سكريبت عفاريت المعمل بقلمى الهام عبدالرحمن
سكريبت عفاريت المعمل
بقلمى الهام عبدالرحمن
صلوا على الحبيب المصطفى
بتكون لوسيندا في البيت بتكلم صاحبتها كريمة علي التليفون وفى نفس الوقت واقفه قدام التلاجه بتدور علي اي اكل تاكله.
لوسيندا يادي النيلة عليا وعلي عيشتي.
كريمة في ايه بس يا بنتي هو انتى بتندبي على حظك علطول كدا؟
لوسنيدا اعمل اي بس يا كرمله نفسي مره افتح التلاجه الاقي فيها اكل عدل.
كريمة ويعني يا فالحه الاكل هيجي لوحده مش المفروض تشتغلي عشان تجيبي فلوس وتشتري الاكل اللى نفسك فيه؟
لوسيندا وهو انا لقيت شل وقولت لا، منك لله يا عمي سايبني فى الدنيا لوحدي بعد موت امي وابويا.
كريمه وهو هيعملك ايه يعني يا لولو دا راجل موظف ويدوبك قادر يصرف علي عياله وكفايه انه فضل معاكي من بعد موت مامتك وباباكي لحد ما اتخرجتي.
لوسيندا طب كان كمل جميلة ويبعتلي اكل على الاقل بدل ما انا قاعده جعانه كدا.
كريمه انتي طفسه يا بت انتي ما تدوريلك علي درسين تلاته حواليكي تسترزقي منهملحد ما ربنا يفرجها وتلاقي اي وظيفه.
لوسيندا يابنتي هو انا لقيت وقولت لا ما انتى عارفه كل ما ادور يقولوا بياخدوا عند مدرسينهم في الفصل واي مدرسه بقدم فيها بيشترطوا الخبره اعمل ايه بقا؟
كريمه طب ايه رايك تدي دروس تاسيس للعيال اللى فى حضانه؟
لوسيندا بشهقه يالهوي دي هبت منك على الاخر يبقا انا على اخر الزمن بعد ما قعدت اربع سنين فى كلية تربيه ادرس كيميا ودماغي اتلحست من كتر المعادلات اروح ادرس لشوية مقاريض واديلهم الف ارنب باء بطه؟ لالا اعفيني من الموضوع دا وانا اساسا مقدرس علي كدا.
كريمه لا طبعا المفروض نفصل وظيفه علي مزاج سيادتك امشي يا بت من هنا متقرفنيش.
لوسيندا بقا كدا يا كركوره اهون عليكي تسيبيني محتاسه كدا.
كريمة معلش بقا يا لوسي اسيبك احسن ما الست الوالده تخلص عليا عشان قاعده بري معاكي ولسه مخلصتش طبيخ الفراخ.
لوسيندا طب غوري يلا من هنا يعني شيفاني جعانه وتقوليلي فراخ قاصده تجوعيني اكتر يعني يلا اخفي من قدامي سلام.
قفلت لوسيندا مع كريمه وبتاخد عيش وعلبة الجبنه اللى بقالها
لوسيندا يلا امري لله مفيش قدامي غيركم احسن حاجه دلوقتي اني استخدم خيالي الواسع هنقنع نفسنا ان الجبنه دي فراخ بروستد متبله ومقرمشه كمان.
لفت ساندوتش الجبنه وخدت اول قطمه
لوسيندا امممم الله على جمال التتبيله وحلاوتها واصله للقلب وحاجه في منتهي الجمال والله تنفعي شيف يا بت يا لوسي.
وهي بتاكل تلفونها رن وكانت كريمه.
لوسيندا فيه ايه يا كركوره هو انا لحقت اوحشك بالسرعه دي؟
كريمه اتهدي يا بت واسمعيني بسرعه كنت بقلب فى الفيس دلوقتي لقيت مدرسه عامله اعلان طالبين فيه مدرسة كيميا.
