على حافة الثأر بقلم زينب ماجد الحلقة الثامنة
على_حافة_الثأر
بقلم زينب ماجد
__ الحلقة الثامنة __
انصدمت بوكفة شوان ع الباب بمثل هيج وقت
بدون ما يدك الباب الخارجي او يفتحه او يصدر صوت .. اندارلي عباس باوعلي ..
كتله اخذ راحتك عباس .
لزمه شوان وهو يكله مو قبل لا اعرف شديصير من ورايا
جر ايده عباس ست اني برا شنحتاجين بس صيحي
طيب
حجيتها واني اباوع بعيون شوان بخزرة
سحبت الباب ودا اطبكه بوجه شوان ، دفعه وسحبتي من ايدي اسمعي لچ .. اذا ابالج تمشين المي من جواي غلطانة .. اني شوان الهوى ميعبر من جواي وما اشوفه .
الوقت متأخر ولازم انام ورايا اجتماع مهم
حلو من تقلبين المواضيع وتسويفيها لمصلحتج، شعندج ويااااااه بنص هالليل بالبيت وحدكمممممممم
لتصيح اوكي ، مو طفلة اني دا تصيح عليه .. وشي ميخصك اني اعرف باموري متجي انت تحاسبني عليها افتهمت .
سحبني من ايدي حيل ويكلي تحبي مو عاجبج .. سوالج كم حركة وجذب بمكانج بعتيهن كداااامه .. احجييي
عوف اييييدي واحترم نفسك
بشري وين وصلتي وياه .. دخل غرفتج انطاج اللي تريدي .. احجييي
احترم نفسك نفسك حيووووان مو اني اللي تحجي ويايا هشكل افتهممممت
سحبت ايدي منه بقوة ، جان يكولي دا تستشرفيني برااااسي وانت دا تبيعين نفسج مثل مباعتها الكبلج وحبلت من واحد متعرف كرعة ابووووه منيييين
سطرته كف بسرعة .. تفاجئ من ضربته
هجم عليه لزمني من شعري .. كمت اتلاوى وياه واحاول ابعده ابعد ايدك حيووووان .. شعررررري
اني تضربيني وعلمود منو ؟ واحد قندرتي اغلى منه .. اني تضربينيييييي
دفعته مني وكتله اذا ما طلعت هسه اتصل واندمك والله ، اطلع برااااا
شوفي منو اليندم منو .. اعلمج
طلع من البيت .. وضرب الباب وراه بقوة
حطيت ايدي على حلكي وكمت ابجي .. يعيرني بأختي اللي عايش بخيرنا .. وصل مرحلة بالصلافة يضرب ويغلط ويتجاوز ومحد يرده ! شكد مستقوي عليه لعد ؟
يحسبوني اني اسعد الناس
واني لا اب حقيقي يدور مصلحتي
ولا ام حنونة تحتويني وتلمني ..
ولا شريك يحبني صدك وبدون مصلحة
كمت ابجي بحركة البجي الما بجيته كدامه وبينت ضعفي كدام احد
لزمت الغراض اللي رفعناهم من المي
كمت اشمر واكسر بالبيت وابجي نحيب .. اندكت الباب واني اكسر بالغراض .
انفتحت الباب وعباس فات ست ست مو هيج مو هيج على كيفج
ابتعد مني اطلع برااااا
التكسير ما راح يحل من مشكلتج شي
ولا راح ينحل شي مدامهم كلهم شايفيني بمصلحة محينحل شي .. مينحل
ابجي بصوت عالي ركض للمطبخ جاب كلاص مي ست ما اكدر ابقى بالبيت اكثر بس ضروري تهدئين وتخلين كلشي وراج
تعبت منهم .. كلش تعبت .. اريد اموووت
حتى هم يعيشووون ؟
الله يخليك اتركني وحدي واطلع .. امشي
راح اطلع بس بداعتة عزيز كلبج بداعة ميتينج لا تسوين هيج بنفسج والقران محد بيهم يسوى
هزيت راسي .. واخذت كلاص المي واني اشرله يمشي ..
طلع من عندي .. شربت وشمرته من ايدي بالكاع كسرته .
صعدت لغرفتي فوك ..
فتحت الجرارة .. اخذت حبوب كاتبلياه الدكتور للاكتآب والنوم ... اخذت حبايتين وتمددت بفراشي .. جان بارد كلش .. بجيت بجي لحد ما تعبت ونمت بلا ما ادري ..
كعدت على صوت الباب يندك .. سمعته انفتح
و ام غيث دخلت تندهني خالة حبيبتي ؟ الساعة ٨ ونص متداومين اليوم .. ابوج جوا جاي عليج كومي حبيبتي
رفعت راسي وكمت افرك براسي من الوجع واباوع الها صباح الخير
صباح الورد عمري
منو جاي ويا بابا ؟
وحده
كعدت من مكاني واني اكولها راسي كلش ديأذيني
هسه تتريكين وانطيج علاج وجع راس بس كومي فدوة لوجهج حبيبتي
كمت من مكاني رحت للحمام رتبت نفسي وكملت
نزلت واني كوة اشوف من وجه راسي .. بابا جان كاعد بالمطبخ ديتريگ
صباح الخير
باوعلي صباح النور
خالة كهوتي بسرعة
دقيقة وتجهز بعيني
دلشاد شنو صاير فيان !
