كوني صديقتها بقلم ميرال حصريه وجديده وكامله جميع الفصول

كوني_صديقتها بقلم_ميرال حصريه وجديده وكامله جميع الفصول 
ببيت ريفي بسيط و بيوم صيفي من أواخر أيام شهر حزيران
أسيل عم تساعد أمها بتحضير الحلويات لاستقبال الضيوف يلي رح يباركولها بنجاحها بالصف التاسع و بعلامة مميزة
مريم أسيل وينها أختك؟
أسيل لساتها نايمة
مريم اااخ من هالبنت.. رح تجنني كل الليل سهرانة و لنص النهار لحتى تفيق
أسيل عادي ماما بتكون عم تتسلى بالمسلسلات و ما انتبهت انو تأخرت الوقت
مريم لك تضرب المسلسلات و الموبايلات.. أساساً ما اجانا منها غير وجع الراس.. هاتي هاتي الصينية من عندك خليني قوم حطها بالفرن
أسيل بتعطي الصينية لأمها تفضلي ماما
بيمر الوقت و أسيل و أمها مشغولين بالحلويات أما أختها ما بتصحى لوقت الضهر و بتفوت ع الصالون و هيي عم تتاوب
زينب اوووه شو هالريحة الحلوة هي! 
مريم صح النوم آنسة زينب.. صارت الدني الضهر و حضرتك هلا لفقتي.. لأي ساعة سهرانة مبارح؟؟
زينب بتاخد قطعة حلو من الصينية نمت شي ٤ تقريباً شو الغدا اليوم؟؟
أسيل صينية بطاطا و سلطة
زينب و وين بابا و أخي؟؟
أسيل أبوكي بالأرض و حسن عم يلعب مع ولاد الجيران
زينب و ايمت بدنا ناكل؟ جوعانة كتير
مريم بدل ما تنقي ع الأكل قومي شوفي المطبخ و رتبيه شوي
زينب ماما الله يخليكي هلا لحتى فقت اكيد مارح بلش شغل فوراً
مريم ليه اي وقت بيناسبك لحتى تشتغلي فيه؟
أسيل لحتى تنهي الجدال خلص ماما أنا هلا بقوم برتب كل شي
بتفوت زينب ع غرفتها بدون ما تهتم للحديث يلي صار أما أسيل بتروح ع المطبخ و بتبلش شغل فيه
بتمر الأيام و أسيل ع طول بالبيت ماعم تقدر تطلع مشوار بسبب الضيوف يلي عم يجو يباركولها و كل وقتها شغل و أحيانا بتروح لبيت جيرانها المسا بتسهر عندهن شوي أما زينب عم تقضيها مشاوير مع رفقاتها و تسلية ع النت
 
لمحة عن الشخصيات 
أسيل عمرها ١٥ سنة.. متوسطة الطول بشرتها حنطية شعرها بني طويل لأسفل ضهرها و لون عيونها بني.. حساسة و كتومة كتير و بنفس الوقت عنيدة كتير
زينب أختها لأسيل.. طويلة جسمها متناسق بشرتها بيضا و عيونها عسليات و شعرها أسود قصير لعند كتفها.. عمرها ١٩ سنة.. عم تدرس هندسة بجامعة المدينة يلي بتبعد عن الضيعة مسافة نص ساعة بالسيارة شخصيتها قوية و كتير بتحب المشاوير و بتكره شغل البيت كتير
حسن أخوها لأسيل.. عمرو ١٢ سنة صف سابع
مريم أمها لأسيل حنونة و قلبها طيب بس عصبية كتير
أحمد أبوها لأسيل.. حنون و بالو طويل كتير
 
بعد مرور شهر 
أسيل عم تنشر الغسيل برا و عم تحكي مع حالها
أسيل الحمدلله خلصو الضيوف و المباركات.. والله طق قلبي من استقبال العالم و القعدة بالبيت
بيقطع تفكيرها صوت أبوها عم يناديها من الصالون و بتترك من ايدها و بتفوت لجوا
أسيل أهلين بابا.. يعطيك العافية
أحمد الله يعافيكي يا بنتي.. تعي شوفي شو جبتلك معي بيطالع علبة موبايل من كيس بأيدو هي هدية نجاحك يا روحي.. تفضلي
أسيل بفرح جد هاد الي؟! بتقرب لعند أبوها و بتضمو الله يخليلي ياك ولا يحرمني منك
أحمد و يوفقك و يفرحني بنجاحك بالبكلوريا يارب
بتمر الأيام و أسيل بتصير تقضي الوقت بين التسلية بالموبايل و شغل البيت بس بيكون فيه شي زاعجها و هوي تعليقات أمها لما تشوفها ماسكة الموبايل بس مع هيك بتحاول تطنش و تتجاهل كرمال لا تتخانق مع أمها
يوم عطلة نهاية الأسبوع بتكون أسيل سهرانة ببيت جيرانها مع حنين و كرم ولاد الجيران و بيكونو قاعدين بحديقة البيت عم يشربو عصير
كرم حنين فوتي جيبي تلج من جوا
حنين اي تكرم أخي 
بتفوت حنين لجوا و بيضلو كرم و أسيل قاعدين
كرم شبك أسيل ليه مزعوجة؟ 
أسيل لا عادي مافيه شي
كرم أسيل انا حافظك اكتر من حالك.. احكيلي شو يلي زاعجك؟
أسيل و عيونها مدمعين مزعوجة من أمي.. صايرة ع طول بتعلق عليي لما أمسك الموبايل مع إني عم اشتغل شغل البيت كلو و ماعم قصر بشي بس مع هيك دايماً بتسمعني حكي
كرم بابتسامة عادي لأنها مو متعودة عليكي معك موبايل
أسيل و ليه بتعاملني هيك و زينب ما بتحكي معها شي؟؟ 
كرم لا امبلا بتحكي مع زينب نفس الحكي بس الفرق انو زينب تعودت و صارت تطنش أما انتي حساسة و بتضلي عم تفكري كتير
و هني عم يحكو بترجع حنين لعندهن و معها التلج
حنين تفضل أخي
كرم يسلم ايديكي
حنين كأنكن سكتو لما اجيت؟! 