لوسيندا اي دا هو عم مارك لحق يتصنت علينا لا ويجيبلي شغل كمان؟
كريمه يلا يا بنت المحظوظه رزقك فى رجليكي.
لوسيندا هنقر بقا، بس مدرسة ايه دي اللى بتقبل موظفين في وسط السنه الدراسيه انا مقلقه من الموضوع دا؟
كريمه صحيح اقرع ونزهي انتي هتتأمري يا عين امك ولا ملقتيش فى الورد عيب قولتى دا احمر الخدين مش يمكن دا فى مصلحتك ويتساهلوا معاكي فى المقابله؟
لوسيندا تصدقي عندك حق طب ابعتيلي العنوان وميعاد المقابله علي الواتس عشان منساش.
يوم المقابله كانت واقفه قدام المدرسه وقالت فى نفسها.
لوسيندا اي دا كل دي مدرسه دي اكبر من وسط البلد دا على كدا هحتاجلها خريطه عشان اعرف امشي فيها بدل ما اتوه.
البواب قرب منها وهي سرحانه فيه ايه يا ابله محتاجه حاجه؟
لوسيندا بخضه بسم الله الرحمن الرحيم مش تكح يااخينا عايزه اروح مكتب المدير هتوصلني ولا اروح ادور على حد تاني يوصلني؟
البواب وانتى عاوزه المدير في ايه يا ابله؟
لوسيندا هو انت هتحقق معايا متقولي فين مكتب المدير
البواب طب بس قوليلي يمكن افيدك دا الكل هنا بيعتمد عليا فى الكبيره قبل الصغيره
لوسيندا اللهم طول يروح انا جايه عشان اعلان الوظيفه.
البواب اااه هو حضرتك اللى هتتعيني مكان ابله مرفت؟
لوسيندا مرفت مين يعم الحج انا قولتلك انى جايه عشان الاعلان اللى المدرسه عملاه.
البواب ايوا ما حضرتك هتدرسي مكان ابله مرفت عشان هي هربت .....
فجاه جه صوت من
لطفي فيه ايه يا عبدالتواب واقف بترغي وسايب شغلك ليه؟
وبعدين وجه كلامه للوسيندا اهلا يا استاذه حضرتك مين؟
لوسيندا انا لوسيندا جايه عشان اعلان مدرسة الكيميا اللى انتم طالبينها.
لطفي اهلا بيكي انا لطفي محمود وكيل المدرسه اتفضلي معايا.
جوا مكتب المدير كان عبدالحميد مدير المدرسه قاعد على مكتبه لما دخل لطفي ووراه لوسيندا.
لطفي استاذ عبدالحميد دي استاذه لوسيندا اللى جايه تقدم على وظيفة مدرسة الكيميا.
عبدالحميد اهلا بيكي يا استاذه لوسيندا اتفضلي اقعدي وعرفينا بنفسك.
بدات تعرف بنفسها فى نفس الوقت اللى كان عبدالحميد بيشوف السي ڤى بتاعها.
لطفي انتي اشتغلتي فى مدارس قبل كدا؟
لوسيندا الحقيقه لا مشتغلتش قبل كدا لاني لسه متخرجه من سنتين وكل المدارس اللى قدمت فيها طالبين شهادة خبره.
عبدالحميد مفهوم مفهوم.
ردت لوسيندا بسرعه بس انا والله شاطره وبعرف اشرح كويس جدا دا حتي وانا طالبه كنت بذاكر لزمايلي وبشرحلهم وكنت سبب فى نجاحهم.
عبدالحميد واضح ان انتى واثقه فى قدراتك علي العموم اهلا بيكي معانا يا استاذه لوسيندا تقدري تبداي معانا من بكرا.
لوسيندا بجد! حضرتك بتتكلم بجد! يعني انا خلاص اتعينت معاكم؟
لطفي ايوا طبعا الف مبروك هنستناكي بكرا الساعه سبعه ونص .
كان عبدالتواب قاعد جمب البوابه زي العاده ودخل لطفي عليه وهو متعصب.
