الحلقة الثالثة ضرتي من الجن من تاليفي محمد منصور

امتي بتشربي سجاير
سعده باستغراب
سجاير. حد الله ابدا ولا حتي بطيق ريحتها
سلامه
اومال مين اللي حرق شعري كده
سعده وهي بتضحك
يا حسره. هو فين شعرك ده اللي يتحرق
سلامه غاضبا
الشويه. اللي كانو علي الاجناب
سعده وهي بتبص علي راسه
ولا اعرف عن شعرك حاجه
سلامه
كده. طيب انا هاحلق زلبطه خالص عشان اريحك
سعده بحنيه 
احلق يا سبعي وخد راحتك علي الاخر
وتقرب منه وتقوله وهي بتلعب في قرعته
بس تعرف انك طلعت شقي اوي. واحسن من جوزي الاولاني
فيستغرب سلامه ويبص حوالين منه وميلقيش حد غيره في الاوضة فيقول
انتي بتكلميني انا
فتضحك سعده وتقول
اومال بكلم مين. انا اول مره احب الجواز مع ان ماكنش يبان عليك انك قوي كده. ده انا حسيت انك اكتر من واحد. هو ايه القرع كلهم كدة صحتهم حلوه
سلامه باستغراب 
القرع . هو انتي بتكلمي علي ايه بالظبط عشان شكله هايبقي يوم ملحوس علي اللي جابك
فتضحك سعده اكثر واكثر. وتقول
بتكلم علي امبارح بالليل بعد مالنور اطفي
سلامه غاضبا
اهلا. هو كمان النور اطفئ انت باين كده بتكلمي علي واحد اقرع غيري
فتقعد سارة علي كتفه وتمسك ودنه وتقول له.
لا انت يا حمار. سعيد مراتك مايعرفش انه نام امبارح وهو واقف
سلامه
اسمها سعده. مش سعيد
سارة
مش مهم الاسم. المهم اني شوفت واحد في الشارع شبهك بالظبط جيبته وخليته يقضي معها الليله عشان ماتحسش بحاجه.
سلامه بعصبيه
وحياة امك. طيب ما انا موجود. يعني اصرف واكلف وأشطب واكتب كتابي عشان واحد غيري يخش عليها
سارة
ده كده وكده.
سلامه
يعني ايه كده وكده
سارة
ده كان مجرد حلم هي بتحلمه. عشان كلام الناس مايكترش عليك
سلامه
حلم. ايه. دي بتقول لك القرع كلهم صحتهم حلوة وانها حسيت اني كنت اكتر من واحد
سارة
ماهو وانا بلف في الشارع زهقانه لقيت واحد اقرع تاني وفي شبه منك اكتر من الاولاني فجيبته معايا. ودخل لها الحلم
سلامه
الله عليكي. اي حد شبهي يخش عليها عادي. لكن انا لا.
سارة
طبعا. انت لا. لما تخش عليه انا الاول بعد كده تخش عليها
ويسمع صوت ابوه سعده عم طنطاوي وهو قاعد علي السربر معه في اوضه النوم وبيقول له
حبيب عمك. يا رافع راسي
فيستغرب سلامه ويقول
هو في يا عمي ماتستني لما اخرج لك. حبك يعني تبارك لي في اوضه النوم
طنطاوي
فرحان بيك يا حبيب عمك
وتخرج سعده وترجع وهي شايله صنية عليها عصير فيقف طنطاوي وهو فرحان جدا. ويقول
انبسطي يا حبيبه بابا
سعده
اوي اوي. يا بابا
وهو بيقول
يعني ده احسن من جوزك الاولاني
سعده
بابا بتكسف. 
