سكريبت عفاريت المعمل بقلمى الهام عبدالرحمن

واختفى من قدامها وهي من الخضه وقعت واغمى عليها وفجاه لقيناه اتحول لنور وما بقاش موجود معانا وساعتها احنا فهمنا من هنا ان لازم حد يتخض ويخاف مننا علشان نقدر نمشي زى يوسف.
لوسيندا وطبعا انتم على الله حكايتكم وما بتعرفوش تعملوا اي حاجه من اللي العفاريت بتعملها وعشان كدا لسه لازقين هنا لازقين هنا.
سليم بالضبط كدا.
لوسيندا خلاص خلاص قطعتوا قلبي انا قررت اساعدكم واطفشكم من هنا قصدي امشيكم من هنا.
معاذ بجد هتساعدينا؟
لوسيندا ما قولنا اه هساعدكم هي قصه ماتصدعونيش بقا.
بعد يومين لوسيندا خلصت حصصها كالعادة ورايحة على المعمل بس وقفها البواب وهو بيبصلها باستغراب.
عبدالتواب ازيك يا آنسة لوسيندا عاملة ايه
لوسيندا بأستغراب كويسة ياعم عبدالتواب فى حاجة.
عبدالتواب يعنى بجد انتى كويسة مفكيش حاجة مش خايفة من حاجة
لوسيندا اطمن ياسيدى انا زى الفل وبعدين هخاف من ايه هو فى حاجة هنا تخوف؟
عبدالتواب اتوتر وقال لا ابدا مفيش حاجة ياست البنات بس بطمن عليكى اصلك دايما قاعدة لوحدك ومبتقعديش مع حد من المدرسين اللى هنا وانا خايف عليكى لدماغك تتلحس من الوحدة.
لوسيندا خايف عليا من الوحدة ولا من العفاريت.
عبدالتواب ايه ايه عفاريت ايه بسم الله الرحمن الرحيم.
لوسيندا بهزر ياعم عبدالتواب انت مبتحبش الهزار ولا ايه؟
عبدالتواب ربنا يجعل كلامنا خفيف عليهم.
لوسيندا برقت عنيها وهى بتبصله وقالت ايه دا ياعم عبدالتواب الحق فى واحد طاير فى السما وراك وبيطلعلى لسانه.
لف عبدالتواب وطلع يجرى وهو بيقول بسم الله الرحمن الرحيم اعوذ بالله من الشيطان الرجيم.
لوسيندا وقفت تضحك عليه ولسة هتدخل المعمل لاقت الكورة خبطت فى دماغها ووقعتها على الارض.
لوسيندا ااااه ااااه يادماااغى
الطلبة اللي كانوا بيلعبوا اتجمدوا مكانهم، وكل واحد بيبص للتاني بخوف، وفجأة شق الزحمة صوت رجولي قويانتى كويسة جرالك حاجة؟
كان صوت كريم مدرس الألعاب.
طويل، جسمه رياضي، لابس تريننج أسود بسيط، وساعته في إيده، وشكله فيه هيبة غريبة تخلي أي حد يتوتر أول ما يشوفه.
لوسيندا رفعت عينيها من على الأرض وبصتله وسكتت.
لثانية.
ثانيتين.
ثلاثة
لوسيندا فى نفسها يا نهار أبيض هو دا مدرس ولا بطل من ابطال السينما.
كريم قرب بسرعة وركع قدامها بقلق
حضرتك كويسة؟ الكورة خبطتك جامد؟
لوسيندا كانت لسه باصة له ومتنحة، وعينيها ثابتة عليه كأنها نسيت اسمها.
كريم شاور بإيده قدام وشها يا أستاذة؟انتى سامعاني؟
لوسيندا فاقت فجأة ها؟ آه لا أقصد أيوه يعني على حسب لو حضرتك هتفضل واقف كدا قدامي فأنا غالبًا مش كويسة خالص.
طالب من وراهم كتم ضحكته.
كريم حاول يحافظ على جديته لكنه ابتسم غصب عنه.
كريم واضح إن الإصابة أثرت على دماغك
لوسيندا وهي بتحاول تقوم لا دي أثرت على مراكز الاحترام الشخصي لأن بصراحة أنا فقدت كرامتي من أول ما شقلطونى ووقعت على الارض قدام امة لا إله إلا الله كدا.
