سكريبت عفاريت المعمل بقلمى الهام عبدالرحمن

المعمل ودخلت هنا ازاى وانا لسة فاتحة بالمفتاح؟
الولد فضل يبصلها وهو مش مصدق نفسهانتى بتكلمينى انا؟ انتى شيفانى بجد؟
لوسيندا يلا يابابا اتجر على فصلك بدل ما المدير يعملك استدعاء ولى امر وبعدين قولى هنا انت مش لابس يونيفورم زى زمايلك ليه اوعا تكون من مدرسة تانية وجاى تقابل حد هنا.
الولد فجأة نادى بصوت عالى يا سليم يامعاذ اظهروا بسرعة.
لوسيندا انت بتنادى على مين ياض انت هو انت ناوى تعمل زى مدرسة المشاغبين ولا ايه؟ لا فوق دا انا اوديك فى داهية.
وهى بتتكلم ظهر حواليها فجأة ولدين كمان وواحد فيهم بيقول فى ايه ياعبدالله الواحد ميعرفش يأنتخ شوية؟
لوسيندا صلاة النبى أحسن اوعوا يكون اللى فى بالى صح؟
معاذ ايه دا هو انتى شيفانا؟
لوسيندا الصلاة عالنبى عفاريت أحيه أتاريهم ماصدقوا وعينونى.
عبداللههو انتى مش خايفة مننا.
لوسيندا وحد الله يابا انا مبخافش الا من اللى خالقنى ومن الآخر كدا أنا مش همشى من المخروبة دى انا مصدقت لاقيت شغلانة اقبض منها ما انا مش هعيش عمره كله على الجبنة.
سليم دى مش بتخاف يا عبدالله هنتصرف ازاى دلوقتي؟
لوسيندا بقولكم ايه انا مش فاضيه لشغل العيال دا يلا شوفوا كنتم بتعملوا ايه وانا هروح اكمل الساندوتش بتاعى.
معاذ ساندوتش ايه انتى لازم تخافى مننا وتتخضى كمان.
لوسيندا بضحك ليه ان شاء الله يابيضة دا حتى شكلكم كيوت ومتعرفوش تخوفوا نملة.
عبدالله بغيظ لا ماهو انتى هتخافى يعنى هتخافى.
لوسيندا لفت وراحت تقعد مكانها وهى بتقوله يلا ياض منك ليه روح العبوا بعيد انا دماغى مش رايقالكم. 
فضل الاشباح التلاتة يحاولوا يخوفوها طول اليوم وهى مستحيل أبدا تخاف بالعكس كانت طول الوقت تتريق عليهم ودا خلاهم يتغاظوا جداً.
فى البيت عند لوسيندا بتكون واقفة كالعادة قدام التلاجة وحاطة ايديها فى وسطها وهى بتقول يعني انا نفسي اعرف هو انا لما اقف قدام التلاجة كدا هتخاف منى وتخلى الجبنة فراخ ولا لحمة مثلا اااه يانى انا معدتى نشفت من الجبنة نفسي بقا آكل زى البنى آدمين.
شوية والتليفون رن
لوسيندا كركورة ازيك يابت عاملة ايه اما انا عندى ليكى شوية رغى قااااد كدا.
كريمة خير ياسبب سعدى احكيلى عملتى ايه فى المدرسة؟ كنتى مُدرسة شاطرة ولاخيبة اوعى تكونى كسفتينا قدام الشُحُطة بتوع ثانوى.
لوسيندا هو انتى ليه محسسانى انى عيلة صغيرة وامها بتطمن عليها للعيال الاشقيا يكونوا رخموا عليها.
كريمة ماهو مصيبتى السودا انى بعتبرك بنتى مش صاحبتى.
لوسيندا خلاص يامامى اطمنى انا كنت بنت طيوبة وماوقفتش فى النوتى كورنر.
كريمة بتتريقى يابنت ابلة فضيلة طيب يلا انجزى وارغى.
لوسيندا بضحكمش أنا عرفت المدرسة عينتنى بسرعة كدا ليه ومدققوش معايا على شهادة الخبرة زى المدارس التانية؟
كريمة يعنى الموضوع طلع فى ان بجد؟!!
