يا بنتي اتكلمي، ردي عليا، ده أنا لو بكلم تمثال كان زمانه نطق آية عيسى
يا بنتي اتكلمي، ردي عليا، ده أنا لو بكلم تمثال كان زمانه نطق، مالك مبرقة كدا ليه؟
على رأي المثل لا تذم ولا تشكر إلا بعد سنة وست أشهر، وأنا لسه في مرحلة التعارف عليك .
انتي هبلة يا ميار؟ ده أنا ابن خالتك و جوزك يا ولية، يعني حافظك وعارفك، مش محتاجة سنين عشان تختبريني و لا تعرفيني، و بعدين دا مش مبرر ان احنا كتبنا الكتاب علطول قبل الخطوبة ، عشان بس ناخد راحتنا في التعامل .
ولية في عينك يا أمير يا أبو كرش، وبعدين ابن خالتي دي في البيت، إنما هنا إحنا في مرحلة الترقب والحذر لحد ما تثبت براءتك ، و ملكش دعوة بيا انا لسه مش مستوعبة حاجة و لا مستوعبة اني اتجوزتك اصلا .
كرش؟ ده فورمة الساحل بس مستخبية تحت القميص من الحسد، وبعدين إيه الحذر ده؟ أنا حاسس إني متجوز مفتش مباحث مش بنت خالتي.
المباحث عندهم روح حلوة عنك، أنا دلوقتي بفكر في المصيبة اللي دبست نفسي فيها، إيه اللي رماني الرمية دي؟
رمية إيه يا شابة؟ ده أنتي واخدة برنس العيلة، وبعدين فكي كدا، ده أنا بحبك وبناغشك عشان تضحكي، مش عشان تقلبيها دراما.
تضحكني؟ ده أنا كفاية مسلوقة من الصبح معاك في الشمس والزحمة دي؟ وشي بقى لون الطماطم المسبكة.
مسلوقة؟ فلوس مسلوقة من البنك، هيهيهي.
...........
خلاص يا ستي، أسف، معلش، حقك عليا، مكنتش أعرف إن دمي تقيل للدرجة دي ، فكي بقى وخلينا ننبسط، قوليلي عايزة دهب عيار كام عشان الشبكة؟
تصدق بالله؟
لا
لا، أنت اللي محتاج عيارين في نفوخك عشان تخلصني وتخلص البشرية من خفة دمك .
عيارين في نفوخي؟ ليه يا بنتي؟ ده أنا حتى طيب وبنسمة، وبعدين حد يرفض الدهب؟ ده أنا كنت ناوي أجيب لك طقم يخلي خالاتك كلهم يجيلهم شلل رعاش من الغيرة ، ما عدا امى طبعا ها .
خالاتي غلابة، اللي محتاج رعاية مركزة هو أنت، وبعدين بتشد في الكلام معايا ليه؟ ما ترسي على بر، أنت عايز إيه بالظبط؟
عايز أشوف الابتسامة اللي بتنور وشك دي، بس الظاهر إنك واخدة قرار بالنكد انهاردة ، قوليلي صحيح.. أنا سمعت إنك متنمرة؟!!
سمعك ضعيف مع إنه ودانك قد صحن الفول، يعني المفروض تلقط الترددات اللي في القارة اللي جنبنا.
وداني قد صحن الفول ؟ شكرا يا محترمة ، فعلا خالتي عرفت تربي .
عامل نفسك مقموص دلوقتي ؟؟؟؟ ، أنت مقتنع باللي بتقوله؟ ده أنت لو وقفت في الهوا بودانك دي هتشتغل باراشوت وتطير بيك فوق النيل.
باراشوت؟ ماشي يا ميار، بكرة لما نتحبس في بيت واحد هطلع الجديد و القديم عليكِ.
بطل رغي، إحنا لسه ورانا مشاوير.
مشاوير إيه؟ أنا رجلي ورمت من اللف وراكي، أنتي بتدوري على إيه بالظبط؟ إحنا دخلنا كل المحلات وخرجنا ب شكرا.
بدور عن الجودة، أنت فاهم يعني إيه جودة؟ ولا هي أي حاجة بتلمع وخلاص؟ أنا مش واثقة في ذوق المحلات دي أصلاً.
