عروسه صيني الحلقه الاولى بقلم محمد منصور حصريه وجديده

أول ما روبي يمسك رجل مراتي؟!
فتستغرب الست وتقول
روبي مين؟
روبي وهو بيشاور على نفسه روبي أنا.
الست أنت اللي مسكت رجل مراته؟
روبي آه.. وفيها إيه ما إحنا أصحاب!
الست وهي بتبص لموز بقرف وأنت إيه عادي لما يمسك رجليها؟
موز وفيها إيه.. ما هي مراتي هي مراته!
ويمد موز إيده للست وهو يقول
هاتي إيدك لما أحاول أقومك.
الست وهي بتهز رأسها بالنفي وبتقول مش عايزة أقوم!
موز هتفضلي يعني واقعة كده؟
الست بعصبية وأنت مال أمك؟! امشي من قدامي يا راجل على ما تفرج!
فيضحك موز ويقول
أيوه بقى.. هو ده الكلام! ما تشتمني تاني وحياة أمك!
فتبص له الست باستغراب شديد ولا ترد، فيبص موز لروبي ويقول
صورت اللي فات ده؟
روبي لا.
موز فيضربه في ذراعه ويقول بنرفزة ثاني مرة أمي تتشتم ببلاش!
روبي وهو بيبص للست ماما الحاجة.. لو طلبت منها تشتمك تاني هتشتمك!
موز خلاص أنا هاقول لها وأول ما تبدأ تشتم صور.
فيخرج روبي الموبايل بتاعه ويحضر الكاميرا، وموز بيقول للست
اشتميني تاني إلهي تنشكي في قلبك!
الست هو أنت عبيط ولا أهبل ولا حكايتك إيه؟!
فيبص موز لروبي ويقول
استنى يا روبي ما تصورش..
ويبص موز للست وهو يقول
ما تشتمي عدل يا حاجة! لسة في حد بيشتم حد يقول له عبيط وأهبل؟!
الست وهي بتصرخ أنت عايز إيه بالظبط؟! هتغور من هنا ولا ألم عليك خلق الله يا ابن المروشة؟!
موز وعلى إيه بس.. ده أنتِ باين عليكِ ولية شلق!
ويروح موز ناحية نانسي ويشيلها على كتفه، ويبص ناحية روبي يلاقية بيصور الست، فيقول بعصبية
أنت يا زفت!
روبي إيه؟
موز بتعمل إيه؟
روبي بصورها وهي بتشتمك.
موز أنت حمار يا روبي! الست ساكتة وأنا مشيت من قدامها!
روبي أومال أنا بصور مين؟!
ومن داخل استوديو التصوير، يقف موز وروبي قدام صاحب محل التصوير ويدعى إيهاب، وموز يقول له وهو بيشاور على نانسي
آه هي دي العروسة.. مالك مستغرب ليه؟
إيهاب وهستغرب ليه؟ واحد داخل عليا ومعاه عروسة سيليكون.. إيه الغريب في كده؟! ودي هتبقى مرتك؟
موز آه.
إيهاب ودي بتخلف برضه؟
موز لا.
إيهاب والعيب منك ولا منها؟
موز هتخلف إزاي بس دي عروسة صيني!
إيهاب وهو بيشد في شعره يعني أنت عارف إنها صيني وعايز تتجوزها؟!
موز وفيها إيه؟
إيهاب وهي هيتجنن وأنت هتتجوزها علشان بتصلح غلطتك صح؟ يعني مثلاً لعبت في البطارية بتاعتها؟
موز لا هاتجوزها عن حب.
إيهاب وحبيت فيها إيه ورحمة أمك؟!
موز وهو بيبص للعروسة حبيت فيها قلة كلامها!
إيهاب وهي ما بتتكلمش ليه؟
موز هتتكلم إزاي بس وهي عروسة صيني؟!
