يا بنتي اتكلمي، ردي عليا، ده أنا لو بكلم تمثال كان زمانه نطق آية عيسى 

راضية عنك هقولك
يا ابن خالتي.
يا ستار على الجفاف! ده أنا ابن خالتك يا مفترية، ده أنا اللي كنت بلعب معاكي في الطينة وإحنا صغيرين وكنت بسيبك تكسري العجلة بتاعتي وتضربيني.
وكنت بضربك ليه؟ عشان كنت بارد برضو وبتقول نكت بتسد النفس، اتمشى يا أمير، اتمشى قبل ما الهيلز اللي هشتريه ينزل على نفوخك بدل العيارين.
هيلز وعيارين.. أنتي متجوزة واحد ولا داخلة حرب استنزاف؟ عدي اليوم يا بنتي، عدي اليوم عشان مطلقكيش وأرجع أعيش ملك زماني من غير تنمر.
تطلق إيه يا بابا؟ ده أنا اللي بصبر نفسي بالعافية، وبعدين أنت تطول؟ ده أنا ميار، يعني الجمال والرقة.. اللي أنت بوظتهالي باللف في الشمس.
رقة؟ ده أنتي لو الرقة شافت بتعملي فيا إيه هتنتحر، اطلعي قدامي يا ميار، اطلعي خلينا نجيب الهيلز اللي هيجيب أجلي ده.
اتمشى وأنت ساكت، ومتجبش سيرة ديرو تاني على لسانك، فاهم؟
حاضر يا فندم، ديرو ١٥ .. قصدي حاضر يا ست البنات، اطلعي بينا على محل الجزم، وربنا يستر من ذوقك اللي شبه ستارة الصالون ده تاني.
.......
مبروك يا ستي، أدي الهيلز اللي لفينا عليه كأننا بندور على آثار غارقة، بس قوليلي.. هو أنتي ناوية تلبسي النجفة دي في رجلك بجد؟ ده عالي لدرجة إنك هتحتاجي رخصة طيران عشان تمشي بيه!
ده اسمه شياكة يا أمير، بس هقول إيه؟ ما أنت دقة قديمة وما بتفهمش في الموضة والبراندات .
دقة؟ دقة ملوخية.. هيهيهي.. تصدقي لايقة؟ أصل الملوخية بتحب التوم وأنتي لسانك أطول من عود التوم بكتير!
بطل تضحك على نكتك البايخة دي، ويلا بينا يا أمير عشان نجيب الحاجة اللي فاضلة.
وقف قصادها فجأة وفتح بقه بصدمة 
حاجة إيه تاااااني؟ إحنا شيلنا أكياس لو بعناها خردة هنفتح محل! أنتي ناوية تشتري المول كله ولا إيه؟
وطي صوتك ياللي فاضحني في الشوارع! لم نفسك ويلا قدامي من سكات .
خلاص انكتمت، أدي بوقي اتقفل بسوستة أهو، قولي يا ست ميار، إيه الاختراع اللي فاضل وناويين نصرف فيه بقية ورثي؟
فاضل طقم السيراميك اللي هنحطه في النيش، والكهربائيات البسيطة اللي ناقصة المطبخ، يعني مشوار ساعتين تلاتة كدا.
يا ربي صبرني! ، هو ده وقته احنا لسه هنشتري الدهب يا بت ، هو والله جواز القرايب ده دايماً آخره كدا؟ والله من رأيي إني أخلع دلوقتي بكرامتي قبل ما أتحول لشيال شنط في الآخر.
تخلع؟ ده أنا ميار يا أمير، أنت تطول برضه؟ ده نص شباب العيلة كانوا عايزين يخطبوني قبلك.
ميار؟ ميار مخلل.. هيهيهي.. أصلك حادقة كدا ومنشطة للأعصاب، وبعدين شباب مين يا بنتي اللي كانوا عايزين يخطبوكي؟ دول كانوا بيسألوا عليكي عشان يعرفوا هي خالتو عاملة محشي إيه النهاردة!
حتى دي بتقلش عليها؟ بتقلش على اسمي يا أمير؟ ده الاسم اللي أبويا اختارهولي ، تقولي عليه خيار مخلل يا بتاع الملوخية؟
يا بنتي والله بناغشك، هو أنا عندي أغلى منك؟ وبعدين ما المخلل ده هو اللي بيفتح النفس، وأنتي بصراحة فاتحة نفسي على النكد من الصبح.
