على حافة الثأر بقلم زينب ماجد الحلقة الثامنة

ارجع للبيت كلش تعبانة
ابتسم وهو يكلي تأمرين
خابر على اخوه .. وهو يكلي يلا
وامك
راح يجي محمد
ترجع لهنا
احتمال .
صعدت ركبت اني وياه وطلعنا للبيت .. وصلت كتله ارجعلها اني راح ادخل اقفل وانام .
دخلت البيت قفلت كلشي ونمت .. لثاني يوم بااليل تقريبا الساعة ٣ بالليل .. جنت كلش عطشانة وجوعانة .. نزلت للمطبخ .. اخذت مي من البراد دا اشرب گني شفت سيارتي بالكراج
سحبت البردة .. موجودة 
فتحت الباب جان الجو كلش بارد .. طلعت من مكاني رحت لغرفة الحرس .. فتحت الباب انفتح مسدود الضوا .. فتحته .. شفت عباس نايم وغاط بنومته .
ضليت اباوع عليه 
اني من كل عقلي متعلقة بشخص مثله ودا اتمناه !؟ 
وليش حتى ما اتمناه ؟ شينقصه .. بس فلوس ! واللي عنده فلوس بشنو احسن منه .. مشفت احد عاملني بهالمسؤلية والاهتمام لا ابو فاوس ولا بدونها .
يا خوفي اني دا امشي على خطوات اختي ودا اضيع نفسي بهالإنسان العربي مثل مكالت امي .
تنهدت وطلعت رجعت للبيت قفلت الباب 
شغلت اغنية كردية هادئة ... وفتحت الثلاجة جوعانة بس ما اعرف شاكل ما احب الاكل البايت او الباقي بالثلاجة وما اعرف اطبخ ابد .
سويت فنجان كهوة وكصيت كيك وحطيت واخذت كتاب كعدت اقرأ .. صارت الافكار تتراكم عليه .. من يوم دخل عباس بحياتي واني نسيت اختي .. ونسيت اللي كتلوها وخلوها جوا التراب ..
مراح ارتاح اذا ما انتقم من اللي كتلها وعاش حياته 
فلا اخلي يرتاح واختي ميتة !
دا افكر .. اندزتلي رسالك ع الخط 
باوعتها عباس فتحتها .. كاتب الضوا مفتوح كاعدة ؟ 
كتبتله اي كعدت 
اي زين معناها صباح الخير
ابتسمت معناها صباح النور 
مجاوبت بقيت متبسمة .. 
كمت من مكاني .. وسحبت البردة .. هو ساد الباب.
انتظرت رسالة ما اعرف ليش او يكوم يطلع او تبدر منه اي حركة غير متوقعه بس مسوا .. رجعت لمكاني وسديت الكتاب مكمت اعرف افكر غير بيه وبتصايحه وتوجيهه .
مرت ساعة .. 
دز رسالة .. بسرعة فزيت ع الرنة فتحتها 
كاتب ست اني ميت من الجوع اكو شي ينكول 
اتصلت .. رد صباح الخير
تنهد يا مرحبا وكل الهلا
جوعان
كلش
اني همينه
معناها سويلنا شي ينوكل
ما اعرف اسوي !
اي عاد اسلكيلنا بيض هم ما تعرفيلها
لحظة تبقى ويايا ع الخط وتعلمني
اعلمج ع البيض سلك ! ها زين خير ان شاءلله
لتلغي زايد تلعمني لو تبقى جوعان !؟
ضحك انعلمج انعل ابو الما يعلمج
ضحكت طلعت الجدر
صلاوات اتاكدي لا تطلع طارة ونتخزى
لا هيانه جدر متأكدة
عفية
هسه شنسوي
برايج بيش ينسلك البيض ؟
بيش
بامي
بامك ! شلون يعني
بالمي يمعودة من اسمه سلك يعني متلك يعني مي
ها مي اوكي 
هاي حطيته جوا المي كم بيضة
اني يكفني ٥ وانت
عزا شدعوى
ست هن بيضات رحمة لاهلج راح تخسر من فلوسج الف
مو موضوع فلوس الكمية هواي
خليهن سبعة لعد
صدك !!
لا جذووووب خليهن خمسة
ليش دا تقلد
حجيج تحسه نقانق على كولة المثقفين
نقانق
اي هذا الصوصجً
شنو الربط عباس
يا بويه اني هيج احس
اوكي حر باحساسك بس كرلي بعد شسوي
حطي تيزاب
وبا البيض عزا شلون ميصير
صدووووك
لا جديات ينحط تيزاب !