وتضحك سعده ضحكه وتقول
ده اقوي منه ميت مره
طنطاوي وهو بيبص لسلامه ويقول
يا رافع راسي
سلامه
علي فكره انت كل دا غلط مش انا صاحب الانجاز
سارة وهي لسة قاعدة علي كتف سلامه وبتقول له
هو ماله الراجل ده فرحان قوي كده ان بنته لعبت تيكا علي العالي وتيكا علي الواطي. لا وكمان اداها فلوس
سلامه
هو الجواز عندنا في مصر كده الاب والام بيفرحوا ان بنتهم اتسترت ،،،،
وبعدها بكام ساعه وبالليل يقعد سلامه علي سريره وقصاد منه سعده وقدام منهم فلوس النقطه اللي لموها من قرايبهم وفجاة تظهر له سارة وتقعد علي الفلوس وتقول
ايه الفلوس دي كلها يا سلامه
فيبص لها سلامه ويرجع يبص لسعده لانه مش عايزها تحس انه بيكلم حد وتفتكره مجنون. فتبص سارة لسعدة وتقول
نام انت يا سعيد
وتنام سعده وهي قاعدة فتزقها سارة فتقع سعده من فوق السرير فيبص لها سلامه ويقول
اوعي تجيبي حد من الشارع تاني. يخش عليها. وبعدين بقي حرام عليكي نيمتيها ليه. عايز ادخل يا وليه.
سارة وهي مربعه وبتمسك فلوس النقطة
ما تغيرش الموضوع. ايه الفلوس دي كلها
سلامه بزهق
دي فلوس النقطه. اللي اتلمت
سارة
يعني أيه نقطه.
سلامه
يعني العريس لما يتجوز بيجي قرايب العروسه وصحابها وينقطوها. وقرايب العريس وصحابه ينقطو
سارة
طيب ما انا كمان عايزا حد ينقطني
سلامه
خلي قرايبك وصحابك يجيوا ينقطوكي
سارة
انا ماعرفش غير الواطي ابن الخسيس.
سلامه ضاحكا 
باباكي
سارة غاضبا 
تاني بتضحك
فيتوقف سلامه عن الضحك ويقول
انا اسف. طيب انتي مالكيش قرايب ولا صحاب. هاتيجي لك نقطه منين
سارة
من قرايبك انت
سلامه
ماهم خلاص نقطوا. ومش هاينقطوا تاني.
سارة غاضبا
ومش هاينقطوا تاني لية
سلامة باستهزاء 
علشان ركبوا جلدة
سارة 
انا ماليش دعوي عيزاهم ينقطوا تاني عليه
سلامه
يا بنت الناس طيب ازاي. هي النقطه عندنا مره واحده بس
سارة
اتصرف. والا هازعل وتدفع ضعف اللي انت خده.
سلامه بضيق
هو انا خد من امك. الا الف جنيه ورجعتيهم الفين
سارة
هاخد كمان الفين لو ماحدش نقطني
سلامه بضيق
طيب اقول للناس ايه.
سارة
ماعرفش اتصرف.
وتبص سارة لسعده الراقده علي الارض وتقول
سعيد مراتك مش احلي مني عشان هي تتنقط وانا لا
سلامه
اسمها سعده
سارة
لا سعيد. هي تنفع تكون راجل اكتر ماتنفع تكون ست واحسن لك تعمل لها كشف نتاية
سلامه وهو بيلطم 
ما انا عايز اعمل كدة لكني مش عارف منك بقول لك اية ما تيجي ندخل وبكره الصبح هاشوف اعمل ايه.
سارة
لا. النهارده قبل الفجر ما ياذن عايزا كل الناس تنقطني وهما بيقولو مبروك يا سارة. والا هاخصم 4000 ج. من فلوسك. اللي انت شايلهم في البنك
سلامه باستغراب
انتي عرفتي اني معايا فلوس ازاي
سارة
انا اعرف عنك حاجات. قرعتك نفسها ماتعرفهاش. واحسن لك الناس تيجي وتنقطني النهارده قبل الفجر
سلامه بغضب
النهارده ايه الساعه داخله علي 12 بعد نص الليل
سارة
ماليش دعوي انا مراتك زي ماهي مراتك.
سلامه
الله يخرب بيت امك يا طشطوشي
ويقوم سلامه من فوق السرير وهو في قمه انفعاله ويلبس هدومة ويخرج من الشقة وهو بيقول 
اقول للناس اية بس. الله يخرب بيت اللي حدفك عليه،
ولغاية هنا خلصت حلقة النهاردة يارب تكون عجبتكم.