كوني صديقتها بقلم ميرال حصريه وجديده وكامله جميع الفصول

بالحكي معو أكتر و عم تصير تنطر الوقت يلي بدهن يحكو فيه لحتى تشكيلو مشاكلها مع أهلها و هوي دايماً عم يسمعها و كأنو الملجأ الوحيد الها حكيها مع أهلها صار قليل و تغير طبعها كتير.. ع طول ساكتة و ماعم تحكي بتفيق الصبح بتشتغل شوية شغل بالبيت و بترجع بتمسك الموبايل و اذا اجت أمها لعندها فوراً بتسكر الموبايل و بتلتهي بشغلة تانية لحتى تتجنب تعليقات أمها
بتبدأ المدرسة و بترجع أسيل للروتين المعتاد.. الصبح بتروح مع محمد و حنين ع المدرسة و الضهر بيرجعو.. بتفوت ع غرفتها بتتسلى بالموبايل شوي و بتحكي مع كرم شوي و بعدها بتتغدا و بتنام و لما تفيق بتدرس شوي و المسا بتحكي مع كرم
بعد شهر من بداية المدرسة 
يوم عطلة نهاية الأسبوع.. 
قاعدين عيلة أسيل و عم يفطرو
مريم بدنا نعزل البيت اليوم يا بنات 
زينب انا مافيي.. وعدت آيلا روح ادرس انا و ياها
أسيل انتي ع طول لما يكون فيه شغل بتهربي
مريم أسيل انتي اسكتي.. أختك اكبر منك و انتي ما دخلك فيها
أسيل اي معك حق.. أساساً انا ما دخلني بحدا منكن و مهمتي بالبيت بس اني اشتغل و ياريت حدا منكن بيقدر
مريم رح تضربيني بمنية لأنك عم تساعديني؟ 
أسيل و عيونها مدمعين لا مو هيك بس دايماً بتطلع القصة براسي أنا.. كل الشغل عليي و بالأخير كمان انا يلي باكل بهدلة
بتقوم أسيل ع غرفتها و بتصير تبكي 
مريم بصوت عالي بشتهي مرة وحدة نخلص شغل بهالبيت بدون مشاكل بس لا مستحيل ما بتقدرو اذا ما خليتوني عصب و صرخ من الصبح
أحمد خلصنا مريم.. أسيل معها حق.. كل الوقت هيي يلي عم تشتغل و بالأخير ما بيعجبك شي كمان
مريم هلا صار الحق عليي؟؟ بعدين مين قلك كل الوقت عم تشتغل؟ نص النهار قاعدة و ماسكة هالموبايل و عم تحكي ع الواتس و تتسلى.. لا و لما تشوفني قربت لعندها فوراً بتسكر الموبايل و كأنها عم تخبي شي
أسيل بتطلع من غرفتها و هيي عم تبكي لأنك كل ما شفتي الموبايل بأيدي بتعمليلي محاضرة أما زينب حتى لو بقيت كل النهار بالغرفة و عم تتسلى ما بتحكي معها شي
مريم أختك كبيرة و ما بيحقلك تقارني حالك فيها
أسيل اي معك حق.. خلص انا ماعد بدي لا موبايل ولا غيرو.. خدوه مني إذا بترتاحو
بترجع أسيل ع غرفتها و هيي مقهورة و بتحذف الواتس و بترجع لعند أهلها بتحط الموبايل ع الطاولة قدام أمها
أسيل هي الموبايل ماعد بدي ياه
أحمد أسيل خلصنا بقا.. خديه و لاعد تحكو بالموضوع
أسيل ما بدي ياه بابا.. انا لساتني صغيرة و ما بيصير احمل موبايل أساساً.. خليه مع أمي
بتروح أسيل بتغسل وجهها و بترجع ع الصالون و بتبلش شغل و ترتيب و لما يخلصو أهلها فطور بتبلش أمها تشتغل معها.. زينب بتروح لعند رفيقتها و أحمد و حسن بيقعدو بالصالون
الساعة ٩ المسا 
بيكونو اهل أسيل قاعدين بالصالون إلا زينب بتكون لساها عند آيلا و أسيل بغرفتها
بتطلع أسيل ع الصالون و بتكون لابسة بيجامة رمادية و بوط ابيض
أسيل انا رايحة لعند حنين
مريم هلا بدك تروحي؟ 
أسيل ما كل عمري بروح بهالوقت
مريم اي هاد الحكي كان بالصيف أما هلا الدني شتوية و مو حلوة تتأخري برا البيت