مش واثقة في المحلات، ومش واثقة فيا، أنتي واثقة في مين في الكوكب ده يا
واثقة في ربنا سبحانه و تعالى، وفي نفسي، وفي المثل اللي قولتهولك في الأول، والزمن كفيل يوريني معدنك الحقيقي يا أمير.
معدني؟ أنا معدني دهب مرشوش عليه ماية ورد، بس أنتي اللي غاوية نكد ومناهدة، تعالي نأكل حاجة طيب يمكن السكر يعلى والمزاج يتعدل.
نأكل؟ في الحر ده؟ عايزني أسيح زيادة؟ أنت أكيد قاصد تخلص مني عشان تاخد الشبكة وتطير.
أخلص منك؟
اخلص يا أمير، هتاخدني تفرّجني على الحاجة ولا أروح؟
الله يرحم أيام العفانة.
نااااعم بتقول إيه !!!؟!؟!؟!!
و لا حاجة ،هوديكي، بس بلاش النظرة دي ها ،بترعب.
أمشي يا أمير و انت ساكت لأحسن ودانك تخبط في حد .
بس برضو بحبك يا متنمرة.
حبك برص، اخلص يا أخويا.
........
اخلصي يا بت أنا بموت، خلاص ركبي خبطت في بعض من كتر اللف في المحل ده، إحنا بقالنا ساعتين بنقيس في نفس الفستان!
ياريت..
نعم؟ بتقولي إيه؟ سمعيني كدا؟
لا ولا حاجة، بقول ياريت تنجز ونخلص عشان لسه ورانا بلاوي تانية، أنت بتسمع من ودان صحن الفول دي بمزاجك ولا إيه؟
ماشي يا ميار، أنا هعديها عشان الفستان المقرف اللي شبه ستارة الصالون ، ده ذوق ده؟ ده أنا لو لبست شوال بصل هيبقى أشيك من البتاع اللي في إيدك ده!
بقا كدا ؟ طب خد بقا !!!
اه! كتفي يا مفترية! اتلمي بقى، لو حد شافني دلوقتي وأنا بتضرب بالأكياس في الشارع هيقول عليا إيه؟ كرامتي بقت في الأرض يا بت !
وهو حد يعرفك أصلا يا أمير عشان تخاف على كرامتك؟
باقي إيه؟ إحنا جبنا الفستان والطرحة والجزمة، فاضل إيه تاني يهد حيلك؟
الهيلز يا قلبي..
سكت فجأة ووقف مكانه وبصلها بذهول ...قلبي؟ أنتي قولتي قلبي؟ لا ده أنا أحلوّيت في عينك بقى والجمود بدأ يفك؟ قوليها تاني كدا والنبي؟
قلبي يتقطع من كتر القرف اللي أنا شايفاه، أنت صدقت نفسك ولا إيه؟ أنا قصدي .... ولا بلاش أقول عشان إحنا في الشارع، وبعدين أنت هتذلني عشان كلمة؟ دي كانت زلة لسان من الشمس والحر مش أكتر.
زلة لسان؟ ماشي يا ميار، اقلبيها نكد، اقلبيها.. أنا أصلا غلطان إني عبرت عن مشاعري الرقيقة تجاه مراتي المتنمرة.
تليفون ميار رن، و ردت ....
أيوة يا ديرو.. أيوة يا حبيبتي، لا لسه في المشوار المنيل ده.. ماشي يا ديرو هكلمك لما أروح، سلام يا روحي.
ديرو؟ ديرو عشرة؟ هيهيهي.. لا بجد تحفة، ديرو عشرة ولا ديرو ١٢ ؟ ده أنتي وصحابك محتاجين إعادة تأهيل في الأسماء والله!
.........
في إيه؟ بتبصيلي كدا ليه؟ أنتي عايزة تأكليني؟ ده أنا حتى طعمي مر وهيقف في زورك!
أنت لسه مخلصتش الالش الرخيص ده؟ ديرو عشرة؟ أنت شايف إن دي خفة دم؟ ده أنا لو ماسكة في إيدي سكينة كنت قطعت ودانك دي وعملتها سندوتشات عشان تسكت خالص!
خلاص يا ستي، اقطعي لساني مش وداني، بس بجد ديرو دي دلع دارين؟ طب ما تدلعيني أنا كمان، قوليلي يا ميمو مثلا؟
ميمو؟ ده اسم قطة جربانة
