الحلقة الثالثة بحبك يا ولا ​بقلمي محمد منصور حصريه وجديده

الحلقة الثالثة بحبك يا ولا بقلمي محمد منصور منص حصريه وجديده 
قبل ما نبدأ الحلقة نوحد الله ونصلي على خير خلق الله سيدنا محمد. وعلى بركة الله نبدأ..
بسم الله توكلت على الله، وهو رب العرش العظيم
وتزق سوسو الولا تامر بعيد عنها، بس ابن المفجوعة يقوم ويهجم عليها تاني ويكتم نفسها! ويسحبها لجوه أوضة في الجنينة ويقفل الباب وراه. سوسو ما تكدبش خبر، تروح رزعاه عضّة تمام في إيده، وتزقه تاني وتخلع من الأوضة وهي بتجري بأقصى سرعة ناحية القصر كأنها بتجري في سباق 100 متر ألمبياد!
وفي نفس اللحظة، يخرج أبا من المكتب وفي إيده شنطة فلوس محترمة، ومعاه بدير وهما عمالين يكركروا من الضحك. يبص لهم حسنس، فبدير يقوله
خلاص يا حسنس، اتفقت مع الأستاذ أبا وهنبدأ تصوير من بكرة!
حسنس وهو طاير من الفرحة
أخيرًا يا فرج الله! بدير، مش عايز أي وقت يضيع تاني.
بدير 
ولا دقيقة هتضيع! من بكرة هنكمل الفيلم.
وفجأة.. تدخل سوسو القصر وهي بتعيط ومنهارة من اللي كان هيحصل لها من تامر، وتصرخ بعلو صوتها
يا بااااا! أنت فين؟ تعالى شوف اللي كان هيحصل لبنتك يا حاج!
يتجه ناحيتها حسنس ومعاه بدير، ويقول حسنس بخضة
مالك يا سوسو؟ فيه إيه؟
سوسو وهي بتعيط وزعلانه ابنك قليل الرباية كان عايز... وتسكت مكسوفة تكمل.
بدير كان عايز إيه؟ اتكلمي يا بنتي، قطعتي خلفنا!
سوسو مش قادرة أكمل.. أنا يستحيل أقعد في البيت ده ثانية واحدة كمان!
ينضم لهم عطوة، ويشوف بنته وهي بتعيط وفي حالة تصعب على الكافر، فيقول
مالك يا سوسو؟ مين يزعل القطة؟
سوسو ترتمي في حضنه وهي مقهورة يلا يا با نمشي من هنا، المكان ده شؤم!
عطوة هنمشي، بس اعرف الأول إيه اللي حصل ومين اللي زعل شمعة بيتنا؟
سوسو الولا اللي اسمه تامر ده، كان عايز يضحك عليا ويعمل معايا حركة نذالة وقليلة الأدب!
عطوة بعصبية وشياطين وشّه بتتنطط هي حصلت؟!
يبص لحسنس ويقول هو أنت جايبنا معاك هنا علشان ابنك السلعوة ده يسرق شرف بنتي؟!
حسنس بإحراج ومكسوف من نفسه لا طبعًا! أنا راجل صعيدي وعندنا النخوة بتنقط من الجلابية، إزاي أقبل إن ابني يضحك على بنات الناس؟ بس الظاهر إن دلعي الزايد ليه خلاه يطلع نطع ومش راجل!
بدير 
عطوة.. خد بنتك واطلع فوق أوضتكم وحقها هيجيلكم لحد عندكم متبل ومترستك.
عطوة 
انسى يا بيه! أنا يستحيل أقعد أنا وبنتي هنا ولو حصل إيه.. وحقنا من ابنكم ربنا قادر يجيبه وياخده تالت ومتلت!
ياخد عطوة بنته ويستعد عشان يخرجوا من القصر، بس بدير يقف قدامهم بسرعة ويقول
طيب والفيلم يا حاج عطوة؟!