أسيل بيت حنين جنب بيتنا مو بقارة تانية
أحمد خلص روحي بنتي روحي بس ما تتأخري بالرجعة
أسيل بتهز راسها بمعنى اي و بتطلع من البيت و هيي حابسة دموعها بتوصل لعند حنين و بتدق الباب.. بيفتح كرم 
كرم بابتسامة اهلين أسيل
أسيل بزعل كيفك كرم
كرم بخير بس انتي شبك؟ ليه مزعوجة؟ 
أسيل و عيونها مدمعين مافيه شي.. وينها حنين؟ 
كرم لك كيف مافيه شي و انتي رح تبكي؟ فهميني شو صاير معك؟ 
أسيل بتصير تبكي و ما بترد 
كرم تعي تعي معي
بتروح أسيل مع كرم لحديقة البيت الخلفية و بيقعدو جنب بعض
كرم خبريني مين مزعلك؟ 
أسيل بتخبر كرم شو صار بينها و بين أهلها الصبح و كيف عطت أمها الموبايل و هوي بينزعج عليها كتير
كرم روقي أسيل و حاج تبكي والله ما بيهون عليي شوفك زعلانة
أسيل و هيي عم تبكي انا تعبت من هالمشاكل مع أهلي كل يوم.. والله من يوم يلي طلعت نتيجة نجاحي ما عشت يوم بدون خناقة و بهدلة.. شو ما عملت ماعم يعجب أمي.. احترت شو أتصرف
كرم صدقيني هي مشاكل عادية بين اي أم و بنتها و أساساً هيي من خوفها عليكي عم تعمل هيك
أسيل بس مو لهالدرجة.. انا اختنقت من حكيها و تعليقاتها عليي لك حتى هلا ما كانت رح تخليني اجي لهون مع أنو زينب من الصبح برا البيت.. بس خلص هالمرة عطيتها الموبايل و حذفت الواتس لشوف اذا رح تتغير أو لا 
كرم يعني ماعد رح تاخدي الموبايل؟
أسيل لا ماعد بدي ياه و هيك بركز ع دراستي وبس
كرم و أنا كيف بدو يمر يومي بدون ما احكي معك؟؟ 
أسيل بتلبك عادي متل ما كنا قبل.. بجي لعندكن و منحكي ما ضروري نحكي ع الواتس
كرم بس انا هيك رح اشتقلك كتير
أسيل بتتلبك و بتنصدم من حكي كرم و ماعد بيطلع معها الحكي و هوي بيكمل 
كرم انا ماعد فيي يمر يومي بدون ما احكي معك بيمسك ايد أسيل أسيل انا بحبك
أسيل بتسحب ايدها بتلبك كرم انا.. انا.. 
كرم أسيل انا مو جابرك ع شي و بتقدري تعتبري حالك ما سمعتي شي و بوعدك نبقى ع حالنا.. رفقات و جيران وبس
أسيل بتلبك اي هيك احسن بتوقف انا لازم ارجع ع البيت
كرم بيوقف خليني وصلك
أسيل لا مافيه داعي
بتطلع أسيل من بيت كرم و هيي متلبكة و بتروح ع بيتها و بتفوت ع غرفتها بوجهها.. بتتمدد بالتخت و بتبلش تبكي
أسيل بسرها ليه هيك عم يصير معي ياربي! الشخص يلي كنت اعتبرو سندي هلا رح اخسرو بسبب الحب.. اكيد كرم رح يتغير معي بعد ما رفضتو بس والله انا ما بحسو الا صديق.. شو اعمل؟ 
بتضل أسيل عم تفكر و تبكي لحتى تغفا آخر شي من التعب
______ 
بتمر الأيام و كرم وفى بوعدو لأسيل و ضلو رفقات متل الأول و حتى أنو كرم زاد اهتمامو بأسيل أضعاف الأول و هالشي أثر ع أسيل كتير و خلاها تتعلق فيه و تتعود ع اهتمامو فيها و تحس بمشاعر حلوة تجاهو و بنفس الوقت هالشي أثر عليها و ع علاقتها بأهلها لأنها صارت كتومة و بعدت عن أهلها و صار أغلب وقتها بالغرفة او مع حنين
بيخلص الفصل الدراسي الأول و بتبلش عطلة ما بين الفصلين و أمها لأسيل بتعطيها الموبايل من جديد و بترجع أسيل تحكي مع كرم كل يوم و المسا يقعدو مع بعض و بيوم من أيام العطلة بيكونو أسيل و كرم عم يحكو ع الواتس بالليل و بينفتح موضوع علاقتهن من جديد و أسيل بتضعف و بتعترف لكرم بحبها الو و هوي بيفرح كتير و من هون بتبدأ المشاكل مع أسيل
