رأيتك صدفه الفصل الاول بقلم الكاتبه صفاء حسني حصريه وجديده

«البسي ده يا أريج، ومتعيطيش. ولما تلبسيها يشوفك».
فهمتني وقتها أشجان وعرفت إني كنت بعيط ليه، وفعلاً أخدت الهدوم ولبستها.
تاني يوم بعد صلاة الجمعة، وقت الغدا، بعد ما خلصت شغل البيت معاهم، طبعًا لازم أسعدهم، والمرة دي بمحبة، مش مجرد خدامة زي عند أبوي. وبعد كده استحميت وقعدت معاهم.
الكل انتبه لفستاني… إلا أجود.
ياسر ابن خالتي، وملك، ومحمود، وخالي وخالتي، ومرات خالي، حتى جدي… إلا أجود، كأنه مش شايفني أصلًا.
كل اللي عمله بعد ما خلصنا غدا وقومت، ضحك وقرب من ودني وقال:
«يعني الغيرة وصلت إنك تلبسي نفس الفستان بتاع حبيبتي؟ عايزة تعرفيني إنك شوفْتينا مع بعض؟»
وقتها نزلت دموعي، كنت عايزة أحلف إني معرفتش إنه شبه فستانها، ومش أنا اللي اشتريته، لكن صوتي انحشر جوايا. كانت دموعي بتنزل وبس.
وقتها لما سألوني:
«مالك؟»
قلت:
«وحشني بابا وإخواتي».
جه أجود واتريق عليا تاني:
«ياه يا نوغة يا صغنن، يالا عايزة بابا. بقولكم دي ملهاش في العيشة بتاعتنا، وبتنخ بسرعة».
وقتها خالتي ومرات خالي قالوا:
«حرام عليك يا أجود، دي أريج أشطر من أختك أشجان وملك كمان، وبتعمل كل حاجة معانا».
ضحك أجود وقال:
«برضه هتفضل بنت بندر، ومش قد عيشة الفلاحين».
باك…
مسحت دموعها أريج.
أنا دلوقتي أثبتلك يا أجود إني قد العيشة هنا، وهكمل تعليمي هنا. والحمد لله ربنا استجاب لي، وطردني أبوي ومراته من بيتهم، وطلبت خالي ينقلني.
أنا داخلة على البلد، لكن لا… مش هدخل بالفستان ده.
طلبت من خالي:
«ممكن يا خالي تجيبلي هدوم قبل ما نروح على البيت؟ كل مرة كنت بكون ضيفة خفيفة، مش بحب أتقل عليكم».
ورغم كده كانت أشجان بتجيب لي، بس لما كنت أروح عند مراته كانت تاخدهم مني.
ربط خالي عبد الرحمن على كتفي وطلب من السواق:
«خدنا على مول المنطقة يا محروس».
وفعلًا دخلت أشتري ليّا شنطة سفر، وقال لي:
«حطي كل اللي تحبيه يا بنت الغالي. كل مستلزماتك إنتِ من النهارده ملزوم مني لحد ما أموت، وبعدي أجود كمان يكون ملزوم بيك».
رفضت أريج وقالت:
«إنت آه، لكن أجود مش بيحبني، بيكرهني، وعمره ما يقف معايا زي بابا بالظبط. يبقى كل همه مراته وحبيبته، بس إنت وجدي بس اللي بتحبوني».
ضحك عبد الرحمن على تشبيهها لأجود:
«يعني بتشبهي أجود بأبوكي للدرجة دي؟»
هزت راسها أريج:
«آه يا خالو، وأنا ناوية أجيب هدوم حلوة مخصوص عشان ما يفتكرنيش إني بقلد حد، وهجيب هدوم البندر اللي مش عاجباه كمان».
ضحك عبد الرحمن وقال:
«جيبي اللي تحبيه يا أريج».
وفعلًا لبست بنطلون جينز رصاص غامق، وبلوزة بيضا شكلها شيك، وظبطت شعرها. كانت حلوة جدًا.
خرجت أريج، كبر عبد الرحمن لما شافها:
«الله أكبر، تبارك الله فيما خلق. إنتِ كنتِ مخبية الجمال ده فين يا بنت صفية؟ منه لله أبوكي اللي كان مخلي مراته تتحكم فيك. دلوقتي هتعجبي أجود غصب عنه وعن أبوه».
ركبت العربية أريج، ولبست الحجاب على شعرها، وكلها ثقة.
ووصلت العربية على البلد، وأول ما قربت من البيت وفتح السواق العربية ونزلت أريج، الكل انبهر بجمالها، واللي بقى يسأل:
«مين دي يا حاج عبد الرحمن؟»
كان في نفس الوقت قاعد أجود في الداخل، سمع الأصوات وخرج يشوف في إيه… وفجأة—
تابع…