت خارج للبيت، لأن بحمد ربنا مفيش قضايا النهاردة، أول ما شافتني خارج من الأوضة، جريت عليا بسرعة.

البنت باين عليها في حالة هيسترية حرفياً، نزلت على الأرض تمسك في رجلي و تعيط جامد:

_ ساعـدني.. هموت، هيقتلني بالله عليك ساعدني، مش عايزة أموت..

وطيت بسرعة ببعدها عن رجلي، عشان تقف ساعدتها تقف من الأرض، و دخلنا المكتب تاني، معايا كريـم.. 
البنت باين عليها صغيرة و باين عليها بنت ناس أكابر!!

لابسة بنطلون جينز أزرق، و بلوزة سمرا.. و سايبة شعرها
لكن من العياط و الرعب وشها اتبهدل من الميك أب..

مديت إيدي بمناديل و ميه عشان تهدى، لكنها زي ما تكون ملبوسة! 
مش راضية تقعد، بتتحرك و تمسح على كف إيديها و بتصرخ:

_ أنا همـوت.. مش عايزة أشرب مش عايزة مناديل، ساعدني مش عايزة أموت..

_ أهدي كدا و عرفيني مالك عشان أسـاعدك.. أهـ

بقت تعيط أكتر و ترتعش و تبص حواليها و مش بتردد غير:

_ ساعـدني.. هموت، مش عايزة أموت، قالي هتموتي، هو قالي، قالي والله...

ضربت إيدي على المكتب بعنف عشان تهدى، و نلحق ننقذها لو في حاجة خطيرة:

_ قولتـــــك إهــــدي و أتكلمي عشان نسـاعدك.. مالك؟

سِكتت تبصلي بخوف، رفعت دراعها المكشوف قدامي، لقيت رسمة أو تاتو أو باين وشم.. على هيئة ثُعبان ملفوف على الدراع.. 
بصيت لكريم بستغراب.. لقيتها كملت كلام تاني بعياط و نبرة مش فاهم منها ولا كلمة..

_ هيقتلني.. التِعبان دا.. هـ

ميلت عليها و عيني جوه عيونها بغضب:

_ من غير عياط.. أتكلمي من غير عياط عشان نعرف نساعدك

هزت راسها بسرعة بتحاول تتحكم في رعشة صوتها.. 
و هي بتشاور على الثُعبان المرسوم و قالت:

_ التعبان دا هيقتلني كمان...

بصت للساعة المتعلقة على الحيط و بؤبؤ عينها بقى اوسع
رجعت بصت ليا تاني، بتكمل بصوت مرعوب و عيونها بتعيط تاني:

_ كمان عشرين دقيقة.. هيقتلني كمان عشرين دقيقة، ساعدني.. أنا عرفاك كنت بتحقق في قضية في بلدنا من فترة، بتاعت الست نرمين اللي اتقتلت يوم عيد ميلادها؟ عرفت أنك شاطر و بتساعد الناس و بتنقذهم... بالله عليك ساعدني..

ختمت كلامها بتعيط جامد و صوتها بقى مسموع و كل شوية تبص للساعة على الحيط، قربت منها مديت إيدي على دراعها ألمس الثُعبان، لقيته مرسوم فعلاً؟ هيقتلها إزاي دا؟!!!

_ يبنتي دا مرسوم على دراعك؟ فهميني في إيه؟ أنتِ جاية تهزري مثلًا يعني!

هزت راسها جامد بالرفض، قربت أكتر و هي عينها هلى الرسمة و قالت برعشة في صوتها :

_ روحت أرسم تاتو عند واحد، صحبتي قالتلي عليه و هي مش بترسم غير عنده، لما دخلت لقيت المكان فاضي، قولتله عايزة ارسم طاووس على دراعي قالي ماشي.. فضلت قاعدة و هو بيخلي الزبون يغمض عشان يعرف يرسم...

رفعت عينها على الساعة بفزع و أنا مربع دراعاتي بسمعها، و كريم واقف جنبي ساند على طرف المكتب، بصت ليا تاني و عيونها حاسسها هتخرج من الرعب:

_ بعد ما خلص رسم، ببص لقيته رسلمي ثُعبان، قولتله أنا مطلبتش كدا؟ و زعقت معاه، جيت أمسح الرسمة بسرعة، مش راضية تتمسح نهائي رغم انها لسة مرسومة، خوفت و زعقت معاه، قولتله انا طلبت طاووس، لو سمحت أمسح الرسمة خلاص لغيت الحجز.. قالي أنا رسمت كدا عشان عايز كدا.. و قدامك ساعة، ساعة تمسحي التاتو عشان الثُعبان هيخلص عليكِ.. أول ما الساعة تعدي، هيلدغك..