عطوة 
فيلم إيه وزفت إيه على دماغك! بقولك شرف بنتي كان هيضيع، تقولي فيلم
بدير 
هديك ضعف اللي اتفقنا عليه!
عطوة 
وفر فلوسك يا بيه في جيبك، عشان مش هيبقى ليها أي لازمة يوم ما بنتي تنحرق بنار ابنكم
يبعد عطوة بدير عن طريقه، بس بدير يقف قدامه تاني مصمم. حسنس يبص لبدير ويقوله بأسى
سيب الناس تمشي يا بدير.. ما ينفعش يقعدوا ثانية واحدة بعد اللي حصل.
بدير 
بعد كل اللي عملناه؟!
حسنس بحسرة 
اللي عمله ابني خلاني مكسوف من خيالي ومش هقدر أرفع عيني في وش عطوة وبنته تاني.
بدير 
كل مشكلة ولها حل يا حسنس.
يبص عطوة لبدير بغضب ويقول
لو كانت بنتك اللي اتعرضت لكده، كنت قولت كل مشكلة ولها حل برضه؟!
بدير يسكت وما يعرفش يرد، فيكمل عطوة 
بص يا بيه.. أنا صحيح غبي، وصحيح بهزر كتير وبحب الضحك والفرفشة.. بس لغاية الشرف الهزار بيموت لان ما فيش بعد الشرف
يبعد عطوة بدير عن طريقه بكتفه، وياخد سوسو ويخرجوا من القصر، وأبا واقف في الزاوية بيراقب كل اللي بيحصل بتركيز شديد وكأنه بيكتب تقرير!
وفي الليل.. ومن جوه القصر، قاعد تامر بمنتهى البرود ولا على باله، حاطط رجل على رجل قدام أبوه حسنس وبدير، ويبص لهم ويقول بكل بجاحة
تامر 
هو أنتم عاملين لي محكمة شعبية ولا إيه؟ ما خلاص.. اللي حصل حصل!
حسنس 
الظاهر إني هبتدي أشرب المر والقطران بسبب دلعي ليك يا فاشل.
تامر
يا بابا ما تكبرش الموضوع! دي حتة بت بلدي ما تسواش اتنين جنيه في سوق الجملة، وبدل ما تحمد ربنا إن واحد وسيم ودمه خفيف زيي بص لها، نازلة تتنك وتعمل فيها خضرة الشريفة!
حسنس 
هي فعلاً شريفة! وشرفها ده يخليها تساوي فلوس الدنيا كلها، مش اتنين جنيه يا نطع!
تامر ينفخ بملل 
أوففف.. ما خلصنا بقى!
يقوم حسنس فجأة، ويرزع تامر قلم تمام على وشه يرن في القصر كله، ويقول بعصبية
لا ما خلصناش! البت دي اتهانت في بيتي وتحت حمايتي، ولازم تروح لحد عندها وتعتذر لها ورجلك فوق رقبتك!
تامر وهو حاطط إيده على خده وبصدمة
بتضربني يا بابا؟!
حسنس 
أنا قبل ما أكون واحد ربنا فتحها عليه ومعاه فلوس، ف أنا راجل صعيدي وجزار وابن بلد دمي حر! ولو خسيس زيك عمل مع بنتي كده، كنت دبحته وعلّقته على باب المحل وبعت لحمته الزفرة للكلاب برخص التراب!
يقوم تامر ويستعد عشان يمشي، بس حسنس يزقه في صدره يرجعه يقعد مكان تاني بغضب
أنا لسه ما خلصتش كلامي يا روح أمك!
تامر
تعرف إن دي أول مرة تضربني فيها في حياتك؟
حسنس 
وتعرف إني اتأخرت قوي عقبال ما ضربتك القلم ده؟ كان المفروض تاخده من زمان!
تامر
تمام.. إيه المطلوب مني بقى بعد القلم دة 
حسنس
تروح لعطوة وبنته وتتأسف لهم وتبوس على رأسهم