مد كريم إيده يساعدها تقوم.
كريم اتفضلي بالراحة.
بصت لإيده شوية، وبعدين بصت له.
لوسيندا في سرها يخربيت جمال امك هو انت حقيقى ولا Ai يارب يجعلك من نصيبى واهو ابقا طلعت بوظيفة وجوازة دى كدا تبقا فرجت .
مسكت إيده وقامت، لكن أول ما وقفت حسّت بدوخة بسيطة فمالت لقدام.
كريم بسرعة سندها من كتفها خلى بالك بالراحة واضح إن الخبطة مش بسيطة.
لوسيندا وهي قلبها هينط من مكانه لا لا بسيطة انا كويسة انا عاوزة بس اقعد وهبقا تمام.
كريم دخلها المعمل وراح بسرعة جاب تلج وحطه مكان الخبطة.
في نفس اللحظة، الأشباح التلاتة كانوا واقفين من بعيد بيتفرجوا.
معاذ انتم شايفين اللى انا شايفه.
عبداللههى متنحة كدا ليه أنا أول مرة أشوفها ساكتة كدا
سليم واضح إن الكابتن كريم أثر عليها جامد
كريم ها بقيتى احسن دلوقتي 
لوسيندا الحمدلله. 
عبدالله شكلنا داخلين على فيلم رومانسي 
لوسيندا اتلم يازفت.
كريم انتى بتكلمينى انا.
لوسيندا بسرعة لالالالا هو انت مين؟
كريم أنا كريم مدرس الألعاب هنا.
لوسيندا ابتسمت ومدت إيدها لوسيندا مدرسة الكيمياء الجديدة وضحية الملاعب رسميًا.
سلم عليها وهو مبتسم تشرفنا يا أستاذة لوسيندا.
لوسيندا وهي بتبص له الشرف ليا جدًا جدًا جدًا ويمكن أكتر من اللازم كمان.
كريم ضحك وقال واضح إن وجودك هنا هيعمل قلبان في المدرسة.
بعد ما كريم اطمن على لوسيندا سابها في المعمل وراح يكمل شغله وهي فضلت قاعده ومسهمه.
معاذ شوفت يا واد يا سليم المز دا، دا عليه شويه عضلات.
سليم شوفت يا اخويا شوفت دا تلاقي البنات حواليه زي الرز ياما كان نفسي ابقى زيه بس منه لله يوسف اللي موتنا بدري.
عبد الله وهو بيعمل ايده زي الكمنجه بس ياض انت وهو انتم مش شايفين الهيمانه على نفسها دي.
معاذ اوعى بقا دا شكل الصناره غمزت شايف القلوب اللي بتنط من عينيها.
في اللحظه دي لوسيندا اخدت بالها ما تتلمي ياض انت وهو انتم هتحفلوا عليا ولا ايه؟
معاذ انا من واقع خبرتي اقدر اقولك ان المز ده مش هيبصلك.
لوسيندا نعم يا اخويا ليه ان شاء الله ما اشبهش ولا ما اشبهش.
معاذ اهو ده اللي بتكلم عنه انت مسترجله قوي في كلامك وفي لبسك والشاب مننا بيبقا عاوز يشوف ليدي مش عم شرفنتح.
عبد الله بصراحه معاذ عنده حق بس احنا نقدر نساعدك.
لوسيندا انت بتتكلم بجد يا عبد الله؟
سليم بس على شرط ياحلوة.
لوسيندا شرط ايه ان شاء الله؟
سليم انتى بقا لك يومين مطنشانا ومش بتحاولي تساعدينا زي ما اتفقنا فاحنا بقى هنساعدك ان المز ده يحبك وهو اللي يقرب منك في المقابل انك تساعدينا نمشي من هنا بس من غير مرقعه.
لوسيندا ما هو لو كان صبر القاتل على المقتول كان مات لوحده انا كنت بمخمخ لكم في خطه بس برتبها في دماغي الاول عشان اخليكم تغوروا من هنا بس على العموم اتفقنا وان شاء الله من بكرا هبدأ معاكم.