دشعلي النار هنيال الياخذج شعلي
على فكرة انت تدري انو اني المديرة مالتك
صدوووووك
عباس حفصلك
هههههههههههه
شغلت النار .. هسه بعد شنو
الجاي .. شغلته مثل البيض بس حطي مي وجاي وعوفي ع النار
سويت .. وكتله
شكد احط جاي
بكيفج
حطيت خمسة
دبس هذا مو جاي
لازم اقل
لا عادي اول فورتين طفي
اوكي .. شسويت البارحة
يعني مثلا
امك
ها التحليل كم يوم ويطلع
مو لازم عملية باسرع وقت
اي .. بس الله كريم
محتاج فلوس
وليش هالسؤال
يعني في حال احتاجيت
وادا احتاجيت
انطيك
بمناسبة شنو ؟
مساعدة
هممم شكرا اني يكفيني اخذ راتبي
بس دا تسوي امور اكثر من واجبك
وان .. ما مسويها حتى احصل فلوس مقابيلها
لعد ليش دا تساعدني
حتى تسويلي چاي
سكتت .. بس احس خدودي حمرن توترت عركت خجلت ،. 
حجه ست
همم
لازم تفسخين خطبتج بأسرع وكت
ليش
احسن
بشنو
بكلشي حلو تصيرين حرة
بشنو حيفيدك الموضوع
كمل البيض
ابتسمت واني اباوع للبيض لا
شكلنا راح ننتظر هواي
لعد خلي افاجئك
بشنو
خبز مدا الكىً
يعني ماكو
لا
اروح اجيب الكي افران مفتحة هسه الساعة ٥
ما اعرف
لحظة
سده من عندي 
انداريت للشباك شفته طلع 
اسمراني وشخصيته وملامحه كلش تجذب 
تحس اكو معالم رجولة تشع من اوصافه 
بكلماته بمواقفه باهتمامه .. حتى ويا اهله شفته هو اللي قائم باخته وامه رغم عنده اكبر منه .
تنهدت وذبيت حسرة .. 
راح تقريبا ربع ساعة ورجع .. دك الجام .. فتحت الشباك 
حجه ان شاءالله الجاي والبيض بعدهن عن النار
اي
عفية ، عفية بالسلاعية عفية بالمعدلة
ليش
دعوفي البيض وغيري الجاي
شلته من ايده جانت حامي نفرته بسرعة تبدى ع الطباخ 
حجه معدلة بووووية هي كوة
لتبقى تستهزأ افتهمت لو لا
ابتسم زين هسه بس امسحي
شأمسح الجاااي
جا يضل مبدى
لا اظافري تنصبغ اصفر ام غيث تجي وتنظفه
وشراح نشرب
اكو وحدات لبتون ومي حار بالبراد
الجاي لا ما يتخدر ما يكعد الراس
اكولك ترا اني مو مرتك وكاعد دا تتامر عليه بمزاجك وتريد تكعد راسك براسي
هو انت لو مرتي غير امشيج ع الصراط المستقيم ومحمد
عقدت حاجبي لا وشتسوي بالله
ابتسم اسف
لا بالله احجي شتسوي
جان سويتلج الأكل بيدي ما واكف مثل المسجون من ورا الشباك
ابتسمت وانداريت عنه .. وحجيت تمام حخاول اغسل القوري واسوي جديد .. اخذت المسكة مال الايد وشمرت القوري جوا المي سويتها خبيصة من الجاي ورجعت ترسته من جديد
انداريت لكينه مركز بيه .. 
حجيت المطبخ صار ثلج من الشباك
هو انت ثلج الثلج بيش يأثر بيج
شنو قصدك !؟
ولا شي
شكد احط جاي
اثنين بس
حطيت وخليته ع النار 
حجه ابوج بشنو شاك بيج هو وامج
انو اني عندي شي وياك
هم طبيعي كل مرة يشكون
ابدا مصار مرة وشكوا بيه او عاملوني هشكل
وتعتقدين ليش شكو
مفتهمين غلط
متأكدة ؟
شتقصد!
اللي اقصده اذا مو عادتهم يشكون بيج فشنو اللي خلاهم هالمرة يشكون ويتصرفون هيج .. شنو اللي اتغير بيج حتى وصلهم للشك اللي هم بيه
ما اعرف روح أسالهم
سكت ومشى .. انداريت معقولة حس اني عندي شي لو شعور اتجاهه .. اني ملازم اتصرف هشكل طبيعي يشكون ما مرة صارت وسايق اتجرا يوكف ويايا بهيج ساعة يضحك ويطلب مني اكل واني مستقبله الموضوع بكل اريحية .
حطيت البيض والجاي بصينية وتركتها بالباب وسديته وسويت لفة صغيرة وطبيت جوة ،. دزلي رسالة ششكرا على الريوك بس 
عقدت حاجبي وكتبتله شنو بس 
حسيت نفسي الجلب اللي ويا بزونة وفارة من يحطوله الاكل بالباب
قصدك توم وجيري
اي
مجاوبته بس شغل بالي بقيت هواية افكر .. 
صعدت كمت ابدل وارتب نفسي لحد ما نزلت الساعة ٧ ونص .. صعدت وياه ورحنا لمحكمة الكرخ .. رفعت دعوى على شوان .. والشاهد عباس باعتداء ع البيت .. وحطيت مكان الدائرة ودفعت فلوس حتى تطلع الدعوى فورا ووكلت محامي يتولى القضية عني ورجعت للبيت وبلغت عباس يروح لبيتهم .