أسيل بتخبي عن أهلها علاقتها بكرم و بيضلو يحكو بالسر خفيةً عن الكل و هاد الشي بيسبب توتر لأسيل لأنها عم تكذب ع أهلها بس بنفس الوقت ما بتقدر تخبرهن وبعد فترة من ارتباطهن بيبلش كرم يتغير و يخف اهتمامو بأسيل و هالشي بيخليها تنزعج و بتبدأ المشاكل بيناتهن و لأنو أسيل ما خبرت حدا عن هالعلاقة ما بيكون عندها حدا تشكيلو مشاكلها لهيك بتفش خلقها بالبكي وبس
و مع مرور الأيام أهل أسيل بيحسو عليها كيف متغيرة و ع طول زعلانة و لما يسألوها ما بتحكي شي و بتقول تعبانة من المدرسة وبس
بتبقى أسيل ع هالحالة لحتى تبدأ عطلة الصيف من جديد و وقتها بتقرر تنفصل عن كرم و بتروح لعندهن ع البيت المسا متل العادة و بيكون هوي و حنين قاعدين بالحديقة
أسيل مرحبا
حنين بابتسامة اهلين أسيل تعي اقعدي رح فوت جبلك كاسة عصير
أسيل ماشي
بتقعد أسيل قبال كرم و بتفوت حنين لجوا
كرم اهلين حبيبتي.. كيفك
أسيل مو منيحة أبداً
كرم خير شو صاير؟؟ 
أسيل انا ماعد بدي كفي معك كرم
كرم بتعجب و شو السبب؟ 
أسيل تعبت و اختنقت.. تعبت من الكذب ع أهلي.. تعبت و انا كل نهاري متوترة حدا يشوف حكيي معك و يعرف بعلاقتنا.. تعبت من إهمالك و برودك و كذبك عليي
كرم أنا عم اهملك و كذب عليكي يا أسيل؟
كوني_صديقتها
بقلم_ميرال
الجزء_الثاني
أسيل اي انت.. ما بتحكي ولا بتسأل عني اذا انا ما سألت.. اذا تخانقنا ما بيخطر ببالك تصالحنا.. دايماً انا يلي عم صالحك و بالأخير بتكذب عليي و بتقلي إني اول بنت بحياتك و أنت يلي كنت مرتبط قبلي مرتين!!
كرم من وين جبتي هالحكي؟ 
قبل ما ترد أسيل بترجع حنين لعندهن و معها كاسة العصير
حنين تفضلي أسيل 
أسيل يسلم ايديكي
كرم أختي ما كتتي عم تقولي بدك تاخدي دوش؟ 
حنين اي مو مشكلة بأجلو لبعدين
أسيل لا لا مافيه داعي تأجلي شي.. انا مو غريبة و قاعدة مع كرم مافيه مشكلة يعني
حنين اوك.. معناها انا رح فوت و ما بتأخر
أسيل ماشي
بتفوت حنين لجوا و بيضلو كرم و أسيل قاعدين
كرم اي أسيل تفضلي كملي من وين جبتي إني كنت مرتبط قبلك؟ 
أسيل لك ع الأقل بعد ما واجهتك لا تكمل كذب.. حنين يلي خبرتني
كرم اي هدول مو علاقات حب و مو مستاهلة خبرك بهيك شي.. كلهن ع بعضهن كم شهر و فوراً انفصلنا
أسيل حاج كذب كرم.. أول بنت بقيت معها سنة و التانية ٥ شهور.. خلص انا تعبت منك.. من يوم يلي ارتبطنا و انت عم تتغير.. إهمالك عم يزيد و كذباتك عم تكبر.. لك صرت أشتهي يمر يوم بدون ما نام عم ابكي.. اتطلع فيي اتطلع بعيوني كيف دبلانين من وراك.. انا ماعد بدي كمل بهالعلاقة يلي عم تستهلك طاقتي و فرحي بتوقف بتمنالك التوفيق بحياتك
بتمشي أسيل كم خطوة و بيلحقها كرم و بيمسكها من ايدها و بيفلتها لعندو
كرم أسيل انا بحبك و ما بقدر ابقى بدونك.. انا بعترف إني غلطت بحقك بس والله مو بقصدي خبيت عنك موضوع علاقاتي قبلك
أسيل بس انا سألتك و انت كذبت عليي
كرم ما كان بدي ازعجك
أسيل بيكفي كرم الله يخليك خلص.. انا تعبانة من كل شي و ماعد عندي طاقة اسمع تبريرات سخيفة
كرم أسيل انا و انتي