كملت و هي بتشهق بالعياط:

_ ضيعت كتير من الوقت على كل عيادة و مستشفى شوية، كرشوني و بيقولولي بطلي هبل، التعبان هيدلغك ازاي و هو مرسوم؟  قعدو يضحكوا عليا.. فكروني مجنونة..

بصيت لكريم بصدمة.. 
بصينا بسرعة على الساعة، فاضل 15 دقيقة!!!

_ كريم أتصرف.. استدعي فريق متخصص في الحاجات دي بسـرعة.

كريم خرج جري على برا، أنا فتحت الفون أكلم الفريق أو المستشفى تبعد دكتور تجميل يحاول يتصرف أو يشوف هنعمل إيه؟ 
لكن اللي مش معقول.. الثُعبان المرسوم إزاي هيلدغها؟ 
البنت من رُعبها باين فعلاً كلامها حقيقي..

نحاول ننقذها لأن الوقت مش في صالحنا أبداً. 
و بعد كدا نشوف هنعمل إيـه..

البنت قعدت على الكرسي بترتعش، بتعيط جامد و لسانها بس بيردد:

_ مش عايزة أموت.. بالله عليكم.. حد يساعدني.. مش عايزة أموت..

الدكتور رد عليا بعد تالت مره رنيت.. 
حكيتله الوضع بسرعة عشان نساعدها بأسرع وقت أو حاجة سريعة على ما الفريق يوصل..

_ حضرة الظابط.. أفتح كاميرا كدا أشوف الرسمة..

فتحت كاميرا بسرعة و مسكت دراعها اوجهه للكاميرا، و البنت عيونها على الساعة، جسمها كله بيرتعش تحت إيدي..

_ حضرة الظابط، حقيقي مش عارف أقولك  ايه حقيقي مش عارف ازاي ممكن الثعبان يلدغها  دا تاتو؟؟ ، بس ممكن نخاطر شوية  و أمشي بدبوس على حروف الرسمة عشان نبعد عن أي شرايين.. غرز الدبوس في حواف الرسمة داير ما يدور...

ثبت الفون على المكتب بسرعة، و فتحت الدرج أخدت دبوس من اللي بثبت بيه صور الأدله، و مسكت دراعها تاني بقيت أغرز الدبوس في حواف الرسمة بسرعة، بعد كل غرزة يطلع وراها دم..

البنت من الرعب و الخوف مش حاسة بالألم.. 
بعد غرزتين بس بالدبوس، كريم دخل بيبص على الساعة.. 
بصيت أنا كمان فاضل 7 دقايق!!

البنت بقت تعيط أكتر، الوقت مش هيسعفنا نعمل إيه.. 
اتوترت، عليت صوتي على العساكر اللي وقفة:

_ الفريــق فيــــن؟ ما تعمل حاجة يا كريــــم

لقيته قرب بسـرعة مَسك دراع البنت بيشوفه من كل اتجاه و بصلي بحيرة فعلاً، عيونه حيرة و قال بصوت عالي لأنه حرفياً كله متوتر :

_ معــــرفش يا أحمد، معـرفش.. التِعبان مرسوم؟ هيلدغها إزاي؟ و الفريق بيقول خرج جاي في الطريق..

ختم كلامه و أخد الدبوس من إيدي يكمل اللي الدكتور قال عليه. 
ركزت في كلام البنت هو قالها « قدامك ساعة تمسحي التاتو عشان الثُعبان هيخلص عليكِ.. هيدلغك!  »..

لازم الثُعبان يتمسح بأي طريقة.. 
بصيت للفريق و اتكلمت بأخر حل لأخر كام دقيقة في الوقت:

_ ماية كاوية... ماية نار في خلال دقيقة تكون قدامي..

سمعت شقهت البنت، حسيتها بقت ترتعش أكتر 
عينها على الساعة.. رفعت عيني أنا كمان فاضل 5 دقايق؟!

بلعت ريقي و قربت منها ميلت عليها و هي قاعدة:

_ عايزك تهدي، مش هيحصل حاجة، هنحاول نمسح التاتو لكن خليكِ هادية و استحملي بس شوية.. اسمك إيه؟