ب١٢ وصلت الدعوى للدائرة 
شوان متخبل من جاية دعوى قانونية بحقه .. مبلغ ابويه 
وبابا عايف كلشي من ايده واجا ع البيت كبل .. جنت ماعدة وام غيث مسوية غدا .. طب بابا
صاح فيان ، ويييينج فيان
سمعته واني كاعدة بالمطبخ .. 
وام غيث تكوله هياتها كاكا
دخا وهو يصيح ولج وصلت بيج الصلافة تطلعين الساقط مالج و ترفعين دعوى على زوجج واحنا بنص انتخااااابات ..
لو احد عرف من منافسيني لو احد سمع بالصار مفكرتي شنو موقفي
ومفكرت شنو موقفي لما انطرد من مكاني ويتفضل شوان عليه .. ومتحاسبه على تعدي وضربه ! اني جنت معتبرتك سند وانت تدافعلي بس مدام صرت سند لشوان من بعد الله اني استند للقانون وراح ارفع عليه دعوى بحجة ابتزاز حتى اتزوجه وراح استخدم وياه كل الاحرائات اللازمة بحق من اتعدى عليه وطعن بيه واخذ حقي
ضربني راشدي .. حجيت ضربك مراح يغير من موقفي شي
لج تتعدين عليه فيااااان ، ترفعين دعاوي واني داخل انتخااااابات
هالموضوع ماله خص بابا .. كان يفترض انت تحله لكن انت فضلت انعان فشنو غير القانون ينصفني اذا انت ابويه مستدتني او انصفتني
هسه تروحين تتنازلين عن الدعوووووى فورا
هسه اغلقت المحاكم وباجر جمعة ووراها سبت .. والصراحة السبت ابالي اطلع للأردن اقدم على فيزا لأيطاليا دا اروح اشوف اخويا وعائلته مشتاقتله
لو اتعديتي باب البيت راح ادفنج وانت عايشة .. وزواجج من شوان راح يتنفدذ باسرع وقت ..
حجاها وطلع من البيت .. 
حجت ام غيث .. خالة ولو تدخل بس ميصير توكفين بوجه ابوج مو صحيح مهما كان وابوج يحبج
شوفي شغلج خالة 
اني صاعدة فوك
صعدت لغرفتي واني افكر اطلع لحد ما الدعوى تخلص ويصير فد اجراء بحق شوان ويتأدب بس اعرف ابويه راح يطلعه من الشعره من العجين وراح يستر عليه ومراح استفاد بكد ما راح انضر .
اتصلت بعباس .. رد 
الو ست
بابا اجا وجان كلش عصبي وهددني يزوجني غصب لشوان لو بقيت
اي
دا افكر اطلع هالفترة وابتعد .. شتكول
ما ادري
شبيك ..
ماكو شي
لا اكو دا احس عندك كلام
متضايق شوية
من شنو ؟
امور بالبيت
اللي هي
شغلات تخص حالة امي
شصار وياها
تعبت وجبناها للدكتور هسه
باي عيادة
لتعبين نفسج
كولي يا عيادة وبلا كلام
انطاني اسم العيادة كمت لبست وتوجهت الها .. وصلت هناك هو منتظر بالسيارة وعلياء وامه بالعيادة فتت اطمن على امه كامت تشكرني هواية
حجيت ويا علياء شلونها الحجية اني اعرف هي متدري بحالتها
والله يا اخيت حالها يقهر بس شسوي لازم عملية باسرع وقت واذا باسرع وقت على حسابنا ..
اشتروها مو مهم الفلوس المهم الحجية تكوم بخير
هو لو بدينا يا خية نشتريهاب ارواحنا بس العين بصيرة والايد كصيرة
شكد عمليتها
شمدريني والله ب٩ ملايين هالانضرب المسكين على راسه على الله ويابو علي اشتغل وشال روحه طاحت امي وهاي بعد حظنا.
سهلة المهم صحة الحجية مو مهم الفلوس
طايح بدينا صحتها يخيه وما اشتريناها
عفتها وطلعت لعبتس كتله لتنقهر ولتفكر بسالفة فلوس سهلة شكد منكون عمليتها اني راح ادفعها واذا.... قاطعني
ست مشكورة بس اني ابنها واني اعرف ادبر فلوس عمليتها
ومن وين دا اجيبهم
اداين اخذ قرض اخذ فايز احرك روحي اكو اطلع فلوس واجيب لشيلين هم
ليش هاكد عصبي
ست تعبان والقرآن .. اسف
انتجيت ع السيارة وياه وبقيت اباوع وافكر .. 
حجيت يمكن اللي راح اكوله مو صح بس اذا طلبت منك شي تنفذه
عقد حاجبه شنو
استخدمك ولتخاف مراح اخلي شي يضرك
شلون تستخدميني
عندي فكرة براسي واذا وافقت راح اجبر بابا وشوان واوكف بوجههم
شلون
نتزوج بعقد محكمة 
مدا اطلب منك زواج حقيقي فيك
ولو وافقت راح انطيك ثمن هالمهمة وراح ارضيك بس تساعدني باللي افكر بيه ..... يتبع
___________
زينب_ماجد