صراع الكبرياء الجزء الاول والثاني والثالث والرابع والخامس

شنطتها.
وصلوا المستشفى.. مستشفى خاصة بس مستواها معتدل، على قد ناس متوسطة، نظيفة ومرتبة بس مش من مستشفيات الأغنياء اللي فيها ورد ودهب.
الدكتور دخل يكشف وساب مسك بره، مسك قاعدة على الكرسي ودماغها بتودي وتجيب.. طب لو جرالها حاجة؟ طب هعيش لمين؟ دي اللي مربياني من وانا عيلة صغيرة.
سارة قعدت جنبها
اهدي يا مسك هتبقى كويسة والله، طنط كريمة ست قوية.
مسك بدموع وهي جميلة حتى وهي بتعيط وعينيها حمرا
انا خايفة اوي يا سارة، انا مليش غيرها، لو راحت هبقى لوحدي بجد.
الدكتور خرج وبص لهم بأسف
للأسف يا بنتي جالها جلطة في المخ ودخلت في غيبوبة، واحنا عملنا اللي نقدر عليه هنا، بس لازم تتنقل مستشفى أكبر فيها عناية مركزة وإمكانيات أعلى، لو فضلت هنا يومين كمان الحالة هتتأخر وممكن لا قدر الله منلحقهاش.
مسك حست إن الأرض بتلف بيها
تتنقل فين؟ وتتكلف كام؟ انا معييش المبلغ ده كله.
الدكتور هز دماغه ومشي، وسابها واقفة مصدومة، بتعيط من غير صوت، حاسة بالعجز والقهر لأول مرة.
سارة دمعت معاها وقالت
هنتصرف يا مسك، هبيع الحلق بتاعي، هستلف من قرايبي، مش هسيبك.
مسك وهي منهارة.
في الناحية التانية.. فيلا جاسر نصار
جاسر قاعد في مكتبه الفخم وشه لسه أحمر من القلم، الكبرياء واكله، أول مرة في حياته بنت ترفضه وتضربه.
دخل عليه سامح، مدير أعماله، الخادم المطيع اللي بيسمع كلامه في كل حاجة وبيعمله كل اللي هو عايزه، لابس بدلة شيك وماسك التابلت.
عملت ايه يا سامح؟
عرفت كل حاجة يا جاسر بيه، الااسمها مسك،يا جاسر بيه ميكب ارتيست على قدها، عايشة مع عمتها كريمة اللي مربياها، ملهاش أب ولا أم، وحالتها المادية متوسطة، ودلوقتي عمتها في المستشفى بين الحياة والموت في غيبوبة ومحتاجة مستشفى غالي وفيه امكانيات عاليه
جاسر قام وقف وابتسامته بقت شيطانية، عينيه لمعت
حلو أوي.. حلو أوي يا سامح، هو ده بقى المدخل.
سامح بص له
ناوي على ايه يا باشا؟
جاسر قرب منه وقال بصوت واطي كله انتقام
البنت اللي فاكرة نفسها بريئة وبتضربني بالقلم دي، انا هربيها، هخليها هي اللي تجيلي برجليها وتقولي آسفة يا جاسر بيه.. وهدخلها من أضعف حتة عندها.. عمتها.
فضل يفكر وبيتكتك الخطة في دماغه، خطة تخليه يتحكم فيها ويكسر كبريائها زي ما كسرت كبريائه قدام الناس.
يا ترى جاسر هيعمل ايه وخطته الجاية ايه؟ ومسك الغلبانة الجميلة هتجيب فلوس عمتها منين؟ وهل هتضطر تبيع كبريائها عشان تنقذ عمتها؟
رواية رؤية مسك صراع الكبرياء
الجزء الرابع تمن الإنقاذ
بقلم سماح وجدي
مسك فضلت واقفة مكانها بعد ما الدكتور مشي، الكلمة بترن في ودانها..