فيصرخ إيهاب ويقول وهو بيشد في شعره تاني
ما هو لو أنت مجنون هاقول إنك شايفها حقيقة وهي صيني، لكن اللي هيجنني إنك شايفها صيني وبرضه هتتجوزها!
موز أنت حرقت معايا جاز كتير.. ما تقوم تصورنا وأنت ساكت!
فيبص له إيهاب وهو زي المجنون ويقول
اعتبر المحل محلك.. اتصور وخد بعضك واقفل وراك!
واخرج إيهاب من جيبه مفاتيح الاستوديو وإداهم لموز وهو بيقول
عيش حياتك.. وسبني أمشي ورحمة أمك!
ويخرج إيهاب من الاستوديو، فيقول له موز باستغراب
رايح فين؟
فيبص له إيهاب ويقول
اسكت أنا زعلان منك.. ومن الدكتور اللي كان بيعالجني! علشان أنا قسماً بالله لسة خارج من مستشفى المجانين وقلت للدكتور بلاش أخرج، المجانين اللي برة أكتر من اللي جوة، هو قال لي الدنيا حلوة.. اخرج وعيش حياتك.. لكن عناد فيه مش هعيش!
ويرمي إيهاب نفسه من فوق ترابزين السلم ينزل في مدخل العمارة! فيجري ناحية الترابزين روبي وموز ويبصوا عليه وهو نايم على بطنه وبيتوجع.. فيبص موز لروبي ويقول
هو نزل إزاي على بطنه كده؟ هو مش اللي بيقع بيقع على ظهره؟
روبي باين عليه.
ويسكت روبي ويبص لموز، فيبص له موز ويقول
أنت سكت ليه؟ أنت مستنيني أنا اللي أكمل؟
روبي أصل بصراحة ما سمعتش أنت قلت إيه!
موز أومال إيه باين عليه دي اللي أنت قلتها؟!
روبي قلت أزق معاك الكلام علشان ما تحسش إني أطرش.
موز ما أحسش إنك أطرش؟!
روبي آه.
ويبص روبي لإيهاب وهو على الأرض ويقول
بس هو باين عليه وقع!
موز باستهزاء بتتكلم بجد؟ ولا يبان عليه؟!
ومن داخل قاعة الأفراح، يقف المدلدل وسط أهله وناسه، وأخوه الكبير ويدعى يكنشي جه يسأله ويقول له
إلا أنت ما قلت لناش بنت مين العروسة؟
المدلدل كلام في سرك.. العروسة صيني.
يكنشي يعني منين؟
المدلدل بقول لك صيني تقول لي منين؟!
يكنشي ما أنا برضه مش فاهم.. يعني بنت مين في الصين؟
المدلدل أنا كمان ما اعرفش.. بس زمان أحسن جاي وهنعرف مين العروسة، أصلها جنس تالت!
يكنشي باستغراب جنس تالت يعني إيه؟ هو موز هيتجوز ترابيزة؟!
وهنا يسمعوا صوت واحد من العيلة يقول
العريس جه!
فتستعد الفرقة اللي في القاعة لاستقبال العروسين، وكل المعازيم تروح عند باب القاعة.. وقبل ما ينزل موز من العربية اللي بتزفه قال لروبي
جهز الكاميرا وابدأ البث المباشر.
وشغل روبي الكاميرا وبدأ البث المباشر، ونزل موز من العربية وهو شايل العروسة الصيني على كتفه، وبص له كل الحاضرين باستغراب شديد لدرجة إن الفرقة وقفت عزف وفضلوا يبصوا لموز.. وقال قائد الفرقة
يلا بينا يا رجالة ده باين مجنون!
موز كملوا الزفة عادي علشان العروسة ما تتقمصش.
فهمس أعضاء الفرقة لبعض ومشيوا وسابوا الفرح.. وراح المدلدل لموز، وقال له بعصبية وبمنتهى الإحراج
هي دي العروسة؟!
