كوني صديقتها بقلم ميرال حصريه وجديده وكامله جميع الفصول

منحب بعض لا تضيعي هالحب كرمال قصص قديمة
أسيل اذا ضيعت هالحب احسن بكتير من إني ضيع حالي و اخسر طاقتي مع حدا متلك
كرم بتعجب حدا متلي؟!! مبارح كنت حبيبك و هلا صرت حدا يا أسيل؟ 
أسيل و هيي عم تبكي اي لأني على ما يبدو ما كنت بعرفك منيح.. حتى لما كنا رفقات كنت مخبي عني كتير شغلات مع إني كنت احكيلك أصغر تفاصيل حياتي.. من لما قلتلي أنك بتحبني و أنت ماشي وراي و عم تهتم فيي و تهتم بكل تفاصيل يومي هييييك لحتى علقتني فيك و لما ضمنت وجودي بحياتك شو عملت؟ بلشت تهملني و تتغير لأنك بالأساس ما حبيتني.. أنت كنت متعود ع وجودي بحياتك وبس.. انا يلي عانيت و تعذبت خلال هالشهور و انا هلا بكامل إرادتي رح اترك هالطريق و افتح صفحة جديدة بحياتي سلام
بتمشي أسيل كم خطوة و بترجع بتلتفت ع كرم
أسيل بالمناسبة إني كون أصغر منك بخمس سنين ما بيعني اني ضعيفة أو غبية.. انا بس كنت عم اعطيك فرصة لحتى ترجع كرم يلي بعرفو بس الظاهر انو هاد كرم الحقيقي و يلي بعرفو كان كذبة و وهم
بترجع أسيل ع البيت و هيي مقهورة و عم تبكي و بتفوت ع غرفتها فوراً و بتشوفها أختها زينب و بتلحقها
زينب شبك أسيل ليه عم تبكي؟ 
أسيل مافيي شي.. مزعوجة شوي
زينب من شو مزعوجة؟ احكيلي
أسيل مافيه شي زينب.. تعبانة و راسي عم يوجعني و بدي نام.. اطفي الضو و سكري الباب وراكي
زينب الساعة لسا ما صارت ٩.. من هلا بدك تنامي؟! 
أسيل اي عم قلك تعبانة
زينب متل ما بدك
بتطلع زينب من الغرفة و بتسكر الباب وراها و بتترك أسيل عم تبكي و تكتم شهقاتها
بحديقة البيت
قاعدين أهل أسيل مع بعض 
مريم زينب شبها أختك؟ رجعت بكير من عند حنين و فاتت ع غرفتها فوراً؟ شو القصة
زينب قال تعبانة و بدها تنام
أحمد والله هالبنت صرلها فترة متغيرة.. صايرة كتومة زيادة و ماعم تحكيلنا شو بيصير معها
مريم اي بنتك كل عمرها هيك.. ما بتحكي شي ولا منعرف شو عم يصير بحياتها
أحمد اي لأنو نحنا ما عرفنا نتقرب منها بيوقف انا قايم شوفها
بيفوت أحمد لعند أسيل ع الغرفة و بيقعد عندها ع طرف التخت و بيمسح ع راسها
أحمد بحنية أسيل ليه نايمة من هلا يا بنتي؟ 
أسيل بتمسح دموعها و بتجلس قعدتها بالتخت راسي عم يوجعني و تعبانة 
أحمد و ليه زعلانة؟ 
أسيل بابتسامة خفيفة مو زعلانة بس من التعب
أحمد بنتي ليه انتي هيك بعيدة عننا؟ ليه ما بتخبرينا شو صاير معك و مين مزعلك؟ 
أسيل بينزلو دموعها مافيه شي بابا لا تقلق عليي أنا منيحة
أحمد بنتي انا أبوكي يلي رباكي و بعرفك من نظرة عيونك فكرك ما بعرف أنك كل الفترة الماضية كنتي عشقانة؟!