أسيل لا بس كنا عم نحكي عن ماما و تعليقاتها
حنين بضحكة هههه كل الأمهات بتعلق و بتحكي ما وقفت ع أمك 
بعد ساعة 
أسيل أنا رح روح قبل ما تعصب ماما عليي
كرم و انا رح امشي معك و وصلك
أسيل اي أساساً بخاف روح لحالي بتطلع بحنين تصبحي على خير حنين
حنين و انتي بخير
بتروح أسيل مع كرم و بيصيرو يحكو ع الطريق.. 
كرم أسيل بربك لا تضلي زعلانة هيك والله كل الأهل بيعلقو ع ولادهن و خاصة بموضوع الموبايل
أسيل بتعرف شو يلي زاعجني أكتر شي! اني بعرف و شايفة كيف بيعاملو زينب مع انها بتسهر و بتطلع من البيت اكتر مني و حتى انها ما بتشتغل بالبيت متلي بس هيك سبحان الله ماحدا بيحكي معها شي و دايماً بتطلع القصة براسي
كرم لا تقارني حالك بأختك.. انتي بالنسبة لأهلك المميزة و يمكن لهيك عم يشددو عليكي أكتر.. بيخافو تضيعي بسبب الموبايل
أسيل بتتنهد يمكن معك حق بتطلع حواليها و بيكونو وصلو لقدام البيت يسلمو كرم.. عذبتك و وصلتني لهون
كرم يلي بيسمع بيفكر البيت بعيد كتير و هني كلهن على بعضهن كم خطوة
أسيل بابتسامة يلا انا رح فوت.. تصبح على خير
كرم و انتي من أهلو
بتمر الأيام و أسيل كل يوم نفس الروتين.. بتشتغل بالبيت و بتتسلى بالموبايل و المسا بتسهر ع الواتس مع كرم و أوقات بتروح بتسهر عندهن و هوي بيوصلها بآخر السهرة و بيضلو ع هالحالة لحتى يجي اليوم يلي يقلب حياة أسيل رأساً على عقب
بعد مرور شهر ونص 
أسيل و حنين قاعدين بغرفة حنين عم يتحدثو و يضحكو و فجأة بينفتح الباب و بيفوت كرم
حنين بسم الله شبك أخي؟ ليه هيك فايت؟ 
كرم مافيه شي بس أمك مو هون و انا جوعان.. قومي حطيلي اكل الله يوفقك
حنين اي يلا قايمة بتطلع بأسيل عن إذنك أسيل
أسيل اذنك معك يا روحي
بتطلع حنين من الغرفة و بتروح ع المطبخ و بيفوت كرم ع الغرفة و بيسكر الباب
كرم وين كنتي مبارح؟؟
أسيل رحت مشيت انا و حنين ع الساحل شوي
كرم لحالكن؟؟ 
أسيل بتعجب شو مناسبة السؤال؟؟! 