لطفي انت اتهبلت يا عبدالتواب رايح تفضحنا قدام المدرسه الجديده عاوزها تهرب هي كمان؟
عبدالتواب معلش يا استاذ لطفي ذلة لسان ومش هتتكرر تاني.
لطفي احنا مصدقنا ان احنا نلاقي مدرسة بالسرعه دي كفاية اللى هربوا قبل كدا.
وسابه ورجع تانى لمكتب المدير.
بتخرج لوسيندا من المدرسة والفرحه مش سيعاها وبتتصل علي كريمة عشان تحكلها اللى حصل فى المقابلة وبيجيلها صوتها من ورا التلفون.
كريمه ها يا لوسي عملتي اي طمنيني؟
لوسيندا باركولي قرمط اتعين يا جدعان.
كريمه بتتكلمي بجد قبلوكي فى الوظيفه طب والخبره؟
لوسيندا يابنتي انا مش محتاجه خبره انا لوحدي خبره دا كانهم ما صدقم وعينوني علطول.
كريمه
لوسيندا لا ان ولا اخواتها بقا دا انا مصدقت اتعينت متبوظيش عليا فرحتي الله يخليكي مهياش ناقصه قلق.
في نفس الوقت جوا مكتب المدير
كان عبدالحميد واقف عند الشباك، باصص لبوابة المدرسة وهو سرحان ولطفي واقف قدامه متوتر.
لطفي اتكلم بصوت واطى حضرتك متأكد من القرار ده؟ البنت شكلها غلبانة وملهاش ذنب تدخل في اللي بيحصل هنا.
عبدالحميد لف له ببطء، وعينيه مليانة قلقوإحنا معندناش وقت نختار يا لطفي لازم حد يمسك الفصل ده، قبل ما الموضوع يكبر أكتر من كدا ومتنساش ان احنا فى وسط السنة ودى مدرسة خاصة لو الخبر اتعرف المدرسة هتتقفل.
لطفي بلع ريقه وقال بس لو عرفت الحقيقة ممكن تسيب الشغل وتمشي زي اللي قبلها.
عبدالحميد رجع بص ناحية الشباك وقال بنبرة غامضة أو يمكن هي الوحيدة اللي تقدر تكمل.
بعد شوية وصلت لوسيندا لبيتها ودخلت وهي بتغني بسعادة، ومش عارفة ان الوظيفة اللي فرحت بيها النهارده ممكن تكون بداية أكبر ورطة في حياتها كلها.
تانى يوم بتروح لوسيندا المدرسة فى ميعادها وبتدخل الفصل وبتعرف نفسها وبتتعرف على الطلبة ولما بتخلص بتروح المعمل تقعد هناك.
لوسيندا وهى داخلة المعمل ايه دا كله ايه دا كله كل دا معمل ولا وباضتلك فى القفص يابت يالوسى وبقيتى مسئولة عن معمل عاوزله توكتوك عشان تعرفى تمشى فيه،
لحظة وبطنها بدأت تطلع اصوات من الجوع فحطت ايديها عليها وهى بتقول انا عارفة انك جوعتى بس اعمل ايه هو مفيش معايا غير ساندوتش جبنة واحد وكنت عاوزة أأخره شوية اهو منها يبقا فطار ومنها يبقا غدا.
بس بطنها فضلت تطلع اصوات اعلى فقالت لااااا مبدهاش بقا اروح آكل الساندوتش احسن بدل مااتفضح وسط الناس هنا فى المدرسة.
وهى بتاكل فى الساندوتش سمعت صوت غريب جاى من آخر المعمل فقامت تتحرك ناحيته عشان تشوف ايه دا لكن ملقتش حاجة ولسة بتلف سمعت صوت من وراها بيقولها بخ
اتلفتت بسرعة وبصتله من فوق لتحت وقالتله والله ياروح ماما المفروض انى اخاف يعنى؟
الولد انت شيفانى؟
لوسيندا اللهم طولك ياروح هو انت شفاف