بالليل كانت لوسيندا قاعده في بيتها ومعاها كريمه.
كريمه خدي يا بنت يا لوسي ماما بعتالك الألف جنيه دي وبتقولك اتلمي وخلي عندك دم واعملي حسابك هتتغدي معانا بكرا.
لوسيندا تسلميلي يا كركورة انا مش محتاجه حاجه والله واشكريلي طنط اوي انتى عارفة ان انا بمشي نفسي على فوايد الوديعه صحيح معدتي نشفت من الجبنه بس خلاص هانت الفوايد هتنزل بعد يومين واجيب فراخ بقا وادلع نفسي.
كريمه لا ما ليش فيه انا امي قالتلي اقولك انك لو ما جيتيش بكرا هتيجي تجرك من شعرك وبصراحة انا معنديش استعداد ارجعلها بالفلوس لانها هتنتفلى شعرى شعراية شعراية .
لوسيندا لا خلاص الطيب احسن انا ما عنديش استعداد اخسر شعرايه من شعري هخلص شغلي بكرا ان شاء الله واجيلكم بس وحياتي خليها تعملي فراخ محمره وصينيه بطاطس ورز حبايه وحبايه بلاش بسمتي اصل طويل وانا مش بحبه وبلاش رز ابيض.
كريمه بضحك والله انا كنت قربت اصدقك وانت معززه نفسك كدا يا بنت ابله فضيله ايوا كدا ارجعي لطبيعتك.
لوسيندا بإبتسامة سيبك بقا من الأكل والكلام الفارغ دا وتعالى لما احكيلك على اللى حصل النهاردة فى المدرسة.
كريمة بخضة ايه العفاريت بتوعك عملوا فيكى حاجة.
لوسيندا بقا دا منظر واحدة حد يقدر يعملها حاجة.
كريمة اومال فى ايه اللى حصل؟
لوسيندا بتنهيدة قابلت حب حياتى أخيراً واد انما ايه عضلات ايه وكاريزمة ايه وحلاوة ايه يالهوى على جمال امه.
كريمة لااا دا انتى حالتك حالة مين دا يابت فهمينى.
حكيتلها لوسيندا اللى حصل واتفاقها مع الاشباح.
كريمة طيب ودى بقا هتعمليها ازاى ياضنايا.
لوسيندا عادى جدا انا شوفت افلام كتير بتاعت عفاريت واسكتى بقا انا هعرف اتصرف ويلا قومى امشى من هنا قبل ما الست الوالدة تشلوحك.
تانى يوم فى المعمل
لوسيندا قولولى بقا ايه الحاجات اللى تعرفوا تعملوها.
سليم انا بعرف انفخ فى ورقه واحركها حركة بسيطة.
عبدالله وانا عرفت اطفى النور وافتحه مرتين تلاتة وحاولت تانى بس مش عارف.
لوسيندا وانت يامعاذ بتعرف تعمل ايه؟
معاذ بضحك انا بقا ولا الهوا معرفتش اعمل اى حاجة خالص.
لوسيندا يافرحة امك بيك ياخويا. 
بدأت لوسيندا تدرب كل واحد فيهم 
لوسيندا أول تمرين درفة الدولاب دي عاوزاكم تفتحوها وتقفلوها.
سليم ركز جامد الدرفة اتحركت نص سنتي بس وبعدين رجعت مكانها.
سليم وهو بيعرق شوفتي؟ شوفتي؟ اتحركت اهى
لوسيندا اتحركت إيه يا بني دا أنا لو نفخت فيها هتتحرك اكتر من كدا.
عبدالله حاول ركّز عشان خاطري متبقاش خيبة انت كمان.
الدرِفة اتفتحت فجأة مرة واحدة وخبطت في الحيطة.
لوسيندا يا نهار ابيض بالراحة يا ابني انت ناوى تكسر المعمل على دماغنا.
عبدالله بفخر المهم اتفتحت.
معاذ وقف متحمس سيبوني بقا أنا.
وقف ركّز سكت ركّز تاني ولا حاجة حصلت.
لوسيندا معلش يامعاذ انا مش هسيبك الا لما تعرف تعمل زيهم.
معاذ انا مش قلقان