ياسمين علاء الدين الفصل الخامس

ليلي: يا ليله سودا. منصور باشا. اتفضل حضرتك. والله احنا اسفين. دي ماما بتحب تمارس هوايتها المفضله. الرمايه بالشبشب
الام: حيوانه.
منصور: انا كنت جاي اتكلم معاكي يا ليلي في موضوع مهم
الام: مع أن الوقت متاخر. بس تقدر تتكلم هنا. اتفضل
منصور انتبه لمامت ليلي: ها. مين دي
ليلي: الست دي امي. نبع الحنان. ام ايد حونينه
منصور: هي مرتبطه
ليلي: بقولك امي يا جدع.
منصور: احم. هو فين باباكي ي ليلي.
ليلي: سابلها الدنيا وطفش من خمستاشر سنه
منصور: يا خير ما عمل.
ليلي: نعم. يا بشمهندس.
منصور: لا. مش قصدي. مامتك حلوه اوي يا ليلي
ليلي: في ايه يا ريس. بقولك امي لزم
منصور: اه. ما انا عارف. بس هي مش ناويه ترتبط
ليلي: يا دي النيله. انت مش متجوز من يومين. يا خربيت الرجاله. عينهم زايغه، انت جاي تعاكس امي وله جاي ليه
منصور: انا نسيت كنت جاي في ايه.
الام دخلت بالعصير. ليلي خدت منها الصينية: اخرجي يلا. معندناش امهات بتقعد مع الضيوف
الام: انتي متخلفه ي بت.
ليلي: يا امي. الله يباركك امشي دلوقتي. ده راجل نسونجي وعينه زايغه
الام: على نفسه. مش هتقعدي معاه لوحدكم
ليلي: خلاص اقعدي بس من غير صوت.
منصور: ما شاء الله. اتفضلي يا هانم
الام: شكرا. حضرتك كنت جاي في ايه. نحب نعرف
منصور: خير. جاي في كل خير يا فندم. هي لون عينك ايه.
الام: انا. عسلي.
منصور: . اول مره اشوف عيون حلوين كده. ده انا هحب العسل من دلوقتي
ليلي: يارب صبرني. يا منصور باشا. انت قولت جاي في موضوع. ممكن تقولنا ايه الموضوع. وبصلي وانت بتتكلم
منصور: اه. انا هبصلك اهو. كان ايه الموضوع يا منصور. كان ايه
ليلي: فقدت الذاكره عندنا.
منصور: جمال عيون الهانم، نسيت الكلام
ليلي: طيب روح انت. وأما تفتكر ابق قولي. وانتي قومي ادخلي جوه.
الام: في ايه يا ليلي. هو حصل ايه لده كله. الاستاذ منصور. محترم
منصور: ودمي خفيف وبقدر الجمال. الصمت في حرم الجمال جمال. يا عسلي انتي
ليلي: انا اتصل ببوليس الاداب يجي. يلا يا استاذ.
منصور: احم. ليلي خلصنا هزار نتكلم جد بقي
الام: ياريت
منصور: بتحبي لون ايه. انا بحب اللون العسلي وانتي
الام: الابيض
منصور: حلاوتك ي ابيض
ضحكت الام. ليلي: عليه العوض ومنه العوض. يا جماعه الخير حد يتصل بالبوليس، الوليه انحرفت.
الام: ليلي عيب كده. وانا يا استاذ منصور. اتكلم بجد. تقدر نعرف ايه الموضوع
منصور: حاضر. انا كنت جاي اعرض على ليلي شغل بمرتب اعلي.
ليلي: شغل ايه ده
منصور: مديره أعمالي. بمرتب 30 الف في الشهر
ليلي: مش موافقه.
منصور: ليه يا ليلي. دي فرصه
ليلي: انا مش هعرف اشتغل مديره اعمال. انا الحاجه الوحيده اللي بعرفها هي الطبخ وبس
منصور: تتعلمي.
ليلي: اتعلم ليه. مش حابه المجال ده.
منصور: ليلي. لو مشتغلتيش في الشركه معايا. مش هتشتغلي في الفندق. ده غير اني هعمل جواب توصيه لكل الفنادق والمطاعم ومحدش هيشغلك
وقفت أم ليلي: ليه بقي أن شاء الله ياخويا. فاكر نفسك ايه. الحاكم بأمره. لا يا بابا انت تقف عوج وتتكلم عدل
منصور: احم. افهميني يا هانم
الام: بلا هانم بلا نيله. كله الا بنتي. وله عشان ساكتالك. فاكرك يعني هتخدع بشكلك عشان شبهه احمد رمزي. لا. مش انا.
ليلي: انا من بكره هقدم استقالتي. انا مش هينفع اشتغل في الفندق تاني.
منصور: ليلي. بلاش عند. انا قولتلك هعلمك كل حاجه. ومش هتتعبي. الحكايه كلها
ليلي: الحكايه كلها انك عايز تلوي دراعي يا منصور بيه. فاكراني كلبه فلوس. واي فلوس هجري عليها. بس الحقيقه انا الغلطانه عشان عملت اللي قاله زياد. ومفروض اصلح غلطتي
منصور: ليلي فكري. مش هتندمي.
ليلي: مش عايزه افكر. شكرا على عرضك السخي. بس لا.
منصور: يا مدام. لو سمحتي تفهميني.
الام: انا عايزك افهمك. انت ليه مصمم على شغلها في الشركه. مع انها مش بتفهم حاجه فيه
منصور: بصراحه. لو ليلي اشتغلت في الشركه وقتها زياد واخواته هيشتغلو معانا. عشان هي بتعرف تقنعهم
ليلي: اقنع مين يا باشا. كل واحد من عيالك ليه دماغ غير التانيه.
ده غير اني حته بت طباخه غلبانه وفقيره.
منصور: بس زياد ومهند بقو يجو الفندق كتير عشانك. وده ممكن نستغله عشان نخليهم يشتغلو معايا.
ليلي: لا. طلبك مرفوض.