لوسيندا بضحك دا ان واخواتها كمان.
كريمة ماتخلصى يازفتة انتى هتنقطينى بالكلام.
لوسيندا خلاص ماتزقيش هقولك اهو اما انا ياستى النهاردة قابلت تلات عفاريت انما ايه مسخرررة.
كريمة صوتت عفاريت يالهوى عفاريت ازاى يابت انطقى!
حكتلها لوسيندا على اللى حصل وهى بتضحك.
كريمة يخربيت اللى خلفوكى يابعيدة انتى بتحكى كدا عادى عفاريت يالوسى عفاريت هو انتى مش خايفة يابت.
لوسيندا هخاف من ايه دول شوية عيال.
كريمة تخافى من ايه؟ انتى عبيطة يابنتى
دول عفاريت عارفة يعنى ايه عفاريت يعنى ممكن تتلبسى.
لوسيندا اتلبس ايه انتى كمان دول شوية عيال هبلة مش عارفين يخوفوا حد دول بيقولولى بخ ياست كريمة انتى متخيلة.
كريمه بصي يا بنتي انا من رايي تسيبك من ام الوظيفه دي وتنفدي بجلدك.
لوسيندا نعم يا اختي امشي انا عمري ما همشي حتى لو جابولي ابليس بذات نفسه دا انا من كتر الجوع بقيت بحلم بالفراخ وهي بتقولي تعالي كليني انا مستنياكى وراكي ولا مارلين مونرو.
كريمة يا شيخه يلعن ابو المرتب على ابو الفراخ انا خايفه عليكى يا زفته.
لوسيندا ما تخافيش يا كركوره انا ست بميت راجل وقلبي جامد وافوت في الحديد.
كريمة انا عارفاكى مش هتسمعى كلامى ماهى دماغك انشف من العيش البايت.
سكتت لوسيندا على فجأه.
كريمة مالك يا بت سكتي ليه؟!
لوسيندا بصوت واطي استني لحظه النور فصل على فجأة.
كريمة بفزع يا نهار ابيض هم جم عندك ولا ايه مش قولتلك هتتلبسي وشكلي هتلبس معاكي.
لوسيندا يا بت اهدي غالبا كدا اللمبه اتحرقت.
كريمه لاااا انا كدا هيجيلي جلطه وما عنديش استعداد اتلبس من عفاريتك يلا سلام ياختى.
تاني يوم الصبح راحت لوسيندا المدرسه وخلصت حصصها وراحت على المعمل فضلت تلف فيه بعينيها لكن ما شافتش حد فقعدت تفطر وفي لحظه واحده بصوت واحد التلات اشباح قالوا عووووو.
لوسيندا بصتلهم باستهزاء اقسم بالله لو شفتوا عم شلاطه بتاع الخضار وهو بيطالبني بحق البطاطس اللي كنت واخداها من شهرين كنتم عرفتوا يعني ايه رعب.
معاذ ضحك وقال انا حبيتها.
عبد الله بصله بغضب اسكت يا معاذ المفروض اننا نرعبها مش نصاحبها.
سليم دخل بينهم وقال كده ما فيش غير خطه التخويف رقم 7.
فجاه التلاته وقفوا صف واحد وبدأوا يعملوا اصوات غريبه ويحركوا نفسهم بطريقه مضحكه جدا وهم بيقولوا اخرجييييييي من المدرررررررسة والا.... والا
سليم بصوت واطي والا ايه انا نسيت.
معاذ والا... يا لهوي انا كمان نسيت.
عبد الله بصلهم بغيظ ما تقول منك ليه والا ايه؟
لوسيندا فضلت تضحك عليهم لا بجد انتم محتاجين كورس تطوير ذات في التخويف.
سليم بحزن انا قولتلك يا عبد الله البروفا كانت ناقصه كان لازم نتدرب أكتر من كدا عاجبك كدا اهى ما خافتش مننا لا وكمان بتتريق علينا.