كرم ما بيصير اسأل عنك و عن أختي يعني؟ 
أسيل لا طبعاً بيصير.. اي كنا لحالنا
كرم بانزعاج بس حنين ما قالتلي هيك
أسيل و شو قالتلك حنين؟ 
كرم كان محمد معكن
أسيل اي صح اجا آخر شي و مشي معنا شوي
كرم و ليه ما حكيتي من الأول؟ 
أسيل بتعجب شبك كرم شو صاير معك؟ ليه عم تحقق معي؟
كرم ماعم حقق معك بس حابب اعرف سر هالعلاقة القوية بينك و بين محمد
أسيل محمد ابن جيراننا و ربيانين سوا و رفيقي بالصف يعني طبيعي تكون علاقتي فيه قوية
كرم بانزعاج لا مو طبيعي.. انتي صبية و ما بيصير تكوني قريبة من محمد بهالطريقة
أسيل اي طريقة؟؟ يلي بيسمع بيفكر كل نهارنا مع بعض.. بعدين ليه مع محمد بالتحديد؟؟ يعني هي علاقتي فيك كمان قوية ليه عم تدقق هيك؟؟ 
كرم بعصبية هلا انا صرت متل محمد؟؟ 
أسيل شو الفرق؟؟
كرم بعصبية مافيه فرق
بيطلع كرم من الغرفة و هوي معصب و بيترك أسيل قاعدة و مستغربة من حكيو. بعد خمس دقايق بترجع لعندها حنين
حنين اسفة أسيل تركتك لحالك
أسيل لا ولا يهمك مافيه مشكلة
بيكملو أسيل و حنين السهرة ع الساعة ١١ و بعدها أسيل بتقوم لحتى تروح ع البيت
أسيل انا رح روح ع البيت.. بشوفك بكرا
حنين انطري دقيقة لحتى نادي كرم يوصلك
أسيل لا مافيه داعي بروح بحالي
حنين ههههه اي منشان توصلي ع البيت ميتة من الخوف بتوقف تعي تعي نشوف وين كرم
بيطلعو أسيل و حنين من الغرفة و بيكون كرم قاعد بالصالون 
كرم بيتطلع بأسيل رايحة هلا؟ 
أسيل بتهز راسها بمعنى اي
كرم بيوقف اي يلا تعي لوصلك
بيطلعو كرم و أسيل من البيت و بيمشو جنب بعض
كرم انا آسف أسيل ما كان قصدي عصب عليكي بس كنت مزعوج شوي
أسيل من شو مزعوج؟ احكيلي
كرم لا تهتمي قصة بسيطة
أسيل أنا ع طول بحكيلك كل مشاكلي الكبيرة و الصغيرة و على أساس ما منخبي شي عن بعض ليه ما بدك تحكيلي شو صاير معك؟ ولا لأني أصغر منك بخمس سنين ما بدك تخبرني؟ 
كرم بابتسامة لا مو هيك بس لما يجي الوقت المناسب بخبرك بكل شي 
أسيل متل ما بدك
بتوصل أسيل ع البيت و بتفوت لجوا بعد ما تودع كرم و هوي بيرجع ع بيتو
بيمر كم يوم و أسيل كل وقتها عم تحكي مع كرم و هوي عم يهتم بكل تفاصيل حياتها.. هيي عم تشكيلو مشاكلها مع أهلها و هوي ع طول عم يهديها و يسمعها
قبل بداية المدرسة بأسبوع 
قاعدة أسيل الساعة ١٢ نص الليل بتختها و عم تحكي مع كرم ع الواتس
كرم وين مختفية من يومين؟ 
أسيل عم ننزل ع السوق لحتى نشتري غراض المدرسة
كرم لسا اسبوع ماهيك؟ 
أسيل اي أسبوع.. انت ايمت بتخلص إجازتك؟ 
كرم بعد يومين.. أساساً بطلوع الروح لحتى وافق صاحب الاوتيل يعطيني إجازة
أسيل الله يوفقك و يعطيك العافية يارب
كرم تسلميلي يا عيوني
أسيل 
كرم ههههه هلا من هالكلمة خجلتي؟؟ 
أسيل بتحاول تغير الموضوع عم تتعب بشغلك ولا عادي؟؟
كرم اممم عم تغيري الحديث يعني؟ 
أسيل لا مو هيك بس ع طول بقول بدي اسألك هالسؤال و بنسى
كرم هههه لا ماعم أتعب بشغلي.. يعني كل شغلتي موظف استقبال و بتسلى مع الناس يلي بتجي و بتروح
أسيل اممم يعني لو كفيت دراستك ما كان أحسن! 
كرم أسيل الله يخليكي بلا هالحديث آخر الليل بيكفي أهلي ماعم يتركوني بحالي
أسيل خلص خلص متل ما بدك.. اعتبرني ما حكيت.. يلا انا رح نام.. بدك شي؟ 
كرم بدي سلامة قلبك يا عيوني
أسيل تصبح على خير
كرم و انتي بخير 
بتسكر أسيل الموبايل و هيي متلبكة و محتارة اذا حكيها مع كرم لوقت متأخر غلط او صح بس آخر شي بتتعب من التفكير و بتنام
بتمر الأيام و أسيل عم تلاحظ اهتمام كرم الكبير فيها و هيي كل مانها عم تتعلق