اسكريبت_انا_وانتَ_والحُب_تالتنا الفصل الثاني بقلم حبيبه_الديب حصريه وجديده

هذاكر لك في البيت كويس ، وكل اللى يوقف معاكِ هساعدك فيه.!
اتنهدت و بصيلته و مقدرتش ارفض له طلب الصراحه عشان انا مقدره شعوره و غيرته عليا 
_ حاضر يا سيف عشان خاطرك بس.! 
ابتسم و قام وقف و خدني معاه على المطبخ و بدأت انا اعمل خليط الكيك و هو يعمل صوص الشكولاتة اللى هيتحط على الوش
و بعد شويا كنا قاعدين في الصاله قدام الشاشه بنتفرج على فيلم و احنا بناكل كيك و تسالي كده و اول ما الفيلم جيه اعلان بصيت ل سيف اللى كان باين عليه الضيق لسه و اتكلمت بإبتسامة 
_ ماتيجي نلعب اللعبه اللى كنا بنلعبها ايام الخطوبه يا سيف 
فاكرها؟
ابتسم 
_قصدك لما كنا بنحكي مواقف حصلت لنا لما كنا صغيرين؟ 
اتعدلت و اتكلمت بحماس
_ايوه، انا هبدأ ماشي ..؟! 
_ابدئي
_ فاكر لما قولتك عملت عمليه و شيلت الزايده وانا صغيره؟ 
_اه
كملت بضحك
_ لما فوقت من العمليه لقيتهم مصوريني فيديو و انا لسه تحت تأثير البينج كنت بقول للدكتور عايزه شيشه تفاح و الدكتور قالي مفيش تفاح اجيبلك سجاير؟ 
و انا فضلت اعيط بقا و اقولهم لا عايزه شيشه تفاح..!
قعدت اضحك و هو ضحك معايا 
_يلا دورك
_مش فاكر حاجه مضحكه حصلت لي زمان
_يلا يا سيف طيب احكيلي كده اي حاجه ده دورك.
قعد يفكر كام ثانيه بعدها اتكلم
_ مره كنت رايح الجامعه كنت قدك كده تقريباً ، 
كنت متأخر بقا و ملحقتش افك ال٢٠٠جنيه اللى كانوا معايا روحت ركبت المكروباص و اديت للسواق ال٢٠٠ و قلت لنفسي هلم انا الاجره كامله و اخد الباقي بقا
اتفزلكت و قولت للسواق خد دي أجرة العربيه كلها
لقيت الناس كلها تهيص و تقولي الله يباركلك يبني و تتردلك في الافراح و كلام من ده..!
ضحكت جامد و بصيتله 
_طب و عملت ايه؟ 
_روحت مشي.!
ضحكت اكتر وهو ضحك معايا بعدها اتكلمت و انا بضحك 
_انا بقا مره زمان وانا صغيره كان بابا وعدني اني لو قفلت في الامتحان هيخرجني خروحه حلوه
و انا ذاكرت و تعبت عشان اخرج بقا،
و اول ما قفلت في الامتحان روحت له و قولته يلا خرجني
لبسنا و جهزنا و خلاص هنمشي لقيته بيقولي جاله تليفون من صاحبه و عنده حالة وفاة و المفروض يروح يعزي ف خدنا كلنا بقا يعزي صاحبه و بعد شويا نمشي 
انا بقا كنت قاعده زعلانه ان الخروجه باظت و كنت زهقانه و ببص للناس اللى بتصوت و تصرخ دي و انا مضيقه..!
ضحكت جامد و كملت 
_ لقيت بقا واحده من الستات عماله تندب و تولول و تصرخ جامد و تقول 
اه ياني ياني ياني 
روحت انا كملت بصوت عالي و بحماس وانا برد عليها و بقولها 
مش هعمل كده تاني..!
ضحكت و سيف ضحك معايا و انا كملت 
_ كل الناس بقا كانت فطسانه ضحك و الوليه و ابويا بصولي بغيظ و انا كنت حاسه بفخر اني ضحكتهم رغم زعلهم ..!
سيف ضحك جامد و حضني و انا ضحكت معاه و انبسطت اني خليته يضحك كده بعد ما كان مضايق ..!
يتبع