عبد الله بضيق اسكت بقى وبعدين بص لوسيندا وقال انتى ليه مش خايفة مننا؟
لوسيندا بعد ما صعب عليها طيب المفروض اعمل ايه ما انتم حركاتكم هبله اوي ما تخوفش طفل عنده سنتين.
معاذ واضح اننا هنفضل محبوسين هنا على طول يا بختك يا يوسف عرفت تمشي.
لوسيندا مين يوسف ده؟
سليم دا يا ستي واحد صاحبنا كان شبح زينا بس قدر انه يتحرر لكن احنا محبوسين ومش عارفين نتحرر زيه.
لوسيندا طيب ما تعملوا زيه وانتم تتحرروا.
معاذ وهو احنا منتظرينك يا ذكيه عشان تقوليلنا نعمل زيه ما احنا حاولنا وما عرفناش.
لوسيندا ليه هو عمل ايه بالظبط؟
عبد الله بضحك خوف مدرسه الكيمياء اللي قبل منك ولما اتخضت واغمى عليها اتحول يوسف لنور واتحرر بس عاوزة اقولك كان شكلها مسخرة اول لما فاقت طلعت تجرى وتصوت وتقول عفريت صغير بيغنى فى المعمل.
لوسيندا لااا دا انتم حكايتكم حكايه فهموني كدا بالراحه انتم ازاي روحكم موجوده هنا وايه اللي جرالكم؟
سليم بصى ياستى احنا كان عندنا حصه علوم في المعمل ويومها مستر عامر كان بيشرحلنا تفاعل المواد الكيميائيه وبدأ يعرفنا ان في مواد لو اختلطت على بعض ممكن تعمل انفجارات.
عبد الله بس احنا بقى ما كناش مركزين وقاعدين نهزر مع بعض ولما مستر عامر اخد باله زعقلنا جامد وحلف يعاقبنا وفعلا بعد ما الحصه خلصت حكم علينا نفضل في المعمل وننضفه ونرتب الادوات اللي كان بيشرحلنا بيها.
سكت عبد الله وهو متاثر لما افتكر اللي حصل.
معاذ انا هكملك واحنا بنرتب المعمل يوسف كان بيبص على المواد وقاعد بيهزر ويقول هو هيحصل ايه لو حطيت مايه على حبه من البتاع اللي اسمه حمض الكبريتيك دا وسليم قاله اوعى تعمل كدا وما تلعبش في حاجه احنا مش ناقصين يجرالنا حاجة، ويوسف قال له انت مكبر الموضوعليه ياعم سليم دي ماية عادية هو انا هحط ميه نار يعني وانا بصراحه عندي فضول وعاوز اجرب واشوف هيحصل ايه. وللاسف للحظه انشغلنا عنه وهو استغل الفرصه وحط مايه على حمض الكبريتيك وفجاه الحراره اتركزت وحصل فوران شديد ويوسف بقى زي المجنون بيتحرك في كل مكان ووقع كل المواد على بعضها وفجاه المعمل كله ولع وبقى كله ادخنه سامة.
لوسيندا يا مصيبتي وايه اللي حصل بعد كدا؟
معاذ مستر عامر حاول ينقذنا لكن ما قدرش ومات معانا.
لوسيندا طيب والشبح بتاع مستر عامر راح فين اتحرر هو كمان؟!
سليم لا هو ما كانش معانا خالص انا وعبد الله ويوسف ومعاذ بس.
لوسيندا طيب والحادثه دي حصلت امتى؟
عبد الله من خمس سنين.
لوسيندا ومحدش في الخمس سنين دول قدر يشوفكم خالص؟
معاذ لا انتى الوحيده اللي قدرتي تشوفينا. اصل احنا مش بنطلع من المعمل حاولنا بس ما عرفناش.
لوسيندا امممم طيب يوسف بقا خوف ميرفت ازاي؟
معاذ بضحك لا هي جت معاه بالصدفه كان بيلف في المعمل وبيغني مفكر نفسه عمرو دياب وفجاه دخلت ميرفت ووقفت قدامه وتنحت والاتنين صرخوا قصاد بعض هو خاف