شنو اللي مصاير وانت غايب بابا .. شوان مكفى يتجاوز باللفظ صار يضرب ويعيرني باختي ويتمادى بشكل عجيب
وشنو اللي خلى شوان يوصل لهذه المرحلة !
شنو اللي خلا !!
انت شايف الحق وياه ودا تسأل عن السبب
شنو موضوع السايق ؟
بابا اخر شي ممكن اتوقعه منك تسألني هالسؤال هذا
ادخلين للبيت وانت لابسه ملابسه صحيييييح ؟
تكولين راح ابات ابيت امي ويلكاكم شوان بالبيت وحدكم بساعة متأخرة من الليل وهو مو خارج يحرس انما داخل للصالة .. هذه التصرفاااات صحيحة يا كبيرة يا عاقلة يا مؤدبة !
بابا انت مصدق شوان ؟
اسمع منج يا بنتي .. شوان غلطان تمام فسريلي
وقت اللي تجادلنا بالحديقة وطلعت بلا ما اخذ ملابس قوية ونزلت ع النهر جانت باردة والرجل انطاني قمصلته .. واني خابرته بالامس وطلبت منه ارجع الساعة ٣ بالليل للبيت ما ارتاحيت ابيت ماما جان المفروض تسألني شنو اللي رجعني من بيت امي بالليل بدل متشك بيه لو كنت فعلاً رايد مصلحتي
بس مدام مصدكه لشوان ومسامحه على تجاوزه وتعدي ..
لا بابا لهنا وكافي .. مستحيل اقبل وراح احطله حد
شوان غلطان .. امج هم غلطانة يا فيان
ماما شبيها !؟
خابرتها وسألتها عن اذا كنتي يمها البارحة وحجتلي انت طلبتي السايق بالليل وطلبت مني ابطل السايق لإن انت عندج شي اتجاهه .. الكل غلطان بتفسير وضعج بس انت الصحيح لو هذا نكران
حجه الكلمة اني عقلي مكان يستوعب شحجه بعدها كتله لا لحظة بابا ، ماما كلتلك انو اني عندي شي ويا السايق !
روحي خابريها واتأكدي .
انتم فعلا خيبة امل ..
كمت من مكاني بسرعة وتجمعت الدموع بعيوني ثق بالكل وصدكهم ميهمني لكن خلي يكون بعلمكم مراح يصير اللي تردوه ابدا .. ابد
جريت جنطيتي وطلعت من المكان ..
وهو يصيح وراي فيان ، فيااااان .
اتجاهلته ومشيت .. طلعت السايق احمد يم السيارة ركبت وكتله اتحرك بدون توقف
بس ست كاكا ديصيح
نفذذذذذذ
داس بيها ومشى وتركت ابويه ورايا .. وصلت للدائرة .. صعدت بلا ما اباوع لأي احد الافكار تقرا براسي وبودي اتخلص منهم كلهم .. حجيت بشعوري لأمي وراحت حجت لابويا بسرعة ! اذا امي هيج بمنو بعد اثق واحجي وافضفض .. لمنو اكول اللي احس بيه ومنو يسمعني بلا ميفضحني اذا امي سوت بيه هيج !
ردت ادخل المكتب .. الباب مقفل !
عقدت حاجبي واني اريد اندار .. لكيت هوشيار بمكتب السكرتارية اللي عزلته منه البارحة شجابك لهنا .. وليش الباب مقفل
اوامر كاكا دلشاد ست
هو امر يرجعك لمكانك
لا ، امر يعين الاستاذ شوان مدير ادارة بمكانج مؤقتاً ..
يعين شوان مكاني !
هذه الاوامر ست
بقيت واكفة مصدومة مدا استوعب اللي ديصير !
اختنكت على كمية القهر اللي نزلت على راسي .. انداريت طلعت من الدائرة فوراً .. سبقني احمد للسيارة صحت انطيني السويج
ست كاكا دلشاد
تروح لكاكا دلشاد تشتغل عنده وتسمع اوامرررررررره ، جيب
انطانياه بدون تردد لما عطت اخذته وصعدت كدام الستيرن .. دست بالسيارة حيل .. دموعي تجري ومصدومة من تصرفهم كلهم .. بابا ماما .. هلكد اني رخيصة عدهم !
وكفت كدام المصرف .. نزلت من السيارة بلا ما اقفلها وتوجهت لغرفة الادارة .. تعديت غرفة السكرتير ودخلت على الغرفة اللي بيها اني فوراً
وضربت الباب ورايا ..
