أراكِ_وطني الجزء_الأول بقلم_فتاة_من_ورق
أراكِ_وطني الجزء_الأول بقلم_فتاة_من_ورق
((تمسكوا بالأحلام ... لأن الأحلام إذا ماتت فإن الحياة سوف تشبه الطيور مكسورة الجناحين التي لا يمكن أن تطير ... فلا يوجد شيئ مثل الحلم لخلق المستقبل ...))
(في دمشق)
*الساعة 9 بالليل ، سهرانين انا و بنت عمي يلي هي بنفس الوقت بنت خالتي عالسطح و عم نتأمل السما و النجوم ...
ديانا : ميوش .
مايا : اي .
ديانا : شايفة هي النجمة يلي عاليمين .
مايا : قصدك هي اكتر نجمة عم تلمع ؟
ديانا : اي .
مايا : شبها ؟
ديانا : هي انا .. هيك رح صير نجمة المع بسما الفن ، رح صير اشطر رسامة بالعالم ، بيع لوحاتي كلهن و الناس تنطر ديانا ترسم لوحة ليتنافسو مين بدو يشتريها .
مايا : اووووه طولي بالك لسا بكرا اول يوم دوام النا بالمعهد .
ديانا : ليش هيك عم تحكي ؟ كأنك مو متحمسة و كأنو نسيتي انو هاد حلمنا يلي بدنا نحققو سوا ؟ انتي كمان رح تصيري نجمة لامعة متلي .
مايا : بعرف هالشي انا اكيد ما نسيت حلمنا بس انا بحب حقق كلشي بهدوء و تروي .. بحب اعطي كل وقت حقو يعني حكيك هاد منحكيه لما منتخرج ومنبيع اول لوحة اما هلأ خلينا نفكر ببكرا ، قولك كيف رح يكون اول يوم دوام ؟؟
ديانا : اكيد حلو .. رح نتعرف على صبايا بيشبهونا و نفس تفكيرنا .. و رح نصير نرجع عالبيت ايدينا الوان و خرابيش هههه .
مايا : هههههه مجنونة .
_________________________________________________
#بقلم_فتاة_من_ورق
اسمي ديانا عمري 18 سنة و مايا بنت عمي كمان عمرها 18 سنة خلقنا انا وياها بنفس السنة بس انا اكبر منها بشهرين .. ربينا سوا لاننا ساكنين بنفس البناية .. ستي ام ابي ساكنة بالدور الارضي و بابا ساكن بالدور الاول و عمي ابوها لمايا ساكن بالدور التاني بالنسبة للبيت يلي بالدور التالت فاضي لانو هالبيت باسم عمتي هند الوحيدة متزوجة و مسافرة برات البلد ... جدي قبل ما يتوفى كتب كل بيت باسم ولد من ولادو و البيت الارضي سجلو باسم ستي لانو خاف عليها بيوم حدا يمل منها و يرميها بدار العجزة ...
_________________________________________________
#بقلم_فتاة_من_ورق
(في بيروت)
وائل : هناء .. هناء وينك يا عمري .
هناء : اي حبيبي انا بالمطبخ ، الحمدلله على سلامتك .
وائل : شو عم تعملي ؟
هناء : عم حضر العشا روح بدل تيابك مشان ناكل .
وائل : انا ما قلتلك لا تعذبي حالك ولا تتحركي من محلك مشان ابننا يجي بخير و سلامة النا ناطرينو 3 سنين .
هناء : طيب والله مليت من القعدة و الراحة .
وائل : اي اطلعي من المطبخ انا بكمل تحضير الاكل .
هناء : كرمالي روح بدل تيابك ، تحضير الاكل مافي اسهل منو و بوعدك بكرا اتصل بالخدامة تجي تنضف البيت كلو .
وائل : الله يصبرني عليكي .
هناء : الله يخليلي ياك شو بحبك لما بتضوج .
وائل : وانا بحبك بكل حالاتك .
هناء : هههه يلا روح روح .
وائل : امرك .
*طلع وائل من المطبخ وهو عم يبتسملي ... تزوجنا انا و وائل من 3 سنين زواج تقليدي بلشنا نحب بعض و صار يكبر هالحب يوم بعد يوم و كأننا منعرف بعض من لما نولدنا ...
_________________________________________________
#بقلم_فتاة_من_ورق
(في دمشق )
محمد : شو بدكن تضلو قاعدين عالسطح ؟
ديانا : الجو حلو كتير تعال قعود معنا .
محمد : نزلو تعشو العيلة كلها اجتمعت ببيت ستنا وباقي انتي و مايا .
مايا : يلا نازلين اخي .
#بقلم_فتاة_من_ورق
*اجتمعت العيلة كلها حوالي السفرة .. ستي بتقعد براس السفرة .. ابي و امي ونحنا على يمينها .. عمي ابو محمد و عيلتو على يسارها ....
زهرية : ابو زيد .
ابو زيد : نعم امي .
زهرية : بكرا بتبعت 500 دولار لاختك .
ابو زيد : امرك امي .
زهرية : وانت ابو محمد بتحول 500 دولار متل اخوك .
ابو محمد : تكرم عيونك و عيون اختي .
زهرية : اذا اختكن عايشة بالغربة هاد ما بيعني انو ما نعزها .
ابو زيد : معك حق امي .
ابو محمد : لو بتطلب عيوننا منقدملها ياهن .
ام زيد : ايمتا رح تنزل هند مرت عمو ؟
زهرية : عالاغلب بعد شهر .
ام زيد : الله ييسرلها .
ام محمد : الله يجيبها بالسلامة .
زهرية : آمين ، يلا سمو بالله و كلو .
ابو زيد : بسم الله .
_________________________________________________
#بقلم_فتاة_من_ورق
( في بيروت )
وائل : هناء .
هناء : نعم حبيبي .
وائل : وانا راجع عالبيت شفت محل العاب ، هالمحل كان عارض عالباب سيارة كبيرة اول ما تولدي بدي جبلو ياها لابننا .
هناء : ليش بتضل بتقول ابننا ؟ يمكن تكون بنت لسا الي شهرين حامل وما منعرف شو معي .
وائل : بنت ! والله ما فكرت بهالموضوع .
هناء : يعني ما بدك بنت ؟
وائل : اذا بنت بتشبهك بدي عشر بنات .
هناء : هههه الله يبعتلنا الخلقة التامة .
وائل : امين .
