فرشه ومسكرا الجزء الاول بقلم آيه السمحاوي حصريه وجديده

_ ياسمين.... أسمي ياسمين.. ياسمين أبو السعود رمضان

رجعت تعيط تاني أكتر من الأول و عينها متعلقه في الساعة 
مدت إيديها التانية مسكت في دراعي و رعشة جسمها باينة:

_ بالله عليك إعمل حاجة.. ساعدني، مش عايزة أموت، بالله عليك..

غمضت عيني بأسف، رنيت على الفريق و أنا بزعق حرفياً و متعصب جداً  الحو مشحون توتر.. باقي أربع دقايق في الوقت:

_ أنتو ماشيــــــن على قشـر بيـض..

قفلت الفون و أنا بمسح على وشي، كريم لسة بيغرز الدبوس في حواف الرسمة، دراع البنت بقى كله دم.. 
رفعت عيني للعسكري الواقف:

_ أستعجل البيه اللي خرج و لسة مجاش.. دقيقة تكون الميه قدامـــي..

سندت على طرف المكتب، العسكري خرج جري.. 
البنت عينها على الساعة بِرُعب، جسمها بيرتعش، عيونها بقت وارمة جداً من العياط.. بدعي من جوايا الفريق يوثل بسرعة، أو العسكري يجي أسرع..

لكن لو الوقت عدى و محصلهاش حاجة؟ 
طيب هل دي لعبة مثلًا... أصل فعلاً مش معقولة ولا تدخل الدماغ إن رسمة ثعبان تلدغ!!

إلا لو في سحر في الموضوع.. 
و مش هنستبعد دا، هي بتقول صحبتها رشحتها للرسام دا 
لكن ليه ميكونش رسام أصلًا.. أصل مستحيل رسمة ثعبان تلدغ بني أدم!!

مسحت بكفي على وشي بقلة صبر، و توتر
رفعت عيني على الساعة.. فاصل دقيقتين!!

بصيت للبنت، لكريم.. البنت بتعيط، كريم لسة مستمر بالدبوس
وقفت بسرعة خرجت برا المكتب أشوف حد من العساكر وصل ولا لأ.

حد من الفريق وصل ولا لسـة.. 
لكن مفــــيش حد.. مفــــيش..

حتى الناس اللي لجأت ليهم محدش صدقها
رغم إن فعلاً الوضع لا يُصدق و محدش يستوعبه، لكن على الأقل محاولة يساعدوها.. محاولة يمسحو بيها التاتو حتى لو محدش مصدقها.. ليه كدا؟ ليه كل حاجة ناخدها بُسخرية..

وقفت على باب المكتب، بصيت للساعة باقي ثواني
لية الوقت بيعدي بسرعة  في وقت مش عايزينه يعدي!! 
ليـه بجد، ليـــــه..

ياسمين عينها على الساعة، بصتلي و تبص لكريم و بقت تصرخ بترجي:

_ بالله عليكم إعملوا حاجة.. يحضرة الظابط.. يا دكتور كريم.. بالله عليكم ساعدونـي.. بصوا بصوا..

وقفت بسرعة قربت مني، أنا لأول مره أبقى عاجز عن مساعدة حد
وقفت تبص حواليها و قالت بهيسترية حرفياً و أنا و كريم بنحاول نهدي فيها عشان تقعد، و إن خلاص الفريق على وصول، و مش هيحصل حاجة..:

_بصوا بصوا.. أقطعوا دراعـي.. اه اه اقطعوا دراعي، أنت معاك مسدس صح؟ أضرب التعبان على دراعي رصاصة، و هو مش هيـعضني.. أنا.. أنا موافقـة.. اقطعـوا دراعـي.. أنا مـوافـــ

بصينا للساعة بسرعة لما العقرب بقى يتكتك لأن الساعة خلصت. 
لكن قبل ما نرفع عينا على الساعة، سمعنا شهقة عنيـفة..

وقفنا قدامها بسرعة بنهديها، بنحسبها بتعيط تاني أو بتشهق من الرعب
لكن البنت عينها بقت جاحظة فجأة، و اترمت على الأرض..

كريم استوعب بسرعة إن البنت فعلاً الثعبان بيلدغها؟ 
لكن أنا فضلت ثابت... البنت بتتشنج بطريقة عنيفة..

رميت السلاح على المكتب بسرعة و قعدت على الأرض جنبها:

_ ياسمين سمعاني.. هتبقي كويسـة.. الفريق على وصـول.. يعسكــــــري...

لكن كريـم وطى راسة جنبها بسرعة و اتصدمت لما سمعته بيقولها:

_ ياسمين قولي ورايا.. أشهد أن لا إله إلا الله، قولي الشاهدة يا ياسمين..

بقت عينها تغمض، جسمها يتشنج.. و صوتها خرج بصعوبة:

_ أشـ.. أشـهد.. مـش.. عـ.. عارفة.. مش.. عايـزة.. أمـو... ت

_ هتعرفي.. قولي ورايا.. أشهد أن لا إله إلا الله، قولي معايا يا ياسمين..

لكن البنت هديت فجأة، و سكتت، سكتت مع عقرب الساعة لما بطل تكتكه.. الجو بقى صمت فجأة.. و كريم اتعدل و قال:

_ دي ماتت!!!

أنا قاعد جنبها على رُكبي عيني على رسمة الثُعبان اللي... 
اتعدلت بسرعة و أنا ببص على دراع البنت شاورت لكريم اللي مش واخد باله:

_ كريـم.. الرسـمة.. الرسمة اختفت!.. اتمسحت؟!!!!!

________________________________________

يُتبـــــع

« أية دايماً ترجع بالتقيل.. متنساش رأيك، و متابعة عشان يوصلك الجزء الثاني.. دي هتنزل الأول و بعدين بتاعت أ، أرنب لأن أ، أرنب تقيلة شوية.. قولت انزل ليكم اللايت دي عشان نستعد للتانية»

أية_السحماوي
الجميع_مشتبه_بهم
القضية_رقم_37.