موز وهو بيبص لنانسي آه.. بذمتك مش قمر؟
المدلدل بعصبية بقى أنت سحبت 20 ألف جنيه وعزمت العيلة كلها وأصحابي وكل اللي نعرفهم علشان هتتجوز عروسة صيني؟!
موز ما أنا قلت
لك إني هتجوز عروسة صيني!
المدلدل وهو بيفك حزام البنطلون وبيستعد لضرب موز عروسة صيني يعني عروسة من الصين من لحم ودم، مش سيليكون يا ابن المجنونة!
فيجري موز من قدام المدلدل إلى داخل القاعة، ويستخبي موز وراء الكوشة وروبي بيصور كل اللي بيحصل في لايف مباشر.. والمدلدل بيقول
ومين بقى وكيل العروسة دي يا باظ يطير؟!
موز بابا.. أنت مدلدل، يعني ما ينفعش خالص تتريق على العروسة الصيني بتاعتي!
المدلدل أنت مسمي دي عروسة يا ابن المجنونة؟! دي لو اتحطت في الفرن تسيح!
موز برضه هتجوزها.. زغرط يا روبي!
وهنا يحضر المأذون ويبص لموز والمدلدل ويقول
زواج مبارك بإذن الله.. أومال فين العروسة؟
موز ما هي على حجري أهه.
فيبص المأذون للعروسة ويصوت ويقول
أنت هتتجوز دي؟!
موز وفيها إيه بس؟
الماذون أنت كده عايز مأذون مكعبات مش أنا!
موز ما أنت حلو!
الماذون بعصبية أمك أحلى! دي الشغلانة بدأت تبقى غم..
ويقلع المأذون لبسه ويقف بفانلة وشورت وسط القاعة ويقول
أوعى تكون فاكرني مأذون كيوت.. ده أنا أصلاً عربجي!
ويهجم المأذون على موز اللي ب يهرب منه، فيقول المدلدل للمأذون
تعالى نخلص عليه وأنا هشهد على نفسي في المحكمة!
المأذون والله بالله ما حد يدخل في السجن غيري! هي النسوان خلصت رايح تتجوز عروسة بلاستيك؟!
موز دي عروسة سيليكون من الغالي!
المأذون وهو يحاول الإمساك بموز إن شاء الله تكون جبسنبورد! لازم أعلمك الأدب طالما اللي خلفوك ما عرفوش!
المدلدل بعصبية للمأذون ما تحترم نفسك! ولاحظ إني أنا موجود!
المأذون وأنت تطلع إيه؟
المدلدل أنا أبوه.
المأذون أنت السبب في أن العاهة دي تيجي للدنيا!
المدلدل ما كنتش اعرف إنه هيطلع عبيط كده!
موز وأنت عايز واحد اسمه المدلدل يخلف مين؟ نجيب زويل؟!
المأذون هو مين ده اللي مدلدل؟
المدلدل أنا.
المأذون باستغراب اسمك المدلدل؟!
المدلدل آه.
فيمسك المأذون في المدلدل وهو يقول بعصبية
ده أنا هدخل فيك أنت السجن بسبب اسمك ده!
وتعدي الليلة ويهرب موز بالعروسة الصيني، ويروح بيها لشقة روبي، ويدخل الشقة ويقفل الباب ورا منه، ويقعد على سرير روبي وهو بيلتقط أنفاسه.. ويتصل بروبي ويقول
أنت يا زفت.. أنا في شقتك بتاعت الوراق، خلص بقى وتعالى على هنا وهات عشا معاك.
وينهي المكالمة.. وهنا يسمع صوت جاي من ورا منه، وهو صوت أنثى تقول
وهي بقى الهانم أمك كانت عمالة تتكلم عليا بأسلوب وحش ليه في الفرح؟!
فيبرق من شدة الخوف ويبص ورا منه علشان يلاقي العروسة بتغير هدومها!.. فيقع مغمى عليه.
خلصت حلقة النهاردة اللي يارب تكون عجبتكم.. سلام!