رواية نور والمجنون الحلقة الأولي بقلم محمد منصور حصريه وجديده

يا سليمان.. أنت معندكش حاجة تعملها بدل ما أنت قاعد لي كده؟
سليمان إيه.. زهقتي مني؟
صفاء قامت أنا راجعة تعبانة وداخلة أنام.
سليمان بص للشاشة وقال بنبرة هادية ومخيفة
هتنامي مرتاحة إزاي.. وفي بنت غلبانة قاعدة مع ابنك، الله أعلم هيطلع عليها الصبح ولا لأ؟!
صفاء التفتت وقالت ابنك شاب ولازم يعيش مع ست، ودة كلام الدكتور عشان حالته تستقر.. واللي قاعدة معاه دي قاعدة بمزاجها وبثمنها مش غصب.. ريح نفسك أنت.
وفي نفس الليلة.. الساعة 2 بعد نص الليل. الجو غيم وضلمة كحل عند المقابر اللي اتدفنت فيها نور.
كان صقر واقف ومعه صاحبه وسلاحه تيمور.
تيمور كان بيرتعش وقال بخوف
ولا يا صقر.. الاستروكس اللي بتشربه ده موديك في سكة مش حلوة! أنت جايب فستان فرح ده جنون يا صاحبي!
صقر ضحك ضحكة شريرة وعينيه برقت
ما أنت عارف أنا كنت بحبها قد إيه وهي عايشة.. وهي رفضتني ودست على كرامتي! فجت فرصتي يا تيمور.
تيمور يا صاحبي بلاش.. أنا خايف من المشوار ده، المقابر ليها حرمة.
صقر زقه متبقاش خورة يلا وجمد قلبك.. سيب لي نفسك.
تيمور والتربي اللي هنا؟
صقر بخبث أنا ظبطت أمله.. اديته حتة دين أفيونة هتخليه ينام وميصحاش إلا بكرة العصر.
اتحرك صقر ناحية الجبانة، كسر القفل الحديد ودخل، وشغل كشاف الموبيل. بدأ يقرب ويمسح بالكشاف على الوشوش اللي برة الكفن.. وشه اتغير وفضل يدور ويدور.. ملقاش وش نور!
بص ل تيمور بصدمة وزعق
نور مش موجودة!!
تيمور برعب أنت متأكد إن دي الجبانة اللي اندفنت فيها؟
صقر متأكد وربع! ده أنا كنت براقبهم من بعيد وهما بيدفنوا، وشوفت بعيني رياض وهو بيحط بنته هنا ويقفل عليها!
تيمور ولسانه بيتقل من الخوف وده.. وده معناه إيه؟
صقر ملامحه اتحولت، وابتسم ابتسامة خبيثة ومخيفة وقال
معناه.. إن الأبلة نور، مهندسة الكمبيوتر، لسة عايشة! وهربانة من الماضي بتاعها.. بس على مين؟ ورحمة أمي لأعرف هي فين! وأنت.. إياك بقك ده يتفتح بكلمة ل حد إننا عرفنا إنها عايشة.. سامع؟
تيمور يا عم أنا مالي.. يلا نخرج من هنا!
خرجوا الإثنين من الجبانة.. وعينين صقر كانت بتطق شر، وناوي على مصيبة!
يا ترى صقر هيعمل إيه؟ وهيعرف يوصل لنور وهي في فيلا المستشار ولا لأ؟
وعماد هيعمل إيه مع نور ليلى الجديدة في الأيام اللي جاية؟
ده اللي هعرفهالكم بكرة بإذن الله في الحلقة الثانية..
لو عجبتكم الحلقة، سيبوا تعليق بكلمة تم عشان نكمل، ولو في أي ملاحظة برضه عرفوني في التعليقات.. مستني رأيكم يا أحلى متابعين ومتبخلوش بالدعم عشان القصة توصل للكل!