رواية دكتور مجانين الفصل الاول بقلمى الهام عبدالرحمن

رواية دكتور مجانين الفصل الاول
بقلمى الهام عبدالرحمن 
صلوا على الحبيب المصطفى 
في بيت في حي شعبي من احياء القاهرة.
ادم وهو بيفتح الباب خالتي.... يا خالتي... يا بدر الصباح انت فين؟!
ردت عليه خالته من المطبخ تعالى يا ادم انا هنا يا ضنايا بجهز الغداء.
دخل عليها آدم فى المطبخ وهو بيقول غدا ايه يا خالتي دلوقتي تعالي تعالي انا تخرجت اخيرا النتيجه ظهرت.
زغرطت بدر الصباح يا الف نهار ابيض أخيراً يا حبيبي اتخرجت من كليه المناخوليا بتاعتك طيب بما انك تخرجت يبقا خلاص ملكش حجة يعني بقيت دكتور رسمي يبقى تكشف عليا اصل انا بعيد عنك يا ضنايا البنكرياس واجعني اوي قالتها وهي بتشاور على كليتها.
ضحك ادم وهو بيقول وهو البنكرياس هنا يا خالتي؟!
بدر الصباح اومال دي ايه يا ضنايا؟
ادم دي كليتك يا خالتي.
بدر الصباح قال وانا كنت مفكره ان كليتي في بطني طلعت فى ضهرى.
ادم بس تعالي هنا قوليلي انتى عرفتي البنكرياس ده منين يا خالتي ده انا ما عرفتوش الا وانا في تالته طب.
بدر الصباح اهو يا اخويا سمعتها ديك النهار من البت ايمان بنت خالتك روحيه اللي ساكنه على اول الشارع عارفها يا ضنايا كانت قاعده معايا هي وامها وامها

بتسمع لها قبل ما تروح الدرس ولما سألتها يطلع ايه ده ومكانه فين شاورتلي على جنبي وقالتلي الموكوسه بنت الموكوسه انه هنا.
ادم بضحك هي البنت دي في سنه كام يا خالتي؟
بدر الصباح والله ما اعرف يا ضنايا بتهيألي في رابعه ابتدائي.
ادم ضحك اوي وقالها وانتى اي حد يقولك حاجه يا خالتي تصدقيها كدا على طول.
بدر الصباح واد يا ادم بطل مألته عليا ولا يعني عشان انا ما اتعلمتش زي امك ماهى امك يا اخويا الله يرحمها ويبشبش الطوبه اللي تحت دماغها هي اللي كانت غاويه علام دا اسم الله عليها سقطت في سته تلات مرات وبعدين قالت كفايه كده علام وانت اسم الله عليك طالع ليها غاوي علام واهو اتخرجت وبقيت دكتور قد الدنيا ده انا من بكره هخلي اهل المنطقه كلهم ييجوا يكشفوا عندك واهي تبقى سبوبه يدخلك منها قرشين وتكون نفسك عشان تعرف تتجوز يا ضنايا.
ادم يا خالتي يا حبيبة قلبي انا دكتور نفسي مش بشري يعني مش هعرف اكشف على حد.
استغربت خالته وقالت لا افهمها بقا ازاي تبقا دكتور وازاي مش هتعرف تكشف على حد؟
ادم بصى يا حبيبتي انا هفهمك انا دكتور نفسي يعني مثلا بيبقى فى واحد مضغوط من شغله او من مراته ونفسيته تعبانه ودايما زعلان وقتها بيضطر يكشف عند الدكتور النفسي عشان يساعده يحل مشاكله ويرجع مبسوط تاني.
بدر الصباح اه يعني تقصد لما تكون واحده طفحانه من عيالها وجوزها تيجي تشتكيلك وانت تحللها مشكلتها.
ضحك ادم وقال حاجه زي كده يا خالتي مش الستات بس الرجاله كمان ولا يعني هم ما لهمش حق يتعالجوا لما يطفحوا هم كمان من مراتاتهم.
بدر الصباح لا وماله يا ضنايا عالجهم هم كمان وليك عليا اجيبلك كل ستات المنطقه من بكرا اوقفهملك طابور عشان تعالج نفساويتهم اصل بعيد عنك الستات هنا فى المنطقة امخاخهم ضربت.
ادم هتجيبيهم فين بس يا خالتي انا لا عندي عياده ولا استعديت عشان امارس مهنتي انا لسه يا دوبك هستلم التكليف في المستشفى وبعد كدا أقرر اشوف هعمل ايه.
بدر الصباح واسم الله عليك اللي انت بتقول عليه ده هتستلمه امتى ولا حد هيجيبهولك هنا عشان بس ابقى عارفه وما اخرجش من البيت اصل ييجي وانت مش موجود.
ضحك ادم على براءه خالته وقالها هو ايه ده يا خالتي اللي هتستلميه التكليف ده يعني الشغل هو اسمه كده فهمتى يا خالتي.
بدر الصباح اااه فهمت ياحبيبى طيب وهتشتغل فين بقا يا حبيبي يا رب تكون في مستشفى قريبه.
ادم هشتغل في مستشفى العباسيه.
ضربت بدر الصباح بايديها على صدرها وهي بتقول يا لهوي بتاعه المجانين لا يا ضنايا بلاش تروح عشان خاطري لا تتعدي منهم وتبقى مناخوليا زيهم.
ادم يا حبيبتي المرض النفسي مش معدي وبعدين ما تقلقيش ابنك راجل ويعرف يسد في اي مكان. 
بعد ايام استلم ادم تكليفه في المستشفى وهو راجع من الشغل كان راكب الميكروباص وساند دماغه على الشباك من الاجهاد وفجاه سمع صوت من ورا لبنت بتقول
لو سمحت ليا باقي خمسة جنيه يا اسطى.
بس السواق ما ردش عليها.
البنت اتكلمت بعصبيه شوية لو سمحت يا اسطى عاوزه الباقي بتاعي.
السواق ما فيش فكه يا ابله اعملك ايه يعني؟
البنت اتعصبت وقالتله ايوه يعني انا مالي انا عاوزه الباقي بتاعي هو انت بتسيب حقك في الاجره بتاعتك.
واحد من الركاب رد وقال خلاص يا استاذه استعوضي ربنا فيها.
البنت ليه هو انت بتسيب لكل سواق الباقي بتاعك خليك في حالك يا استاذ ما حدش طلب رايك.
ادم في نفسه يا ربي علي الزعيق دا، هو الواحد اصلا مش مستحمل دماغي هتنفجر وقام مطلع من جيبه خمسة جنيه ولف ومد ايده بيها.
ادم اتفضلي يا استاذه خدي الخمسة جنيه اهي مش مستاهله يعني كل الزعيق ده.
البنت وانت تدفعهالي ليه ان شاء الله هو انت هتصرف عليا انت تعرفني عشان تديلي فلوس من معاك.
ادم يا ستى لا