أسيل بتطلع بأبوها و هيي مصدومة و بتضل ساكتة
أحمد اي أسيل انا بعرف من نظراتك أنك عشقانة بس نطرت تجي انتي و تحكيلي او تحكي لأختك او لأمك بس انتي خبيتي عننا كلنا و اخترتي تمشي بهالطريق لحالك رغم صغر سنك
أسيل و هيي عم تبكي ما كان عندي الجرأة احكي معكن بهيك موضوع.. و كنت متأكدة أنكن رح تعارضو و رح تعصبو مني... اذا ماما كانت تعلق عليي بدون ما كون مرتبطة كيف لو خبرتها بهيك شي؟ اكيد كانت حرمتني اطلع من البيت 
أحمد صحيح كنا رح نعارضك لأنو نحنا منعرف مصلحتك اكتر منك و لأنو لساتك صغيرة ع الحب بس كنا وقفنا جنبك و فهمناكي الغلط من الصح
أسيل بصوت مقطع من البكي انا آسفة بابا بس خلص هلا انا سكرت ع القصة كلها و قررت افتح صفحة جديدة و ماعد رح فكر الا بدراستي
أحمد لا تعتذري ولا تبكي.. بس بدي منك تكوني قريبة مني و من أمك اكتر من هيك
أسيل بزعل انشالله
أحمد بيبوس أسيل من راسها يلا نامي و ارتاحي.. تصبحي على خير
أسيل و انت بخير
بيطلع أحمد من الغرفة و بيروح ع الحديقة بيقعد بدون ما يحكي اي كلمة
مريم حكتلك شي؟
أحمد بيكون شارد و ما بيرد 
زينب بابا وين شردت؟؟ 
أحمد بيصحى من شرودو شو قلتي بنتي؟ 
زينب عم تسألك ماما عن أسيل.. حكتلك شي؟ 
أحمد بيتطلع بمريم لا ما حكت شي بس انا خبرتها اني بعرف كل شي
مريم قصدك عن كرم؟؟ 
أحمد اي خبرتها و هيي ما نكرت بس قالتلي سكرت ع هالقصص كلها و بدها تركز ع دراستها وبس
زينب ما سألتك كيف عرفت؟ 
أحمد لا قلتلها انا فهمت من تصرفاتها و انتو مافيه داعي تخبروها أنو سمعنا حديثها معو من فترة يلي بيهمنا أنها انفصلت عنو و بدها تركز بدراستها
مريم هاد اذا قدرت و ما أثر عليها الموضوع
أحمد اذا تقربتي منها و صرتي رفيقتها مارح تتأثر بالموضوع بس انتي ع طول حاطة مسافة بينك و بينها.. بنتك محتاجة تكوني رفيقتها و تحكيلك بدون خجل هيك مواضيع بس انتي ع طول بتعلقي عليها و هاد الشي يلي بعدها عننا
مريم بحزن يعني هلا طلعت انا الغلطانة؟ هي زينب بتحكيلي كل شي بيصير معها مع إني بعاملها متل أسيل بس أسيل طبعها هيك كتومة و ما بتحكي
أحمد لا هالحكي مو صحيح.. انتي دايماً كنتي بعيدة عن أسيل.. ولا مرة قعدتي و حكيتي معها.. ع طول بتشوفيها صغيرة مع انو هي اكتر مرحلة حساسة من العمر و كلنا منعرف هالشي
مريم يعني انا المسؤولة عن كل يلي صار؟؟ 
أحمد ماعم قلك هيك.. عم قلك لازم نصحح غلطنا و نتقرب من أسيل قبل ما تصير انطوائية اكتر من هيك
مريم بتتنهد انشالله خير انشالله
___
بتمر الأيام و أسيل عم تحاول تنسى كرم و يلي صار معها بس مع الأسف هالشي كتير صعب عليها لأنو كرم كان رفيقها و سندها قبل ما يكون حبيبها و كانت تقضي كل وقتها عم تحكي معو و اي مشكلة بتوقع فيها كانت تلجأ الو و فجأة صار غريب و ماعد تقدر تحكي معو
كرم حاول يصلح غلطو و يرجع لأسيل بس هيي رفضت و قطعت كل طرق التواصل بيناتهن حتى لبيتهن ماعد راحت و علاقتها بحنين صارت شبه رسمية و ماعد التقت بكرم الا نادراً بس رغم هالشي كانت لساها عم تحس بنوع من الحنين لذكرياتها و لحظاتها معو و هالشي كان السبب ببكاها كل ليلة قبل ما تنام
___
بعد مرور ٥ سنين 
زينب تزوجت و صار عندها بنت.. أسيل صارت سنة تالتة جامعة و عم تدرس هندسة 