لو فضلت هنا يومين كمان ممكن منلحقهاش
سارة مسكتها من دراعها
مسك فوقي.. لازم نفكر هنعمل ايه، هنسيبها كده؟
مسك مسحت دموعها بعنف، أول مرة تحس إن الكبرياء اللي كانت شايلاه على كتفها طول عمرها بقى تقيل أوي عليها
هروح الحسابات يا سارة.. هسأل يقدروا ينقلوها فين وبكام.
راحت.. موظف الحسابات بص لها من فوق لتحت وقالها ببرود
نقل لعناية مركزة مستشفى السلام الدولي أو دار الفؤاد؟ أقل حاجة هتدفعي 80 ألف تحت الحساب، والليلة في العناية ب 15 ألف غير العلاج.
80 ألف..
الرقم نزل على قلبها كأنه طوبة.
مسك عندها كام؟ 3 آلاف جنيه في شنطتها، وحلق ذهب صغير من ريحة أمها، وعدة الميكب اللي بتاكل منها عيش.
رجعت لسارة وهي بتترعش
بيقول 80 ألف يا سارة.. أجيب منين 80 ألف؟
سارة قلعت حلقها في ساعتها
خدي.. ده يعمله بتاع 20 ألف دلوقتي، ونتصرف في الباقي، هكلم خالي..
مسك وانهارت أكتر، لأنها عارفة إن حتى لو باعوا هدومهم مش هيكملوا المبلغ.
وفي نفس اللحظة.. صوت جزمة غالية بتقرب.. ريحة برفان غالي ملت الطرقة.
رفعت وشها لقت جاسر نصار واقف قدامها، لابس قميص أسود وبنطلون أسود، ووشه بارد ومفيهوش أي تعاطف، وسامح وراه.
مسك قامت وقفت مرة واحدة، ومسحت دموعها بسرعة
إنت.. إنت إيه اللي جابك هنا؟
جاسر بص لها من فوق لتحت، لعيونها الحمرا، لهدومها البسيطة، وقال ببرود مستفز
سمعت إن عمتك تعبانة ومحتاجة 80 ألف تحت الحساب.. قلت آجي أشوف أم كبرياء هتعمل ايه.
مسك صرخت فيه بصوت واطي
امشي من هنا.. مش عايزة منك حاجة.
قرب منها خطوة وهي رجعت لورا لحد ما ضهرها خبط في الحيطة
أنا الشيطان الوحيد اللي هيقدر ينقذها دلوقتي يا مسك.. في مكالمة واحدة أخليها تتنقل لأحسن مستشفى في مصر، وأحسن دكتور مخ وأعصاب يبقى فوق راسها.. وكل ده مش هيكلفني ربع ساعة من شغلي.
مسك عينيها لمعت بغضب ودموع
ومقابل ايه؟ عايز ايه يا جاسر؟
وهنا جاسر بص في عينيها مباشرة وقال الجملة اللي غيرت حياتها
مقابل إنك تتجوزيني يا مسك.
مسك اتجمدت مكانها نعم؟!
جاسر كمل وهو حاطط إيديه في جيبه
آه.. تتجوزيني.. تبقي مراتي على سنة الله ورسوله.. بعقد رسمي.. وتيجي تعيشي معايا في بيتي، مع أمي وأخويا.. وانا أشيل عمتك من المستشفى المعفنة دي وأوديها أحسن مستشفى فيكي يا مصر وأعالجها لحد ما تقوم على رجليها.
سارة شهقت انت مجنون؟ بتستغل ظروفها؟
جاسر مبصلهاش أصلا، عنيه على مسك بس
معاكي ساعة واحدة تفكري.. يا توافقي وتبقي مرات جاسر نصار وعمّتك بعد ساعة تبقى في عناية مركزة VIP.. يا ترفضي وتفضلي قاعدة كده تتفرجي عليها وهي بتموت.. والاختيار ليكي.
وسابها ومشي خطوتين.
مسك بصت من إزاز العناية.. كريمة نايمة والأجهزة بتصفر والممرضات بتجري عليها.. الدكتور بيصرخ القلب بيقف!
مسك حست روحها بتتسحب..