أنا برضو اللي نكدية؟ ولا أنت اللي بخيل وعايز تروح عشان توفر تمن المواصلات؟ اخلص يا بابا، لسه ورانا لف كتير..
بخيل؟ بخيل و أشجار.... اللي هو النخيل يعني لو انتِ مش بتفهمي .
تصدق بالله، أنت محتاج إعادة تأهيل في دماغك .
لا إله إلا الله، خلاص يا ستي، توبة، والله توبة، أنا همشي وراكِ لا صوت ولا نفس، بس بلاش النظرات دي .
امشى يا أمير، اتمشى وأنت ساكت، وقدامي على محل السيراميك، وياريت بلاش قلشاتك اللي بتجيب لي حموضة دي.
.... 
خلاص يا ستي، ارتاحتي؟ أدي الحاجة كلها اهي، مبسوطة بقى؟
ابتسمت فجأة ليه و قالت  
اتصدق يا أمير.. أنا بحبك أوي لدرجة أنت مش عارف هي قد ايه.
وقف أمير مكانه متنح بجد، والشنط كادت تقع من إيده 
نعم؟ قولي كدا تاني! قولتي إيه ؟!!
قولت اللى سمعته ، و اخلص بقى ويلا عشان نلحق نروح.
لااااا.. ده طالما اعترفتي يبقى المزاج رايق، وطالما المزاج رايق يبقى لازم نحلي اليوم بشوية نكت من بتوعي
أمير.. بلاش.. خلينا مروحين وإحنا حبايب.
طب تعرفي ليه الفراعنة كانوا بيدخلوا الكافيه؟
مش عايزة أعرف يا أمير، بجد مش عايزة.
عشان يطلبوا اتنين آمون.. هيهيهي.. حلوة صح؟ بذمتك مش جامدة؟
..........
طيب بلاش دي، خدي دي طيب.. مرة كوباية عصير جوزها مات، تعرفي قالت إيه ؟!؟
يا ربي صبرني.
قالت آآآآآه يا جوسي! هيهيهي.. لا دي قوية، جوسي وعصير، فاهماها؟
..........
استني بس رايحة فين، دي لسه اللي جاية أحلى، مرة سباك نفسه اتسدت.. غرق الشقة! هيهيهي.. اتسدت يعني الحوض وكدا، فاهماها طبعا؟
..........
لا بصي دي بقى، ليفل الوحش، مرة بيضة دخلت القسم وصوتت وقالت الحقوني أنا اتسلقت! هيهيهي.. اتسلقت يعني اتسرقت و مسلوقة، زي ما كنتي بتقولي على نفسك الصبح!
..........
بص لها لقاها لسه مبرقة فكمل بحماس أكتر 
طيب اسمعي دي، مرة دكتور صيدلي عجبته نكتة، عارفة عمل إيه؟ عملها إسبرين شوت! هيهيهي.. اسكرين شوت بس صيدلية بقى وكدا، ها؟ مش قادرة تداري ضحكتك صح؟
..........
استني بس، خدي الكبيرة دي، مرة واحد....
خلااااااااااص! كفاية بقى! إيه؟ دمك سم يا أخي! خلاص؟ كل ده عشان اعترفت لك؟ ده كان يوم ملهوش ملامح يوم ما فكرت أقولك كلمة حلوة!
إيه يا بنتي؟ ده أنا كنت لسه هقولك مرة واحد مسكته كهربا قال مش أنا.. متبقيش قفوشة كدا!
كهربا اما تمسك فيك يا أمير! أنت إيه يا ابني؟ معندكش دم؟ أنا خلاص فصلت، شحني خلص، وثقتي في البشرية بقت تحت الصفر بسببك!
تحت الصفر؟ طب تعرفي إن تحت الصفر ده بيبقى ساقع.. هيهيهي.. خلاص خلاص، هسكت والله، مترفعيش الهيلز في وشي، إحنا لسه ورانا طقم السيراميك وعايزين نركز في الشقة
والله لو نطقت كلمة تانية يا أمير، هعمل منك إسبرين شوت في نص الشارع، اتمشى وأنت ساكت!
حاضر.. ساكت أهو.. بعد ثانيتين بس بذمتك اتنين آمون مش كانت حلوة؟
أمييييييير!
خلاص.. اتكتمت بس برضو بحبك يا ميار مخلل.
آية_عيسى 
روايات_واسكريبتات_مميزة