خلال هالسنين كل شي بحياة أسيل تغير للأحسن بس بقت خسارة كرم صديق طفولتها و سندها حسرة بقلبها و كل ما مرت من جنب بيتو تتذكر كل شي صار و تحاول تقوي حالها من جديد و الشي الوحيد يلي ما تغير فيها هوي حساسيتها و الطبع الكتوم يلي كان فيها و زاد مع مرور الأيام
بيوم من أيام الأسبوع 
بتكون أسيل قاعدة بمكتبة الجامعة لحالها و عم تحاول تحل مسألة بس ماعم تعرف و بعد عدة محاولات بتيأس و بتضب غراضها و بتطلع من المكتبة و بتمشي باتجاه باب الجامعة بس قبل ما توصل لعند الباب بتشوف المعيد يلي عم يعطيها المادة فايت ع الجامعة و بتقرب لعندو بتلبك و خجل
أسيل صباح الخير دكتور علي
علي صباح النور.. تفضلي كيف بقدر ساعدك
أسيل بتلبك دكتور انا طالبة هندسة عمارة سنة تالتة و عندي سؤال بمادة الرسم الهندسي اذا ممكن تجاوبني
علي والله هلا عندي محاضرة و متأخر عليها بس رح اعطيكي رقمي و بتقدري تتصلي و تسأليني بيطالع كرت من جيبتو و بيعطيه لأسيل تفضلي
أسيل بخجل شكراً كتير دكتور و آسفة ع الإزعاج
علي بابتسامة بالعكس انا يلي لازم اعتذر منك.. ناطر اتصالك.. سلام
أسيل الله معك دكتور
بيفوت علي ع الجامعة و أسيل بتكمل طريقها لبرا و هيي عم تقرا الكرت يلي عطاها ياه
أسيل بسرها المهندس علي ال... مهندس عمارة و عندو مكتب خاص و بيعطي بالجامعة
بتحط أسيل الكرت بشنتايتها و بتوقف ع الرصيف قدام الجامعة بتنطر تكسي و بترجع ع البيت
بتفوت أسيل ع البيت بتغسل ايديها و بتكمل ع المطبخ.. بتكون أمها عم تحضر الغدا
أسيل يعطيك العافية ماما
مريم الله يعافيكي بنتي.. كيف كان يومك؟ 
أسيل متل العادة مافيه شي جديد.. شو غدانا اليوم؟
مريم سمك و سلطة غيري تيابك بيكونو وصلو أبوكي و أخوكي
أسيل يلا 
بتغير أسيل تيابها و بتحضر السفرة مع أمها و بعد ربع ساعة بيوصلو احمد و حسن و بيقعد الكل و بيبلشو أكل
الساعة ٨ المسا 
بتكون أسيل قاعدة بالصالون مع أهلها عم يشربو شاي و شاردة و عم تفكر اذا بتتصل بالدكتور او لا و بيقطع شرودها صوت أمها 
مريم أسيل وين شاردة؟ 
أسيل ااا لا مافيه شي ماما
مريم بنتي إذا صاير معك شي خبرينا.. ما بدنا نرجع لنفس الحديث و نفس النقطة كل مرة
أسيل ماما مافيه شي مهم.. بس عندي مسألة ماعم اعرف حلها و عم فكر فيها
أحمد اسألي حدا من رفقاتك يمكن يساعدك فيها
أسيل لا خلص بكرا بسأل الدكتور عنها بتوقف انا فايتة نام.. تصبحو على خير 
أحمد و حسن و مريم و انتي بخير
بتفوت أسيل ع غرفتها و بيضلو أهلها قاعدين.. 
مريم بزعل رغم كل محاولاتي بأني كون قريبة من أسيل بس هيي لساها بعيدة عننا
أحمد تعودت ع الوحدة
حسن على فكرة أسيل تغيرت كتير عن قبل و صارت بتقعد معنا و بتشاركنا الحديث و أساساً صرلي زمان ما شفتها عم تبكي بس انتو عم تبالغو
مريم نحنا ما قصدنا الأحاديث العادية.. أختك لساها متل لما كان عمرها ١٥ سنة كتومة بكل تفاصيل حياتها الشخصية لأني ما عرفت كون رفيقتها و قربها مني و اكسر حاجز الأم و البنت يلي كان بيناتنا
أحمد بس ما تنسي أنها تقربت من اختها و هالشي منيح
مريم اي الحمدلله هيي و اختها صارو متل التوأم و بياخدو رأي بعض بكل شي
______
تاني يوم بتروح أسيل ع الجامعة بتحضر أول محاضرة و لما تخلص بتاخد غراضها و بتروح ع مكتبة الجامعة و بتلتقي بالدكتور علي ع الدرج
أسيل صباح الخير دكتور
علي صباح النور.. نطرت تتصلي فيي مبارح أو تحكي معي ع الواتس بس ما اتصلتي.. ليه؟ 
أسيل بخجل ما حبيت أزعجك و قلت لحالي بسألك بعدين
علي أنتي شو اسمك؟ 
أسيل اسمي أسيل